میں یہ سب دکھاوے کے لئے نہیں کر رہی۔۔۔شوبز ستارے جو فلاحی کاموں میں آگے آگے ہیں

پاکستان میں جب بھی مشکل وقت آتا ہے تو عام عوام کے ساتھ ساتھ سب سے پہلے جو لوگ اپنا کندھا پیش کرتے ہیں وہ شوبز ستارے ہوتے ہیں۔۔۔فہد مصطفیٰ نے بھی وزیر اعظم عمران خان سے کرونا فنڈ ریزنگ شو کے دوران یہ کہا کہ آپ اگر ایک بار ان لوگوں کو بھی حوصلہ دیں گے جو شوبز سے تعلق رکھتے ہیں تو ان کی ہمت اور بڑھے گی اور اس پر وزیر اعظم عمران خان نے کہا کہ شوکت خانم میموریل ہسپتال کبھی نا بنتا اگر اسکول اور کالج کے بچے اور شوبز ستارے میرا ساتھ نہیں دیتے۔۔۔جن میں نصرت فتح علی خان اور دلدار پرویز بھٹی کے نام بھی لئے۔۔۔آج کرونا کی اس آفت میں بھی جو لوگ بھوک سے بے حال ہیں ان کے لئے ایک بار پھر شوبز ستاروں نے اپنا قدم اٹھایا ہے اور دیکھتے ہیں کہ کون کس طرح یہ فلاحی کام کر رہا ہے-

مایا علی
فلمز، ٹی وی اور میزبانی سے دلوں پر راج کرنے والی بظاہر نازک دکھنے والی مایا علی آج کل بڑے بڑے پہلوانوں سے بھی وزنی اور ہمت سے بھرپور کام کر رہی ہیں۔۔۔ اپنے گھر سے راشن بانٹنے کا آغاز کیا اور پھر لوگوں کی سفید پوشی کا بھرم رکھنے میں اپنا قدم اور آگے بڑھایا۔۔۔ان کا راشن دیکھ کر ایسا لگ رہا تھا جیسے انہوں نے دل سے اپنے گھر کے لئے مہینے کا سامان منگوایا ہو۔۔۔ہر ضرورت کی چیز اس راشن کا حصہ ہے اور لوگوں کے منفی کمینٹس پر وہ کافی دلبرداشتہ ہوئیں لیکن اپنا راستہ نہیں چھوڑا اور ایک ویڈیو میں روتے ہوئے انہوں نے بتایا کہ لوگ کس قدر تکلیف میں ہیں اور ہمیں ان کا سہارا بننا ہوگا

حرا مانی
امریکہ میں کرونا کا مذاق اڑانے پر حرا مانی کافی تنقید کا نشانہ بنیں۔۔۔اپنی اس حرکت پر شرمندگی کا اظہار انہوں نے کچھ اس طرح کیا کہ فلاحی کاموں میں بڑھ چڑھ کر اپنا حصہ ڈال لیا اور یہ بھی کہا کہ میں یہ سب دکھاوے کے لئے نہیں کر رہی۔۔۔انہوں نے ایک اکاؤنٹ بھی بنایا جس میں وہ ان لوگوں سے پیسے لے رہی ہیں جو راشن بیگز میں اپنا حصہ ڈالنا چاہتے ہیں۔۔۔وہ اور ان کے شوہر اپنے گھر کے صحن میں ان بیگز کو بھرنے اور پھر ضرورتمند گھروں تک پہنچانے میں مگن ہیں-

انوشے اشرف اور نومی انصاری
انوشے اشرف اور نومی انصاری نے بھی اس مشکل حالات میں قدم بڑھایا اور چالیس راشن بیگز سے شروع ہونے والی اس کوشش میں اب ایک ہزار راشن بیگز ہو چکے ہیں۔۔ ان کا کہنا ہے کہ یہ سب کچھ ہمارے ساتھ ساتھ اور لوگوں کی مدد سے بھی ممکن ہوا۔۔۔ہم سب کو قدم بڑھانے کی ضرورت ہے اور عزت نفس کو دھیان میں رکھتے ہوئے شفاف انداز میں یہ راشن ضرورت مند تک پہچانے کی ضرورت ہے-

علی ظفر
گلوکار اور اداکار علی ظفر ہر مشکل وقت میں اپنا حصہ ضرور ڈالتے ہیں اور اس وقت بھی وہ پچاس خاندانوں کو تو راشن بیگز فراہم کر چکے ہیں لیکن ساتھ ہی وہ دیہاڑی دار طبقے کے لئے بیس لاکھ کا عطیہ بھی کر چکے ہیں۔۔۔ان کا کہنا ہے کہ یہ صرف اس لئے بتایا جاتا ہے تاکہ لوگ آگے بڑھیں اور ہمت پکڑیں اپنا حصہ ڈالنے کی-

اقرار الحسن
اینکر اقرار الحسن روزانہ مستحقین تک راشن بیگز خود پہنچا رہے ہیں اور اپنی ایک ٹیم بنا چکے ہیں جو باقاعدہ ان لوگوں تک پہنچ رہی ہے جو سفید پوش ہیں اور جن کا ذریعہ معاش اس وقت بالکل ختم ہو چکا ہے۔۔۔

شاہد آفریدی
شاہد آفریدی نے شوکت خانم ہسپتال میں بھی اپنا حصہ ڈالا اور آج بھی وہ اس مشکل گھڑی میں حکومت اور عوام کے ساتھ ہیں۔۔۔سات دن سے وہ مسلسل کراچی کے مختلف علاقوں میں راشن کی فراہمی کا کام کر رہے ہیں اور وہ اس میں ایم این اے مونس الہی کو اپنا ساتھی مانتے ہیں جو ان کے ساتھ سرگرم ہیں۔۔۔انہوں نے روہڑی گوٹھ اور بھینس کالونی جیسے علاقوں میں بھی راشن پہنچوایا-

فیروز خان
حال ہی میں شوبز سے علیحدگی اک اعلان کرنے والے فیروز خان بھی اس وقت مصروف ہیں اپنا حصہ ڈالنے میں اور پندرہ سو راشن بیگز وہ مستحقین کو فراہم کر چکے ہیں-