حضرت یونس علیہ السلام کے مقبرے تلے پوشیدہ محل

شدت پسند تنظیم دولتِ اسلامیہ کے ہاتھوں تباہ ہونے والے ایک تاریخی مقبرے کے نیچے سے کیسے ایک تین ہزار سال پرانا محل دریافت ہوا-

پہاڑی پر مسجد
شمالی عراق کے شہر موصل کی ایک پہاڑی کو نبی حضرت یونس علیہ السلام کی پہاڑی کہا جاتا ہے۔

یہ جگہ صدیوں سے عبادت کا مقام رہی ہے۔ ابتدائی مسیحی دور میں یہاں ایک خانقاہ قائم ہوئی اور پھر 600 بعد اسے حضرت یونس علیہ السلام کے مقبرے میں تبدیل کر دیا گیا۔
 

جولائی 2014 میں اس مقبرے کو شدت پسند تنظیم دولت اسلامیہ نے دھماکے سے اڑا دیا۔

شدت پسندوں کا دعویٰ تھا کہ حضرت یونس علیہ السلام کا یہ مقبرہ عبادت گاہ نہیں بلکہ مشرکین کا اڈہ بن گیا تھا۔

اس مقبرے کی تباہی کی فوٹیج دنیا بھر میں دکھائی گئی۔ پیغام واضح تھا: کوئی بھی مقدس مقام دولت اسلامیہ کی شدت پسندی سے محفوظ نہیں ہے۔

لیکن حضرت یونس علیہ السلام کے مقبرے کی تباہی سے اس تاریخی پہاڑی کی کہانی ختم نہیں ہوئی بلکہ اسے ایک نیا رخ مل گیا۔ تباہی کے بعد یہ سوالات پیدا ہوئے کہ اس کی بنیادوں کی نیچے کیا دفن ہے۔

سنہ 2018 کے موسم بہار میں بی بی سی عربی کی ایک ٹیم ان گردآلود مگر شاندار سرنگوں میں گئی جو اس پہاڑی میں دریافت ہوئی تھیں۔
 

اس ٹیم نے فوٹوگرامیٹری تکنیک کی مدد سے وہاں موجود اشیا کی ہائی ریزولوشن تصاویر اتاریں اور جاننے کی کوشش کی کہ اس تباہی کے نتیجے میں سامنے آنے والے آثار کی حقیقت کیا ہے۔

حضرت یونس علیہ السلام
حضرت یونس علیہ السلام کا نام قرآن اور عبرانی انجیل دونوں میں ملتا ہے۔ ان دونوں الہامی کتابوں کے مطابق حضرت یونس علیہ السلام نے نینوا کا سفر کیا جو کہ اشوریہ سلطنت کا دارالحکومت تھا۔

حضرت یونس علیہ السلام کے اس سفر کا مقصد نینوا کے شہریوں کو خبردار کرنا تھا کہ اگر انھوں نے گناہوں سے توبہ نہ کی تو وہ تباہ ہو جائیں گے۔

بہت سے مسلمانوں کو یقین ہے کہ حضرت یونس علیہ السلام کی ہڈیاں اس مقام پر رکھی گئی تھیں اور بعد میں اس پر مقبرہ تعمیر کیا گیا۔ یہ بھی خیال کیا جاتا ہے کہ یہاں پر اس وہیل مچھلی کا دانت بھی ہے جس کے پیٹ میں روایت کے مطابق حضرت یونس علیہ السلام تین دن تک رہے تھے۔

موصل یونیورسٹی کے آسیرین سٹڈیز کے ڈائریکٹر علی الجبوری کا کہنا ہے کہ ’حضرت یونس علیہ السلام کا مقبرہ ہمیشہ سے ہمارے اہم ترین مذہبی اور ثقافتی مقامات میں شامل رہا ہے‘۔

ان کے مطابق ’جب لوگ اس پہاڑی پر جاتے تھے تو وہ جدید اور قدیم موصل کے بہترین حصوں کو دیکھ پاتے تھے‘۔
 

تباہی
چوبیس جولائی 2014 کو دولت اسلامیہ کے شدت پسندوں نے مسجد کی اندرونی اور بیرونی دیواروں کے ساتھ دھماکہ خیز مواد نصب کیا۔ شدت پسندوں نے نمازیوں سے کہا کہ وہ مسجد سے چلے جائیں اور مقامی آبادی سے کہا گیا کہ وہ عمارت سے کم از کم پانچ سو میٹر دور کھڑے ہوں۔

بٹن دباتے ہی چند لمحوں میں حضرت یونس علیہ السلام کا مقبرہ ملبے کا ڈھیر بن گیا۔ دولت اسلامیہ کے شدت پسندوں نے مسیحیوں کو شہر بدر کر دیا۔ اس کوشش کا مقصد اس کی تاریخ میں پہلی بار صرف ایک مذہب کا شہر بنانے کی تھی۔
 

مقبرے کی تباہی موصل میں مذہبی مقامات اور آثار کی تباہی کی مہم کا حصہ تھی۔

دولت اسلامیہ کے شدت پسندوں نے نینوا شہر کے داخلی دروازے پر موجود لاماسو کے قدیمی مجسمے کو بھی مسخ کر ڈالا۔ یہ مجسمہ قدیم اشوریہ محلات کے باہر بطور محافظ کھڑا ہوتا تھا اور اس کے بعد شدت پسندوں نے اس پورے دروازے کو ہی تباہ کر دیا۔

انھوں نے اس مجسمے کے مسکراتے ہوئے چہرے میں سوراخ کرنے کے لیے مشینی ہتھوڑا استعمال کیا۔
 

دولت اسلامیہ نے حضرت یونس علیہ السلام کے مقبرے کی تباہی کی توجیہ پیش کرنے کی بھی کوشش کی تھی۔ تنظیم کے ایک شدت پسند نے بی بی سی سے بات کرتے ہوئے کہا تھا کہ ’یہ مسیحیوں کے راہب کی قبر تھی اور ایک جعلی مقبرے پر مسجد بنانا منع ہے‘۔

تحقیق سے یہ بات ثابت ہوتی ہے کہ حضرت یونس علیہ السلام واقعی وہاں پر دفن نہیں تھے۔ درحقیقت حضرت یونس علیہ السلام کی قبریں دنیا بھر میں مختلف مقامات پر بتائی جاتی ہیں۔

اوکلاہوما سٹیٹ یونیورسٹی کے اسسٹنٹ پروفیسر اور پندرہویں صدی کے عراق میں عیسائیت کی نامی کتاب کے مصنف ڈاکٹر ٹامس کارلسن کا کہنا ہے کہ ’ازمنہ وسطی میں جب طویل فاصلے تک رابطے ممکن نہیں تھے تو بہت سے مشہور لوگوں کی قبریں مختلف مقامات پر بنا لی گئیں‘۔

درحقیقت وہ ہڈیاں جنھیں حضرت یونس علیہ السلام کی ہڈیاں کہا جاتا ہے ممکنہ طور پر ایک مسیحی پادری حنانی شو اول کی تھیں جن کا تعلق چرچ آف ایسٹ سے تھا۔ انھیں اس خانقاہ میں 701 میں دفن کیا گیا تھا۔

ماہرین آثار قدیمہ یہ نہیں جانتے کہ دھماکے سے ان کی ہڈیاں بچی کہ نہیں تاہم انہیں ایسے نوادرات ملے ہیں جو انسانی آنکھوں سے صدیوں تک اوجھل رہے۔.

مدفن محل
حضرت یونس علیہ السلام کے مقبرے کے نیچے ایک محل بھی دفن ہے جو کہ نہ صرف اشوریہ بادشاہوں کی رہائش گاہ تھا بلکہ فوج کا کیمپ بھی تھا۔ یہ محل ساتویں صدی قبل مسیح کا ہے۔

اس بات کا ثبوت کہ حضرت یونس علیہ السلام کے مقبرے کی نیچے کوئی محل دفن ہو سکتا ہے 1850 میں کھدائیوں کے دوران دو ماہرین آثار قدیمہ آسٹن ہنری لایارڈ اور ان موصل میں پیدا ہونے والے ساتھی ہرمزد رسام نے تلاش کیا تھا۔

دریا کے دوسری جانب کویونجک میں ایک محل کے کھنڈرات ڈھونڈنے کے بعد لایارڈ اور سایام نے اپنی توجہ نبی یونس علیہ السلام کے مقبرے پر مرکوز کی۔

تاہم اس مقام کے تقدس نے انھیں مزید کھدائی سے روک دیا۔ لایارڈ نے لکھا کہ موصل کے لوگوں کے تعصب کی وجہ سے اس مقام کو مزید جاننے کی کوشش ناکام رہی۔

سنہ 1989 اور 1990 کے دوران عراقی حکومت کی جانب سے کی جانے والی کھدائی بھی اس پہاڑی ٹیلے کے زیادہ قریب نہیں گئی کیونکہ خطرہ تھا کہ اس سے مسجد کی بنیادوں کو نقصان پہنچے گا۔ 1850 کی طرح اس مرتبہ پھر امام نے متنبہ کیا کہ مقبرے کو نقصان پہنچ سکتا ہے۔

تاہم جب جنوری 2017 میں موصل دولت اسلامیہ کے چنگل سے آزاد ہوا تو ماہرین آثارِ قدیمہ کو مسجد کے ملبے کے نیچے سے کچھ شاندار چیزیں ملیں۔ وہاں ان سے کہیں زیادہ سرنگیں موجود تھیں جن کا ریکارڈ رکھا گیا تھا۔

درحقیقت وہاں 50 سے زیادہ نئی سرنگیں تھیں۔ ان میں سے کچھ چند میٹر لمبی تھی تو کچھ 20 میٹر تک طویل تھیں۔