جعلی ویزوں پر برطانیہ سیٹل ہونے کی کوشش میں گرفتار 25 پاکستانی طلبہ کو جوڈیشل ریمانڈ پر جیل بھیج دیا گیا ہے۔
وفاقی تحقیقاتی ایجنسی (ایف آئی اے) نے گرفتار 25 طلبہ کو اسلام آباد میں جوڈیشل مجسٹریٹ احمد شہزاد گوندل کی عدالت میں پیش کیا۔
عدالت نے ایف آئی اے کی جانب سے ملزمان کے جسمانی ریمانڈ میں توسیع کی درخواست مسترد کرتے ہوئے انہیں 14 دن کے جوڈیشل ریمانڈ پر جیل بھیجنے کا حکم دیا۔
ایف آئی اے کے حکام نے عدالت کو بتایا کہ ملزمان پر پاسپورٹ ٹیمپر کرکے برطانیہ جانے اور وہاں سیٹل ہونے کی کوششوں کا الزام ہے۔
ملزمان کے وکلا کی جانب سے ضمانت بعد از گرفتاری کی درخواستیں دائر کی گئیں، عدالت نے فریقین کو نوٹس جاری کرتے ہوئے سماعت 24 مارچ تک ملتوی کر دی
کیس کی آئندہ سماعت پر وکلا کی جانب سے دلائل دیے جائیں گے۔ واضح رہے کہ ان 25 ملزمان کے خلاف ایف آئی اے میں مقدمہ درج ہے۔