کوئٹہ میں ’پرانی اشیا‘ کی انوکھی نمائش

پاکستان کے بڑے شہروں میں وقتاً فوقتا ًکسی نہ کسی حوالے نمائشوں کا انعقاد ہوتا رہتا ہے مگر بلوچستان کے دارالحکومت کوئٹہ میں ایک ایسی نمائش کا انعقاد کیا گیا ہے جو کئی لحاظ سے منفرد تھی۔

یہ دو روزہ نمائش پرانی اشیا کی تھی جسے کسی سرکاری ادارے یا غیر سرکاری تنظیم نے نہیں بلکہ پرانی اشیا سے محبت کرنے والے افراد اور ان کی خرید و فروخت کرنے والے دکانداروں نے منعقد کیا تھا۔
 

کوئٹہ شہر میں منعقد ہونے والی یہ نمائش اس حوالے سے بھی منفرد تھی کہ اس کا انعقاد کسی بڑے ہوٹل یا کسی مخصوص جگہ پر نہیں بلکہ ایک شاپنگ پلازہ میں کرایا گیا تھا۔

اس نمائش میں پیش کی جانے والی نمایاں اشیا میں پرانے زمانے میں کھانے پینے کے لیے استعمال ہونے والے برتن، زیورات، ڈیکوریشن کی اشیا اور قیمتی پتھر شامل تھے۔
 

اس نمائش کے ایک منتظم محمد زمان نے بتایا کہ لوگوں میں پرانی اشیا کے حوالے سے شعور نہیں جس کی وجہ سے وہ ان کی قدر و قیمت نہیں جانتے۔

’نمائش کا مقصد لوگوں میں یہ شعور اجاگر کرنا ہے کہ پرانی اشیا قیمتی ہیں، اس لیے وہ ان کی حفاظت کریں۔‘
 

زمان کے مطابق اس نمائش میں رکھی گئی متعدد اشیا سو سال سے زیادہ پرانی ہیں۔
 

بلوچستان تین تہذیبوں بدھ مت، گندھارا اور اسلامی تہذیب کا سنگم رہا ہے جس کے باعث قدیم اشیا اور آثار قدیمہ کے حوالے سے اس کا شمار دنیا کے امیر ترین علاقوں ہوتا ہے۔

نمائش کے منتظم مصدق صدیق کا دعویٰ ہے کہ بلوچستان کی آثار قدیمہ میں سے بہت ساری اشیا کو چوری یا سمگل کیا جاتا ہے۔
 

ان کا کہنا تھا کہ اگر ان اشیا کی صحیح مارکیٹنگ کی جائے تو ان کی چوری اور سمگلنگ کا راستہ بند ہو جائے گا۔

مصدق صدیق نے بتایا کہ بلوچستان جہاں آثار قدیمہ سے مالا مال ہے وہاں قیمتی پتھر بھی یہاں بڑے پیمانے پر پائے جاتے ہیں۔
 

نمائش میں دلچسپی کا مرکز بروکائٹ نامی قیمتی پتھر تھا۔ یہ پتھر بلوچستان کے ضلع خاران میں پایا جاتا ہے اور خوبصورتی کی وجہ سے دنیا میں اس پتھر کو بہت زیادہ پسند کیا جاتا ہے۔