جیل کی کوٹھری اور ائمہ اسلام

اسلام کی بقاء اور اسلامی اقدار کے تحفظ کے لئے جیل کی تاریک کوٹھڑیوں میں جانا ائمہ اسلام اور اہل حق کا شیوہ اور طریق رہا ہے۔ تاریخ اسلام کے اوراق سے چند مثالیں یہ ہیں

حضرت امام ابو حنیفہ رح کی زندگی میں ایک وقت ایسا آیا کہ عباسی خلیفہ ابو جعفر منصور نے امام صاحب کو عہدئہ قضا پیش کیا؛ لیکن آپ نے معذرت چاہی تو وہ اپنے مشورہ پر اصرار کرنے لگا؛ چنانچہ آپ نے صراحةً انکار کردیا اور قسم کھالی کہ وہ یہ عہدہ قبول نہیں کرسکتے، جس کی وجہ سے 146 ہجری میں آپ کو قید کردیا گیا۔ امام صاحب کی علمی شہرت کی وجہ سے قید خانہ میں بھی تعلیمی سلسلہ جاری رہا اور امام محمد رح جیسے محدث وفقیہ نے جیل میں ہی امام ابوحنیفہ رح سے تعلیم حاصل کی۔ امام ابوحنیفہ رح کی مقبولیت سے خوفزدہ خلیفہٴ وقت نے امام صاحب رح کو زہر دلوادیا۔ جب امام صاحب رح کو زہر کا اثر محسوس ہوا تو سجدہ کیا اور اسی حالت میں وفات پاگئے۔ تقریباً پچاس ہزار افراد نے نمازِجنازہ پڑھی، بغداد کے خیزران قبرستان میں دفن کیے گئے۔ 375ھ میں اس قبرستان کے قریب ایک بڑی مسجد ”جامعُ الامام الاعظم“ تعمیر کی گئی جو آج بھی موجود ہے۔ امام ابوحنیفہ رح کا نام آج بھی زندہ جاوید ہے جبکہ ظالم حکمران کا نام و نشان ظلم و جور کی مثال بن گیا۔۔۔
۔۔۔۔۔۔۔۔۔
حضرت امام موسی کاظم رضی اللہ عنہ کو یہ امتیاز حاصل ہے کہ وہ سب سے زیادہ عرصہ جیل کی تاریک کوٹھڑیوں میں قید رہے لیکن اصولوں پر سمجھوتہ نہیں کیا اور حکمرانوں کو اسلام کا چہرہ مسخ کرنے پر تنقید کا نشانہ بناتے رہے طویل عرصہ قید کا انجام بھی آپ کی شہادت پر ہوا لیکن آپ نے ظالم اور فاسق حکمرانوں کے سامنے جھکنا قبول نہ کیا۔
۔۔۔۔۔۔
امام احمد بن حنبل
خلیفہ معتصم کی رائے سے اختلاف کی پاداش میں آپ نے کوڑے کھائے لیکن غلط بات کی طرف رجوع نہ کیا۔ آپ کوڑے کھا کھا کر بے ہوش ہو جاتے لیکن غلط بات کی تصدیق سے انکار کر دیتے۔ انہوں نے حق کی پاداش میں جس طرح صعوبتیں اٹھائیں اُس کی بنا پر اتنی ہردلعزیزی پائی کہ وہ لوگوں کے دلوں کے حکمران بن گئے۔ ان کے انتقال کے وقت آٹھ لاکھ سے زیادہ اشخاص بغداد میں جمع ہوئے اور نماز جنازہ پڑھی۔