صرف ایک تصویر نے اس بچی کو راتوں رات شہرت کے آسمان پر کیسے پہنچا دیا؟

ہر انسان کی خواہش ہوتی ہے کہ اس کو دنیا بھر میں پہچانا جائے اس کے لیے وہ ہر قسم کے جتن کرنے کو تیار ہو جاتا ہے دن رات محنت کرتا ہے ایسےانوکھے کام کرتا ہے کہ دنیا کے لوگوں کو اپنی جانب متوجہ کر سکے- مگر بعض لوگوں کے نصیب میں یہ شہرت ایک انعام کی طرح ان کی جھولی میں آکر گر جاتی ہے اور اس کے لیے انہیں ہاتھ بھی ہلانے کی زحمت نہیں کرنی پڑتی ہے ایسی ہی ایک لڑکی آمنہ ایپنڈیوا بھی ہیں-

آمنہ کا تعلق روس کے علاقے چیچنیا سے ہے اور اس کی عمر صرف گیارہ سال ہے مگر اس بچی نے ان دنوں پورے روس کو اپنی لپیٹ میں لے رکھا ہے- اس بچی کی شہرت کا آغاز اب سے پانچ ماہ قبل اس وقت ہوا جب کہ ایک پروفیشنل فوٹو گرافر امینہ ارساکوا نے آمنہ کی تصویر اپنے سوشل میڈیا اکاونٹ سے شئير کرتے ہوئے اس کو آسمانی حسن قرار دیا-

اس وقت سے اب تک اس تصویر کو ہزارہا لوگوں نے شئیر کیا اس بچی کی تصویر کی خاص بات اس کا بے پناہ سفید رنگ اور اس کے ساتھ ساتھ اس کے سنہری اور سفیدی کے امتزاج والے بال ہیں- اس کی ایک آنکھ براؤن جب کہ دوسری آنکھ نیلے رنگ کی ہے- اس بچی کی معصومانہ خوبصورتی کو دیکھتے ہوئے کچھ لوگوں نے اس کو فوٹو شاپ قرار دیا جس کے جواب میں امینہ کا یہ کہنا تھا کہ اس تصویر میں کسی بھی قسم کی فوٹو شاپ نہیں کی گئی ہے-
 

درحقیقت یہ بچی دو ایسی وراثتی بیماریوں کا شکار ہے جو کہ بیک وقت ایک فرد میں اس سے قبل کبھی بھی نہیں دیکھی گئی ہیں- اس بچی کو پہلی بیماری البینزم یا سورج مکھی کی بیماری ہے جس میں انسان کی جلد کے پگمنٹ بالکل ختم ہو جاتے ہیں اور اس کی رنگت شفاف سفید رنگ میں تبدیل ہو جاتی ہے- اس کے ساتھ ساتھ جسم پر موجود ہر ہر بال بھی پگمنٹ کے ختم ہونے کے سبب سفیدی نما سنہرے رنگ میں تبدیل ہو جاتا ہے اور اس بیماری نے آمنہ کو فرشتوں جیسی شکل دے ڈالی ہے-

اس کے علاوہ آمنہ ہیٹروکورمیا میں بھی مبتلا ہے جس میں انسان کی دونوں آنکھوں کا رنگ ایک دوسرے سے مختلف ہوتا ہے اسی وجہ سے ان کی ایک آنکھ نیلی اور ایک براؤن ہے- اگرچہ اس وقت سوشل میڈیا پر آمنہ کی تصاویر ایک طوفان کی طرح شئير کی جا رہی ہیں مگر اس کی ذاتی زندگی صیغہ راز ہے جس سے یہ ثابت ہوتا ہے کہ آمنہ کے والدین اپنی شناخت کو ظاہر کرنے کے خواہشمند نہیں ہیں-