میرا شوہر لاجواب ہے ۔۔۔ ایسی اداکارائیں جن کی کامیابی کا سہرا ان کے شوہر کے سر ہے

جس طرح ایک مرد کی کامیابی کے پیچھے ایک عورت کا ہاتھ ہوتا ہے اسی طرح کامیاب عورت بھی اپنے مرد کے تعاون اور اعتماد کے بغیر کامیابی حاصل نہیں کر سکتی ہے ۔ ہماری شوبز سے جڑی بہت ساری اداکارائیں ایسی ہیں جن کے کیرئير کو شادی کے بعد ان کے شوہروں کے تعاون اور اعتماد کے ساتھ کامیابی ملی آج ہم آپ کو ایسی ہی اداکاراؤں کے بارے میں بتائيں گے-

عائزہ خان کے شوہر دانش تیمور
ڈرامہ میرے پاس تم ہو کی مہوش اور حقیقی زندگی کی عائزہ خان شادی سے قبل بھی شوبز سے وابستہ تھیں ۔ جب ان کی شادی دانش تیمور سے ہوئی تو لوگوں کو یہ محسوس ہوا کہ شائد شادی کے بعد وہ اپنا ایکٹنگ کیرئير جاری نہیں رکھ سکیں گی- اور لوگوں کے ان خدشات میں اس وقت مزيد اضافہ ہو گیا جب کہ شادی کے پہلے ہی سال وہ امید سے ہو گئيں اور انہوں نے اداکاری میں گیپ دیا- مگر بچے کی پیدائش کے کچھ ہی عرصے بعد عائزہ خان پہلے سے بھی زیادہ اسٹائلش ہو کر شوبز میں واپس آئيں اور اداکاری اور ماڈلنگ میں اتنا کام کیا جس نے ان کی شہرت کو آسمان تک پہنچا دیا- اس حوالے سے عائزہ خان کا یہ بھی کہنا ہے کہ ان کے لیے سب سے اہم ان کی فیملی ہے اور وہ اپنے شوہر کے تعاون کے بغیر یہ سب نہیں کر سکتی تھیں- اس کے لیے وہ دانش کی شکر گزار ہیں اپنی اس محبت کا اظہار وہ وقتاً فوقتاً اپنے سوشل میڈيا اکاؤنٹ سے بھی کرتی رہتی ہیں-

زارا نور عباس کے شوہر اسد صدیقی
مشہور اداکارہ اسما عباس کی بیٹی زارا نور کی زندگی میں اداکاری کے میدان میں کامیابی حاصل کرنے کے لیے ایک ٹریجڈی ان کی پہلی شادی تھی جو کہ انہوں نے اداکاری کی اجازت کے خیال سے کی مگر وہ بری طرح ناکام ہوئی ۔ اس کے بعد ان کی زندگی میں اسد صدیقی آئے جنہوں نے زارا کو نہ صرف شوبز میں کام کرنے کی مکمل اجازت دی بلکہ اپنی محبت کے ساتھ ہر ہر موقع پر ان کے ساتھ کھڑے نظر آئے جس نے زارا نور عباس کے اعتماد میں بہت اضافہ کیا اور وہ شادی کے بعد پہلے سے زیادہ کامیاب نطر آئيں-

ندا یاسر کے شوہر یاسر نواز
مشہور ہدایت کار کاظم پاشا کی بیٹی ندا یاسر نے شادی سے قبل اداکاری کے میدان میں نہ صرف اپنی صلاحیتوں کا لوہا منوایا بلکہ کافی شہرت بھی حاصل کی- مگر اپنے کیرئير کے عروج پر انہوں نے یاسر نواز سے شادی کا فیصلہ کر لیا اور اس کے نتیجے میں شوبز کو خیر آباد کہہ دیا اور اپنی پوری توجہ اپنے گھر اور شوہر کو دی، ایک طویل غیر حاضری کے بعد انہوں نے ایک نجی چینل میں صبح کے شو کی میزبانی سے دوبارہ سے شوبز میں قدم رکھا ۔ ان کی صلاحیتوں نے یہاں پر بھی ان کو تنہا نہ چھوڑا اور انہوں نے اس شعبے میں بھی خود کو منایا ۔ اب جب کہ وہ مستقل طور پر صبح کے شو کے میزبان کے طور پر ہر روز اسکرین پر نظر آتی ہیں تو اس حوالے سے ان کا یہ ماننا ہے کہ یہ کامیابی ان کے شوہر کے تعاون کے بغیر ممکن نہ تھی- تاہم اب بھی وہ اداکاری کو وقت نہیں دے رہی ہیں اس حوالے سے ان کا کہنا یہ ہے کہ اداکاری کل وقتی کام ہے جس سے ان کا گھر اور فیملی متاثر ہوتی ہے اس لیے وہ میزبانی پر ہی خوش ہیں-

حرا مانی کے شوہر سلمان مانی
حرا مانی نے شوبز میں قدم شادی کے بعد رکھا اس وقت تک مانی اپنے آپ کو منوا چکے تھے- مگر انہوں نے اپنی کامیابی کے ساتھ ساتھ اپنی بیوی کی صلاحیتوں کو دیکھتے ہوئے ان کی حوصلہ افزائی کی اور ان کے کیرئير کو بھی اپنے ساتھ ساتھ بڑھایا ۔ جس کے نتیجے میں گزشتہ کچھ سالوں سے حرا مانی کی کامیابیوں اور مقبولیت کا گراف مستقل طور پر اوپر ہی جا رہا ہے۔ حرا مانی کا یہ ماننا ہے کہ وہ آج جو کچھ بھی ہیں اس کا سبب صرف اور صرف ان کے شوہر مانی ہیں جن کی حوصلہ افزائی نے ان کو اعتماد بخشا اور کام کرنے کا حوصلہ دیا-

صنم جنگ کے شوہر سید عبدل قاسم جعفری
صنم جنگ کے شوہر کا تعلق اگرچہ شوبز سے نہیں ہے شادی سے قبل وہ اداکاری کے ساتھ ساتھ شو کی میزبانی بھی کر رہی تھیں- مگر شادی کے بعد انہوں نے شوبز کو خیر آباد کہہ دیا اور بیٹی کی پیدائش کے بعد شدید ترین پوسٹ پارٹم ڈپریشن کا شکار ہو گئیں- ایسے وقت میں ان کے شوہر نے ان کا بہت ساتھ دیا اور ان کو دوبارہ سے کام کرنے کا مشورہ دیا ۔ شوہر سے ملنے والے اعتماد کے سبب انہوں نے ایک بار پھر اداکاری اور شو کی میزبانی شروع کی جس کے سبب نہ صرف ان کی نفسیاتی حالت میں بہتری آئی بلکہ اس کے ساتھ ساتھ ان کے اعتماد میں بھی اضافہ ہوا اس بات کا ذکر وہ اکثر اپنے شو کی میزبانی کے دوران بھی کرتی ہیں کہ کس طرح ان کے شوہر نے ان دنوں ان کو سپورٹ کیا اور ان کو دوبارہ سے کام کی جانب راغب کر کے ان کی جان ان نفسیاتی مسائل سے چھڑوائی-