پاکستانی فوج کا بھارتی دعوؤں کے حوالے سے بڑا بیان

پاکستانی فوج کے ترجمان میجر جنرل آصف غفور نے کہا ہے کہ ’بار بار جھوٹ بولنے سے سچ نہیں بن جاتا۔‘

’کہتے ہیں کہ ایف 16 گرانے کا ثبوت ہے لیکن سامنے نہیں لاتے۔ پاکستان کا ایف 16 طیارہ گرانے اور ثبوت کی موجودگی کا دعویٰ کرنے کے باوجود انڈین فضائیہ کوئی ثبوت پیش نہیں کر سکی۔‘
 

پاکستانی فوج کے شعبہ تعلقات عامہ کے سربراہ گذشتہ روز انڈین فضائیہ کی جانب سے جاری کیے جانے والی ریڈار تصاویر اور ان سے جڑے دعوؤں کو رد کر رہے تھے۔

پیر کے روز ایک پریس کانفرنس میں انڈین فضائیہ کے ائیر وائس مارشل آر جی وی کپور نے مؤقف اختیار کیا کہ انڈیا کے پاس پاکستانی ایف 16 طیارے کو مار گرانے کے حوالے سے ٹھوس شواہد موجود ہیں، لیکن سکیورٹی خدشات کی بنا پر یہ تفصیلات منظر عام پر نہیں لائی جا رہیں۔
 

اپنی پریس بریفنگ میں ایئر وائس مارشل آر جی وی کپور نے کہا تھا کہ ریڈار سے لی جانے والی تصاویر سے واضح ہے کہ لائن آف کنٹرول کے مغرب میں ونگ کمانڈر ابھینندن ورتمان کا سامنا پاکستان کے ایف 16 جنگی طیارے سے ہوا تھا۔

’دوسری تصویر پاکستان کے ایک ایف 16 طیارے غائب ہونے کے دس سیکنڈ بعد لی گئی تھی۔ پاکستان نے اسی ایف 16 جنگی طیارے کو گنوایا تھا۔‘
 

#WATCH: Air Vice Marshal RGK Kapoor in the radar images shows the location of the shooting down of F-16 of Pakistan Air Force (PAF) by Indian Mig piloted by Wing Commander Abhinandan pic.twitter.com/CPuf2qf0nT

— ANI (@ANI) April 8, 2019

میجر جنرل آصف غفور نے پیر کی شب سماجی رابطوں کی ویب سائٹ ٹوئٹر پر انڈین حکام کو جواب دیتے ہوئے کہا کہ پاکستان نے انڈین فضائیہ کو ہونے والے نقصان پر ڈھول نہیں بجائے۔ ’خاموشی کو نظر انداز نہ کیا جائے۔‘

ترجمان نے کہا: ’حقیقت یہ ہے پاکستانی فضائیہ نے انڈیا کے دو طیارے گرائے جن کا ملبہ زمین پر سب نے دیکھا۔‘
 

Repetitions don’t make truth of a lie. Despite claiming possession of evidence on shooting F16, IAF still short of presenting it. Don’t overlook Pakistan’s silence for not drum beating losses on Indian side. Fact is that PAF shot down two IAF jets, wreckage seen on ground by all.

— Maj Gen Asif Ghafoor (@OfficialDGISPR) April 8, 2019

اس سے پہلے امریکی جریدے فارن پالیسی نے کہا تھا کہ امریکہ کے محکمۂ دفاع کے اہلکاروں نے حال ہی میں پاکستانی ایف 16 طیاروں کی گنتی کی ہے اور وہ تعداد میں پورے ہیں۔

امریکی اہلکار نے فارن پالیسی کو بتایا کہ انڈیا اور پاکستان کے حالیہ تنازعے کی وجہ سے کچھ طیارے معائنے کے لیے فوری طور پر دستیاب نہیں تھے اور اسی وجہ سے تمام طیاروں کی گنتی میں امریکی حکام کو چند ہفتے لگے۔

امریکی عہدیدار کے مطابق اب گنتی مکمل ہو چکی ہے اور 'تمام طیارے موجود تھے اور ان کا معائنہ کر لیا گیا ہے۔'

امریکی حکام کی جانب سے یہ بیان اس انڈین اس دعوے کے منافی ہے جس میں انڈین فضائیہ نے کہا تھا کہ انھوں نے فروری میں ہونے والی جھڑپ کے دوران ایک پاکستانی ایف 16 طیارہ مار گرایا تھا۔

انڈین فضائیہ کے حکام نے اس فضائی جھڑپ سے متعلق بیانات میں کہا تھا کہ پاکستانی طیاروں کا نشانہ بننے والے انڈین پائلٹ ونگ کمانڈر ابھینندن ورتھمان نے اپنا طیارہ گرنے سے قبل پاکستان کا ایک ایف 16 طیارہ مار گرایا تھا۔

پاکستان نے اس دعوے کو متعدد بار مسترد کیا تھا۔
 

جمعے کو پاکستانی فوج کے شعبۂ تعلقاتِ عامہ کے سربراہ کی جانب سے امریکی جریدے کی رپورٹ پر تبصرہ کرتے ہوئے کہا گیا تھا کہ 'یہی پاکستان کا مؤقف بھی رہا ہے اور یہی سچ ہے۔'

میجر جنرل آصف غفور کا کہنا تھا کہ 'انڈیا کی جانب سے حملے اور اس کے اثرات کے بارے میں بھی دعوے جھوٹے ہیں اور وقت آ گیا ہے کہ انڈیا اپنی طرف ہونے والے نقصان بشمول پاکستان کے ہاتھوں اپنے دوسرے طیارے کی تباہی کے بارے میں سچ بولے۔'