زبان کو جلتے لوہے پر تین دفعہ پھیر کر جھوٹ اور سچ کا فیصلہ کرنے والی مصری عدالت کے بارے میں جانیں

ہر معاشرے میں سچ کو درست اور جھوٹ کو گناہ تصور کیا جاتا ہے اور اس جھوٹ کی اس کی نوعیت کے حوالے سے کوئی نہ کوئی سزا مقرر ہوتی ہے- اس کے ساتھ ساتھ جھوٹ ثابت ہونے کے بعد جھوٹا انسان نہ صرف اپنی قدر و منزلت کھو بیٹھتا ہے بلکہ اس کا اعتبار بھی ختم ہو جاتا ہے ۔جھوٹ کے بارے میں جاننے کے لیے عام طور پر عدالتیں حلف لیتی ہیں تاکہ انسان اپی صوابدید پر سچ بول دے- مگر اکثر لوگ حلف کے باوجود بھی جھوٹ بولتے ہیں اور ان کو پکڑا نہیں جا سکتا ہے-

مگر دنیا کا ایک ملک ایسا بھی ہے جہاں ایک ایسی عدالت موجود ہے جو جھوٹ اور سچ کا فیصلہ منٹوں میں کر لیتی ہے- ملک مصر کے اندر بشع نامی ایک عدالت موجود ہے جو کہ ایک روائتی عدالت ہے اور اس کا استعمال صحراؤں میں رہنے والے بدو کرتے ہیں جو کہ صدیوں سے آگ کے ذریعے جھوٹے اور سچے کا فیصلہ کرتی ہے-
 

موجودہ دور میں اس عدالت کے جج کے فرائض اویمئير ادا کر رہے ہیں جن کی چودہ پشتیں اس عدالت کے جج کے فرائض انجام دے چکی ہیں اور ان کو بھی ان کے والد نے مرنے سے قبل سورۃ الفاتحہ پڑھنے کے بعد اپنی گدی پر بٹھایا تھا-

بشع کے طریقہ کار کے مطابق جھوثے اور سچے کا فیصلہ آگ میں سرخ کی گئی ایک پلیٹ پر تین بار زبان پھیرنے سے ہوتا ہے- اس موقع پر اویمئير کے مطابق ان کے پاس ایک عورت کا کیس آیا جس کے شوہر کو اس پر شک تھا کہ اس نے اس کے دو سو ڈالر چوری کیے ہیں مگر جب بشع کی عدالت میں مقدمہ پیش کیا گیا تو اس عورت نے لوہے کی گرم پلیٹ پر تین بار زبان پھیری مگر چونکہ وہ سچی تھی اس وجہ سے اس کی زبان کو کسی بھی قسم کا نقصان نہیں پہنچا اور اس کو بری کر دیا گیا-
 

جرم ثابت ہونے پر بشع کی عدالت کے پاس اس بات کا بھی حق موجود ہے کہ وہ لوگوں پر جرمانے بھی عائد کر سکے- تاہم بشع عدالت کی مصر کے آئین میں کہیں گنجائش موجود نہیں ہے اور حکومت اس پر پابندی عائد کر چکی ہے- اس کے باوجود فوری انصاف کے حصول کے خواہشمند اس طریقہ انصاف کا استعمال کرتے ہیں-