حضرت انس رضی اللہ عنہ سے مروی
ہے کہ ایامِ وصال میں جب نماز کی امامت کے فرائض سیدنا صدیق اکبر رضی اللہ
عنہ کے سپرد تھے، پیر کے روز تمام صحابہ کرام رضی اللہ عنھم صدیق اکبر رضی
اللہ عنہ کی اقتدا میں حسب معمول باجماعت نماز ادا کر رہے تھے کہ آپ صلی
اللہ علیہ وآلہ وسلم نے قدرے افاقہ محسوس کیا۔ ’’آپ نے اپنے حجرۂ مبارک کا
پردہ اٹھا کر کھڑے کھڑے ہمیں دیکھنا شروع فرمایا۔ گویا آپ صلی اللہ علیہ
وآلہ وسلم کا چہرۂ انور قرآن کا ورق ہو، پھر مسکرائے۔’’حضور نبی اکرم صلی
اللہ علیہ وآلہ وسلم کے دیدار کی خوشی میں قریب تھا کہ ہم لوگ نماز چھوڑ
بیٹھتے۔ پھر حضرت ابوبکر رضی اللہ عنہ اپنی ایڑیوں پر پیچھے پلٹے تاکہ صف
میں شامل ہوجائیں اور انہوں نے یہ سمجھا کہ حضور صلی اللہ علیہ وآلہ وسلم
نماز کے لیے باہر تشریف لانے والے ہیں۔’’جب (پردہ ہٹا اور) آپ صلی اللہ
علیہ وآلہ وسلم کا چہرۂ انور سامنے آیا تو یہ اتنا حسین اور دلکش منظر تھا
کہ ہم نے پہلے کبھی ایسا منظر نہیں دیکھا تھا۔مسلم شریف کے الفاظ کچھ یوں
ہیں۔’’ہم دورانِ نماز آپ صلی اللہ علیہ وآلہ وسلم کے باہر تشریف لانے کی
خوشی میں حیرت زدہ ہو گئے (یعنی نماز کی طرف توجہ نہ رہی)
:: بخاری شریف، 1 : 240، کتاب الجماعة والامامة، رقم : 2648، (2) 1 : 241،
کتاب الجماعة والامامة، رقم : 2649
مسلم شریف، 1 : 315، کتاب الصلوة، رقم : 3419
ابن ماجه شریف، 1 : 519، کتاب الجنائز، رقم : 41664
مسندامام احمد بن حنبل، 3 : 7211،
( ’’تمام صحابہ کرام رضی اللہ عنھم کی توجہ آپ صلی اللہ علیہ وآلہ وسلم کے
حجرہ مبارک کی طرف مرکوز تھی، جب انہوں نے پردے کا سرکنا محسوس کیا تو تمام
نے اپنے چہرے حجرۂ انور کی طرف کر لئے۔ لامع الدراری علی الجامع البخاری، 3
: 150۔گنگوهی)
’’قریب تھا کہ لوگوں میں اضطراب پیدا ہو جاتا، آپ صلی اللہ علیہ وآلہ وسلم
نے اشارہ فرمایا کہ اپنی اپنی جگہ کھڑے رہو۔ (شمائل المحمديه، 1 : 327، رقم
: 386،ترمذی)
صحابہ کرام رضی اللہ عنھم آپ صلی اللہ علیہ وآلہ وسلم کے شفایاب ہونے کی
خوشی کے خیال سے متحرک ہونے کے قریب تھے حتیٰ کہ انہوں نے نماز توڑنے کا
ارادہ کر لیا اور سمجھے کہ شاید ہمارے آقا صلی اللہ علیہ وآلہ وسلم ہمیں
نماز پڑھانے کے لیے باہر تشریف لا رہے ہیں، لہٰذا انہوں نے محراب تک کا
راستہ خالی کرنے کا ارادہ کیا جبکہ بعض صحابہ کرام رضی اللہ عنھم خوشی کی
وجہ سے کودنے لگے۔
:: مواهب اللدنيه علی الشمائل المحمديه : 194
’’مسلمانوں نے نماز ترک کرنے کا ارادہ کر لیا تھا مگر آپ صلی اللہ علیہ
وآلہ وسلم نے انہیں نماز کو پورا کرنے کا حکم دیا۔
:: بخاری شریف،1 : 262، کتاب صفة الصلاة، رقم : 2721 |