ان کے لئے فنکاروں نے چندہ بھی جمع کیا لیکن زندگی نے وفا نہیں کی۔۔۔ستارے جو بجھ گئے

پاکستانی ٹیلی ویژن کی تاریخ میں ایسے کئی نام گزرے ہیں جنہوں نے شاید کام اتنا نہیں کیا لیکن ان کی باصلاحیت اداکاری اور فنکاری نے انہیں ہمیشہ کے لئے امر کردیا۔۔۔زندگی میں ایسے کئی مقام آئے جب انہیں مدد کی ضرورت پڑی لیکن کبھی زندگی نے وفا نہیں کی اور کبھی حالات نے

طاہرہ نقوی
پاکستانی ٹیلیویژ ن کا ایک ایسا ستارہ جو اپنی سنجیدہ اداکاری کے باعث روحی بانو کے بعد ایک بڑا نام تھیں۔۔۔جن کی فنکارانہ صلاحیتوں نے سب کو ہی حیران کردیا تھا۔۔۔وہ کردار ثانوی بھی کرتی لیکن اسے بڑا کردیتیں۔۔۔انہوں نے فلم انڈسٹری میں بھی قدم رکھا لیکن انہیں وہاں مزہ نہیں آیا اور ٹیلی ویژن میں انہوں نے جم کر اپنی صلاحیتوں کا لوہا منوایا۔۔۔بہت کم عمری میں ہی انہیں کینسر جیسا روگ لگ گیا۔۔۔طاہرہ نقوی کے لئے یہ دور آسان نہیں تھا۔۔۔ساتھی فنکاروں نے ان کے علاج کے لئے چندہ بھی جمع کیا۔۔۔حکومت سے درخواست بھی کی کہ ان کا علاج ملک سے باہر کروایا جائے لیکن وہ یہ جنگ لڑتی لڑتی دنیا سے چلی گئیں ۔۔۔ان کے ڈراموں کو آج تک لوگ پسند کرتے ہیں لیکن افسوس کوئی یہ نہیں جانتا کہ یہ قیمتی اثاثہ کتنی جلدی دنیا سے چلا گیا

آسیہ بیگم
پاکستانی فلم انڈسٹری کا ایک بہت بڑا نام آسیہ بیگم جنہوں نے ’’انسان اور آدمی‘‘ سے اپنے فلمی کیرئیر کا آغاز کیا اور پہلی ہی فلم سپر ہٹ ہوگئی۔۔۔وہ سپر اسٹار بن گئیں اور اسی سال چھے فلموں میں کام کیا اور ان میں سے ایک اور سپر ہٹ ہوگئی۔۔۔پھر ایک دور ایسا آیا جب کامیاب فلموں کے لئے صرف آسیہ بیگم کا نام ہی جانا جاتا۔۔۔فلم دو رنگیلے، وحشی جٹ، مولا جٹ، عمراؤ جان ادا جیسی سہر ہٹ فلموں میں انہوں نے ایسا شاندار کام کیا کہ لوگ ان کے گرویدہ ہوگئے۔۔۔وہ اپنے کیرئیر کے عروج پر تھیں جب انہوں نے ایک بزنس مین سے شادی کی اور فلم انڈسٹری کو خیر آباد کہہ دیا۔۔۔اور کینیڈا چلی گئیں۔۔۔۲۰۱۱ تک ان کی کوئی خبر کسی کو نا تھی۔۔۔پھر وہ شدید بیماری میں پاکستان آئیں اور واپس کینیڈا چلی گئیں۔۔۔دو سال بعد ان کا انتقال ہوگیا۔۔۔ان کے چار بچے ہیں۔۔۔انہوں نے جس طرح فلم انڈسٹری پر راج کیا، ان کا جانا اتنی ہی خاموشی سے ہوا۔۔۔وہ چاہتی بھی نہیں تھیں کہ انہیں واپس انڈسٹری میں بلایا جائے اسی لئے انہوں نے اپنا آنا بھی لوگوں کے سامنے ظاہر نہیں کیا تھا۔۔۔لیکن کوئی ان کے کام کو نہیں بھولا تھا۔۔۔