عمران خان اور صدر ٹرمپ ایک جیسی شخصیات کے مالک ہیں

صدر ٹرمپ سے قریب سمجھے جانے والے امریکی سینیٹر لنڈزی گریم نے کہا ہے کہ عمران خان اور صدر ٹرمپ کی ملاقات ضروری ہے کیوں کہ دونوں ایک جیسی شخصیات کے مالک ہیں اس لیے ان دونوں میں خوب نبھے گی۔
 

پاکستان کے دورے پر آئے ہوئے امریکی سینیٹر نے اتوار کو اسلام آباد میں صحافیوں سے بات کرتے ہوئے کہا کہ صدر ٹرمپ اور عمران خان کی ملاقات ضروری ہے اور یہ کہ 'میں صدر ٹرمپ پر زور ڈالوں گا کہ وہ جلد از جلد عمران خان سے ملیں تاکہ افغانستان کی جنگ کا حل تلاش کیا جا سکے۔'

انھوں نے کہا کہ 'عمران خان کی وجہ سے ہمیں منفرد موقع ملا ہے کہ دونوں ملکوں کے تعلقات کو لین دین کے تعلقات سے بدل کر سٹریٹیجک تعلقات میں بدل دیا جائے۔'

انھوں نے کہا کہ 'یہی مجھ سے عمران خان نے کہا ہے اور میں یہ صدر ٹرمپ کو بتاؤں گا۔'

صدر ٹرمپ کی رپبلکن پارٹی سے تعلق رکھنے والے سینیٹر لنڈزی گریم نے ان خیالات کا اظہار وزیرِ اعظم عمران خان اور وزیرِ خارجہ شاہ محمود قریشی سے ملاقاتوں کے بعد کیا۔

یاد رہے کہ سینیٹر گریم ہی کی پارٹی کے صدر ٹرمپ پاکستان کو شدید تنقید کا نشانہ بناتے رہے ہیں۔ لیکن لنڈزی گریم نے بالکل مختلف رویہ اختیار کرتے ہوئے کہا کہ 'عمران خان تبدیلی کی وہ علامت ہیں جس کی ہمیں تلاش تھی۔'

انھوں نے پاکستان اور امریکہ کے درمیان معاشی تعاون کی بھی بات کی: 'اگر امریکہ اور پاکستان کی معیشتوں میں انضمام (انٹی گریشن) ہو جائے تو یہ دونوں ملکوں کے مفاد میں ہے اور یہ بات پاکستان کے لیے گیم چینجر ثابت ہو گی۔'