پاکستان: متوقع وزیراعظم سے متعلق چند دلچسپ حقائق

پاکستان کے عام انتخابات ہوچکے ہیں اور ان میں واضح برتری پاکستان تحریکِ انصاف نے حاصل کی ہے جس کے بعد اس سیاسی پارٹی کا پاکستان میں حکومت بنانا یقینی ہوگیا ہے- جس کے بعد ممکنہ طور پر پاکستان کے نئے وزیراعظم پاکستان تحریکِ انصاف کے چئیرمین عمران خان ہوں گے- عمران خان نے پاکستان تحریک انصاف کی بنیاد اپریل 1996 میں رکھی اور یہ سیاسی جماعت سال 2013 کے الیکشن میں پاکستان کی دوسری سب سے بڑی سیاسی جماعت بن کر سامنے آئی جبکہ سال 2018 کے الیکشن میں فاتح قرار پائی- یہ تو سب ہی جانتے ہیں کہ عمران خان پاکستان کرکٹ کے عظیم کھلاڑی بھی رہ چکے ہیں اور ان کا شمار دنیا کے بہترین فاسٹ باؤلروں میں کیا جاتا تھا٬ اس کے عمران خان کے اپنی والدہ کے نام پر قائم کیے جانے والے کینسر کے اسپتال سے بھی سب واقف ہیں- لیکن ہم یہاں عمران خان سے متعلق جو دلچسپ حقائق پیش کر رہے ہیں ان کے بارے میں بہت کم لوگ جانتے ہیں-

عمران خان کا مکمل نام عمران احمد خان نیازی ہے اور یہ پنجاب کے شہر لاہور میں 5 اکتوبر 1952 کو پیدا ہوئے- عمران خان کے والد کا نام اکرام اﷲ خان نیازی تھا جبکہ والدہ کا نام شوکت خانم تھا-

عمران خان پشتونوں کے مشہور قبیلے نیازی سے تعلق رکھتے ہیں اور ان کی صرف چار بہنیں ہیں جن کے نام علیمہ خانم٬ رانی خانم٬ روبینہ خانم اور عظمیٰ خانم ہیں-

جنوری 2017 کے اعداد و شمار کے مطابق عمران خان 50 ملین ڈالر سے زائد کے اثاثوں کے مالک ہیں-

عمران خان نے ابتدائی تعلیم لاہور کے ایچیسن کالج سے حاصل کی اور بقیہ تعلیم کے لیے انگلینڈ کے رائل گرامر اسکول کا رخ کیا -

عمران خان نے 1975 میں فلاسفی٬ سیاست اور معیاشیات میں گریجویشن کی- یہ ڈگری انہوں نے آکسفورڈ یونیورسٹی کے Keble کالج سے حاصل کی-

تیز رفتار باؤلر کے طور پر مشہور عمران خان کے کرکٹ کے میدان میں بھی کئی کامیابیاں سمیٹیں- تاہم جب 1987 میں عمران خان نے کرکٹ سے ریٹائرمنٹ کا فیصلہ کیا تو انہیں یہ اپنا فیصلہ اس وقت کے پاکستانی صدر جنرل ضیاﺀ الحق کی درخواست پر تبدیل کرنا پڑا- جس کے بعد پاکستان عمران خان کی کپتانی میں 1992 کا ورلڈ کپ جیتنے میں کامیاب ہوا-

مخلتف برطانوی اور ایشیائی اخبار خصوصی طور پر عمران خان کے میچوں پر کیے جانے والے تبصرے شائع کرتے تھے- ان اخبارات میں Outlook, Guardian, Independent, اور Telegraph شامل تھے-

عمران خان نے متعدد اسپورٹس نیٹ ورک کے لیے کئی کرکٹ میچوں پر کمنٹری بھی کی٬ ان نیٹ ورکس میں اسٹار ٹی وی٬ بی بی سی اردو٬ اور ٹین اسپورٹس بھی شامل تھے-

عمران خان کو پاکستان دوسرے سب سے اعلیٰ ایوارڈ ہلالِ امتیاز سے بھی نوازا جا چکا ہے- اور اس کے علاوہ بھی بین الاقوامی سطح پر عمران خان کئی ایوارڈ حاصل کرچکے ہیں-