چند مشہور پاکستانی فنکار پرکشش اور جاذبِ نظر کیسے بنے؟

سلِم اور اسمارٹ جسم کے ساتھ لمبا قد ہونا مشہور شخصیات کے لیے ایک مثالی جسم سمجھا جاتا ہے- یہی وجہ ہے کہ زیادہ تر پاکستانی فنکار خود کو اس معیار پر ڈھالنے کی کوشش کرتے دکھائی دیتے ہیں- لیکن ان فنکاروں کو اس کمال کی سطح تک پہنچنے کے لیے کافی وقت اور بےپناہ کاوشیں درکار ہوتی ہیں- ہم یہاں چند ایسے مشہور پاکستانی فنکاروں کا ذکر کر رہے ہیں جنہوں نے اس سلسلے میں بڑی کامیابی حاصل کی ہے- اور ان کی شخصیت میں رونما ہونے والی حیران کن تبدیلیوں نے انہیں بڑی حد تک پرکشش اور جاذبِ نظر بنا دیا ہے-

عروسہ صدیقی
عروسہ صدیقی پاکستان کے کامیڈی ڈراموں کا ایک جانا مانا نام ہے- یہ حقیقی زندگی میں بھی دوستانہ رویہ رکھنے والی اداکارہ ہیں- سال 2016 میں انہوں نے اپنی شادی سے قبل اپنا 20 کلو وزن کم کر کے سب کو حیران کر دیا- عروسہ میں اتنی بڑی پرکشش تبدیلی دیکھ کر اور اس سے متاثر ہو کر کئی دیگر بڑے فنکاروں نے بھی جم جوائن کرنے کی منصوبہ بندی کر لی-

یاسر حسین
یاسر حسین پاکستانی میڈیا انڈسٹری کے تیزی سے ابھرنے والے ستاروں میں سے ایک ہیں- یہ ایک ہی وقت میں اداکار٬ ڈائریکٹر٬ مصنف اور میزبانی کے فرائض بھی انجام دیتے ہیں- لیکن یہ ہمیشہ سے ایسے نہیں تھے- یاسر نے پاکستانی میڈیا انڈسٹری میں قدم رکھنے کے بعد حیرت انگیز حد تک خود کو تبدیل کیا ہے-

ایمن اور منال خان
پاکستانی میڈیا انڈسٹری کی ان جڑواں بہنوں نے قابلِ ذکر حد تک اپنا وزن کم کیا ہے- دونوں جڑواں بہنوں نے اپنے کیریر کا آغاز انتہائی کم عمری میں لیکن وہ اس وقت انہیں کوئی اہم کردار حاصل نہیں ہوا- تاہم اب یہ اکثر ڈراموں میں مرکزی کردار ادا کرتی دکھائی دیتی ہیں-

فاطمہ آفندی
فاطمہ آفندی پاکستانی ڈرامہ انڈسٹری کی مقبول فنکارہ فوزیہ مشتاق کی صاحبزادی ہیں اور پاکستانی ڈراموں کے نوجوان فنکار کنور ارسلان کی اہلیہ ہیں- فاطمہ خود بھی کئی پاکستانی ڈراموں میں اہم کردار ادا کرچکی ہیں اور ایک مقام رکھتی ہیں- انہوں نے بھی اپنا جسمانی وزن 10 کلو گرام تک کم کیا اور نتیجہ آپ کے سامنے ہے-

نتاشہ خالد
انتہائی حیرت انگیز اور پرکشش تبدیلی پاکستانی کی معروف بیوٹیشن نتاشہ خالد میں نظر آئی جس نے سب کو حیران کر دیا- تاہم بعض افراد کا دعویٰ ہے کہ نتاشہ نے اپنا وزن کم کرنے کے لیے سرجری کا سہارا لیا ہے- البتہ نتاشہ انسٹا گرام پر اپنی ایک پوسٹ میں یہ کہہ چکی ہیں کہ یہ سب قدرتی طریقے سے کیا گیا ہے-

فرح شاہ
پاکستانی ڈراموں کی مقبول فنکارہ فرح شاہ بھی ایک وقت میں اضافی جسمانی وزن کی مالک تھی جس کی جھلک ان کے پرانے ڈراموں میں دیکھی جاسکتی ہے- تاہم اس وزن میں انہوں نے قابلِ ذکر حد تک کمی لا کر سب کو حیران کر دیا جس کے بعد وہ مزید جاذبِ نظر اور پرکشش لگنے لگیں-