چند احادیث پیش خدمت ہیں جن میں
کسی قسم کے اَحکامِ شریعت یا حلال و حرام اور تبلیغ و دعوت یا سیرت وغیرہ
کے کوئی پہلو بیان ہوئے ہیں نہ نبی کریم صلی اللہ علیہ وآلہ وسلم کے خلقِ
عظیم کا کوئی ذکر ہوا ہے بلکہ ان میں تواتر کے ساتھ جو چیزیں بیان ہوئی ہیں
وہ نبی کریم صلی اللہ علیہ وآلہ وسلم کے فضائل و خصائص اور اَولادِ آدم
علیہ السلام میں نبی کریم صلی اللہ علیہ وآلہ وسلم کے مقام و مرتبہ، بے
مثال عظمت و رِفعت اور روحانی مدارج کا ذکر ہے۔ کتبِ اَحادیث میں فضائل و
مناقب کے ذیل میں صرف یہی خاص مضمون بیان ہوئے ہیں اور اَصلاً یہ میلاد
شریف کے مضامین ہیں۔
حضرت ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وآلہ
وسلم کا ارشادِ گرامی ہے۔(روزِ قیامت) میں سب سے پہلا شخص ہوں گا جس کے (باہر
نکلنے کے) لیے زمین کا سینہ کھولا جائے گا، مجھے جنت کی پوشاکوں میں سے ایک
پوشاک پہنائی جائے گی، پھر میں عرشِ الٰہی کے دائیں جانب اُس مقام پر کھڑا
ہوں گا جہاں میرے علاوہ مخلوقات میں سے کوئی ایک (فرد) بھی کھڑا نہیں ہوگا۔
:: ترمذی شریف، کتاب المناقب، باب فی فضل النبی صلی الله عليه وآله وسلم ،
5 : 585، رقم : 3611
حضرت انس بن مالک رضی اللہ عنہ سے روایت ہے کہ حضور نبی کریم صلی اللہ علیہ
وآلہ وسلم نے فرمایا۔ (روزِ قیامت) سب سے پہلے میں (اپنی قبرِ اَنور سے)
نکلوں گا اور جب لوگ وفد بن کر جائیں گے تو میں ہی ان کا قائد ہوں گا۔ اور
جب وہ خاموش ہوں گے تو میں ہی ان کا خطیب ہوں گا۔ میں ہی ان کی شفاعت کرنے
والا ہوں گا جب وہ روک دیئے جائیں گے، اور میں ہی انہیں خوش خبری دینے والا
ہوں جب وہ مایوس ہو جائیں گے۔ بزرگی اور جنت کی چابیاں اُس روز میرے ہاتھ
میں ہوں گی۔ میں اپنے رب کے ہاں اَولادِ آدم میں سب سے زیادہ مکرم ہوں میرے
اِرد گرد اُس روز ہزار خادم پھریں گے گویا وہ (گرد و غبار سے محفوظ) سفید
(خوبصورت) انڈے (یعنی پوشیدہ حسن) ہیں یا بکھرے ہوئے موتی ہیں۔
:: ترمذی شریف، کتاب المناقب، باب فی فضل النبی صلی الله عليه وآله وسلم ،
5 : 585، رقم : 3610
حضرت ابو سعید خدری رضی اللہ عنہ فرماتے ہیں کہ نبی کریم صلی اللہ علیہ
وآلہ وسلم نے فرمایا۔ روزِ قیامت میں تمام اَولادِ آدم کا سردار ہوں گا اور
مجھے اِس پر کوئی فخر نہیں۔ اور اُس روز لواءِ حمد (حمدِ اِلٰہی کا جھنڈا)
میرے ہاتھ میں ہوگا اور مجھے اس پر کوئی فخر نہیں۔ اور اُس روز آدم سمیت
تمام نبی میرے جھنڈے تلے ہوں گے، اور میں سب سے پہلا شخص ہوں گا جس کے
(باہر نکلنے کے) لیے زمین کا سینہ کھولا جائے گا اور اس (اَوّلیت) پر مجھے
فخر نہیں۔
:: مسلم شریف، کتاب الفضائل، باب تفضيل نبيّنا علي جميع الخلائق، 4 : 1782،
رقم : 2278
ترمذی شریف، کتاب المناقب، باب فی فضل النبی صلی الله عليه وآله وسلم ، 5 :
587، رقم : 3615 |