پاکستان کرکٹ ٹیم انتظامیہ نے پاکستان اور نیوزی لینڈ کے درمیان تیسرے ون ڈے انٹرنیشنل میچ میں غیرملکی شائقین کی جانب سے قومی کھلاڑیوں سے بدزبانی کی مذمت کی ہے۔پاکستان کرکٹ بورڈ (پی سی بی) کی جانب سے سنیچر کو جاری کردہ بیان میں کہا گیا ہے کہ ’غیرملکی شائقین نے گراؤنڈ میں موجود کرکٹرز کے بارے میں نازیبا الفاظ ادا کیے۔ پاکستان مخالف آوازیں کسنے پر کرکٹر خوشدل شاہ نے غیرملکی شائقین کو منع کیا۔ لیکن منع کرنے پر افغان شائقین نے پشتو میں مزید نازیبا الفاظ ادا کیے۔ دو افغان شائقین نے خوشدل شاہ سے ہاتھا پائی کی کوشش بھی کی۔‘
پی سی بی کے مطابق پاکستانی ٹیم کی شکایت پر دونوں غیرملکی شائقین کو سٹیڈیم سے باہر نکال دیا گیا۔
خیال رہے کہ پاکستان کرکٹ ٹیم کو نیوزی لینڈ کے دورے کے دوران پے در پے شکستوں کا سامنا کرنا پڑا ہے۔ پانچ ٹی20 میچز پر مشتمل سیریز میں نیوزی لینڈ نے 1-4 سے فتح سمیٹی۔ جبکہ سنیچر کو ماؤنٹ مونگانوئی میں نیوزی لینڈ نے پاکستان کو تیسرے ایک روزہ انٹرنیشنل کرکٹ میچ میں 43 رنز سے شکست دے کر سیریز میں کلین سویپ کر لیا۔نیوزی لینڈ کی نوجوان کھلاڑیوں پر مشتمل ٹیم نے پاکستان کو ہر شعبے میں ناک آؤٹ کیا۔ اور گرین شرٹس دونوں سیریز میں مشکل میں نظر آئی۔