|
اک انسان جیڑا اپنے آپ وچ ڈوبیا رہندا اے تے ویلا بیٹھا دل ای دل وچ سوچاں سوچدا رہندا اے کہ اس دے کول گڈی, بنگلہ, کوٹھی, کار, روپیہ پیسہ, زر, دینار تے دولت دا ڈھگ لگا ہویا اے. اوہ دنیا توں بے خبر انّاں اسائشاں نوں ای سوچی رکھدا اے تے اپنے آپ وچ خیالی پلاؤ بنا بنا کے آپ ہی کھادی رکھدا اے اسے وجہ توں اوہ بندہ اپنی زندگی دے میدان وچ اوناں بلندیاں نوں حاصل نئیں کر سکدا جنّا نوں اوہ اپنیاں سوچاں دے وچ سوچدا رہندا اے تے اوناں نوں حاصل کرن دی چاہ وی رکھدا اے. پڑھے لکھے لوکاں دی زبان وچ اس سوچ نوں رتی سوچ دا ناں دتا جاندا اے. تے انسانی دماغ وچ اک دن وچ ان گنت سوچاں تے خیال آندے نے اسے وجہ توں اس انسانی دماغ نوں منکی مائنڈ یعنی تیز ترّار تے چلاک وی آکھیا جاندا اے. دماغ وچ آن والیاں ایناں سوچاں وچ وی فیصد سوچاں مثبت ہوندیاں نے تے اسّی فیصد سوچاں تے خیال منفی ہوندے نے. دماغ اک بال وانگوں ہوندا اے جس نوں سکھانا پیندا اے واری واری دہرا کے دسنا پیندا اے سانوں چاہی دا اے کہ اپنے دماغ نوں مثبت سوچاں ول ٹورئیے تے اپنے خیالاں نوں بدلیے نال ای اپنی اصلیت نوں سمجھیے کہ اسی کون آں؟ کی آں؟ تے کیوں آں؟ کیوں جے ساڈیاں چاواں ساڈی سوچ بناندیاں نے تے اگوں سوچ نال لفظ, تے لفظاں نال حرکتاں, تے حرکتاں نال عادتاں, تے عادتاں نال ساڈا کردار بن دا اے تے کردار ساڈی قسمت دا فیصلہ کردا اے. اسے لئی سیانے آکھدے نے کہ پہلے تولو تے فیر بولو. لفظاں نوں سوچ سمجھ کے تے چنگے طریقے نال آکھیا جاوے کیوں جے ہر لفظ دی اپنی اک طاقت ہوندی اے. ہمیش چنگی تے سوہنی گل منہ وچوں کڈھنی چاہی دی اے اگر سوچ چنگی ہوئی تے لفظ چنگے ہون گے تے حرکتاں وی چنگیاں ہون گئیاں. اے سارے عوامل رل کے مددگار ثابت ہو سکدے نے رتی سوچ سوچن والیاں نوں اپنی اصلی زندگی وچ واپس آن لئی کیوں جے اوہ لوکی وی اپنی قسمت نوں بدلن تے اپنیاں سوچاں تے چاواں نوں مثبت بنان تے دوجے اپنے جیاں رتی سوچ والیاں لئی جیڑے دل ای دل وچ اپنیاں بے وس چاواں دے محلاں وچ شہنشاہ بن کے اپنے آپ نوں راج کردا ویکھدیاں ہویاں اپنے قیمتی ویلے نوں ضائع کردے نے تے نہ چاہندیاں ہویاں وی بہوں کجھ گوا دیندے نے اوہ لوکی اپنی محنت والی اصلی زندگی وچ آ کے اپنا کوئی مقام بنا سکن تے آپ نوں تے اپنیاں نوں اوہ اسائشاں دے سکن جیڑیاں دی او اپنے آسے پاسے چاہ کردے رئے نے. اس ساری گل تے تحریر نوں اپنے قلم وچوں لگان دا مقصد اے وے کہ سارے رتی سوچ نوں سوچن والے اپنیاں رتیاں سوچاں نوں اپنی زندگی دی کتاب دے کالے ورکے دے سینے تے لکھ کے اس کاغذ نوں پاڑ کے ٹوٹے ٹوٹے کر کے ساڑھ کے اس دی سواح نوں پانی وچ روڑہ دیو. اس لئی کہ اے رتیاں سوچاں فیر کدی ایناں لوکاں دی راہ وچ مڑ کے نہ آن تے اے اپنے آپ نوں ایناں اوارہ تے بے وس سوچاں توں رہا کرا کے اک چنگی سوہنی تے عزت والی زندگی جین تے ٹھاٹ باٹھ نال اپنیاں جائز چاواں نوں پورا کر سکن. امام علی مرتضٰی شیر خدا دا فرمان اے کے زندگی وچ کامیابی چاہندے او تے احساسات نوں چھڈ کے اپنے تجربیاں دی بنیاد تے ٹھیک فیصلے کرو.
اس تحریر دا لکھاری آپ ایناں رتیاں سوچاں تے خیلاں وچ ڈوبیا رہیا اے تے اس نے اپنی رتی سوچ نوں بدلن لئی تے اپنے اندر دیاں میلیاں, کوڑیاں تے بے وس چاواں نوں مثبت بنان لئی اپنی پہلی کوشش تے کاوش کیتی اے. اللہ کرے کہ اے اپنی اس کوشش وچ کامیاب ہو جاوے.
آمین
|