"میرا خواب تھا کہ جب میرا بیٹا شادی کرے، تو میں اپنی بہو کو ہیلی کاپٹر میں گھر لاتے دیکھوں،" ساحل کی والدہ کی آنکھوں میں خوابوں کی چمک اب خوشیوں میں ڈھل چکی تھی۔
بھارت کے گاؤں دھندردو میں ایک انوکھی شادی نے سب کو حیران کر دیا، جب دولہا اپنی دلہن کو لینے ہیلی کاپٹر لے آیا۔ یہ کوئی فلمی منظر نہیں بلکہ ہریانہ کے پنچکولہ ضلع میں ہونے والی ایک حقیقت تھی، جس نے سوشل میڈیا پر دھوم مچا دی۔
ساحل نامی دولہے نے اپنی ماں کا برسوں پرانا خواب پورا کیا۔ "2012 میں ہم ایک کمرے کے مکان میں رہتے تھے، لیکن ماں نے تب ہی کہہ دیا تھا کہ بہو کو ہیلی کاپٹر میں ہی گھر لانا ہے،" ساحل نے خوشی سے بتایا۔ وہ لمحہ آخر کار 7 اپریل کو آیا، جب یمنا نگر سے ساحل کی بارات نکلی اور دلہن لینے کے لیے آسمان میں پرواز کر گئی۔
گاؤں والوں کے لیے یہ لمحہ کسی خواب سے کم نہ تھا۔ جیسے ہی ہیلی کاپٹر گاؤں کی حدود میں اترا، ہر طرف حیرت اور خوشی کی لہر دوڑ گئی۔ لوگ چھتوں پر چڑھ کر یہ نظارہ دیکھنے لگے، موبائل کیمرے چلنے لگے، اور پلک جھپکتے ہی ویڈیو وائرل ہو گئی۔
انتظامات بھی کسی وی وی آئی پی ایونٹ جیسے تھے۔ پولیس، فائر بریگیڈ، ایمبولینس — سب موجود۔ اور جب ساحل، دلہن اور ماں ایک ساتھ ہیلی کاپٹر سے باہر آئے، تو یہ منظر دل کو چھو گیا۔