عظمیٰ خان کیس اور ڈرامہ’’ میرے پاس تم ہو ‘‘ کی کہانی۔۔۔شوبز ستاروں میں کون ہے عظمیٰ کے ساتھ اور کون ہے خلاف

حالیہ دنوں میں فلمسٹار عظمیٰ خان پر تشدد کیس نے ٹرینڈنگ پر حکومت کی اور دو طرح کی رائے سامنے آئیں ایک وہ جن کی نظر میں عظمیٰ خان گھر کو توڑنے والی ایک ایسی عورت تھی جسے یہ سزا ملنا بالکل صحیح تھا۔۔۔اور دوسری رائے میں عظمی خان وہ مظلوم لڑکی ہے جس پر گھر میں گھس کر تشدد کیا گیا اور قانون کو ہاتھ میں لے کر اس پر ظلم کے پہاڑ توڑے گئے۔۔۔لیکن شوبز ستاروں میں بھی ان دو رائے کا بٹوارہ ہوا۔۔۔کچھ کو لگا کہ صحیح ہوا اورکچھ کو لگا کہ یہ بہت ہی غلط تھا۔۔۔بہت سارے لوگوں کا ماننا تھا کہ ڈرامہ ’’میرے پاس تم ہو ‘‘ میں مہوش پیسے کی خاطر شہوار کے ساتھ رہنے لگی اور جب شہوار کی بیوی نے آکر مہوش کو تھپڑ مارا تو سب خوش ہوئے کہ اچھا ہوا۔۔۔پھر جب عظمیٰ خان کی پٹائی ہوئی تو سب کو برا کیوں لگ رہا ہے۔۔۔

زینب قیوم
زینب قیوم یعنی زی کیو نے اس واقعے میں قصور وار عظمیٰ خان کو ہی قرار دیا۔۔۔ان کا ماننا ہے کہ اس ویڈیو میں جو بھی ہوا وہ غلط تھا یا صحیح یہ تو نہیں پتہ لیکن سب سے پہلے اس گھر میں جو بھی ہوا وہ حلال تھا یا حرام۔۔۔انہوں نے اپنی پوسٹ میں لکھا کہ ﷲ بہترین منصف ہے اور سب سے پہلے تو یہ دیکھنا ہے کہ ہمیں کب حلال اور حرام میں فرق پتہ چلے گا، باقی باتیں تو بعد کی ہیں۔۔۔ان کی اس پوسٹ کو عظمیٰ خان کے سپورٹرز کے سامنے ایک بہت بڑی ٹکر کہا جائے تو غلط نہیں ہوگا۔۔۔

ارمینہ رانا خان
ارمینہ رانا خان نے اس واقعے کی شدید مذمت کرتے ہوئے ٹوئٹ کیا کہ ریلیشن شپ ایک پرائیوٹ چیز ہے اور قانون ایک پبلک چیز ہے۔۔۔کسی کے پرائیوٹ گھر میں بلا اجازت مسلح افراد کے ساتھ گھس کر تشدد کرنا اور ان لوگوں پر جو نہتے ہیں۔۔۔سراسر نا انصافی ہے اور میں عظمیٰ خان کے ساتھ ہوں۔۔۔

رافعہ رفیق
میزبان رافعہ رفیق نے اپنے فیس بک پر عظمیٰ خان کو سخت تنقید کا نشانہ بنایا اور کہا کہ وہ تمام ْخواتین جو کسی شادی شدہ مرد کی زندگی میں داخل ہوتی ہیں سب کچھ جانتے ہوئے بھی ان کے ساتھ ہمدردی نہیں کی جاسکتی۔۔۔اگر اتنا ہی صحیح ہیں تو چھپ کر کیوں ملتے ہیں۔۔۔عثمان ملک جیسے مرد اپنی بیویوں کو اعتماد میں لے کر کیوں نہیں ملتے ایسی عورتوں سے۔۔۔یقیناً ایسی خواتین کی حمایت میں بولنا بالکل غلط ہے۔۔۔

عثمان خالد بٹ
عثمان خالد بٹ نے اس واقعے پر غم اور غصے کا اظہار کیا اور ان کی نظر میں قانون کو ہاتھ میں لے کر کسی کے گھر پر دھاوا بولنا سراسر نا انصافی ہے اور قانون کی خلاف ورزی کرنے والوں کے خلاف ایکشن ہونا چاہئے-