ایرانی میڈیا رپورٹس کے مطابق اسمٰعیل فکری نامی شخص، جس پر اسرائیلی انٹیلیجنس ایجنسی موساد کے لیے جاسوسی کا الزام تھا، کو مکمل قانونی کارروائی اور مجرمانہ ٹرائل کے بعد تختہ دار پر لٹکا دیا گیا۔ عدالت نے شواہد کی بنیاد پر اسے قصوروار قرار دیتے ہوئے سزائے موت سنائی تھی۔
ایرانی حکام کے مطابق فکری پر حساس معلومات اسرائیل کو فراہم کرنے اور ملکی سلامتی کے خلاف سرگرمیوں میں ملوث ہونے کے الزامات ثابت ہو چکے تھے۔ ایران نے اس کارروائی کو قومی سلامتی کے تحفظ کا اہم قدم قرار دیا ہے۔
یہ پھانسی ایسے وقت میں دی گئی ہے جب ایران اور اسرائیل کے درمیان کشیدگی عروج پر ہے، اور دونوں ممالک کے درمیان کئی دنوں سے فضائی حملوں کا سلسلہ بھی جاری ہے۔ اس واقعے کو ایران کی جانب سے جاسوسوں کے خلاف سخت پیغام کے طور پر دیکھا جا رہا ہے۔