صحرا کی بلبل ریشماں جب گلے کے کینسر میں مبتلا ہوئيں تو ڈاکٹروں نے انہیں گانے سے روک دیا مگر اس کے جواب میں انہوں نے کیا کیا؟ جانیں

سندھ کی مٹی کو یہ اعزاز حاصل ہے کہ اس مٹی کے اندر روحانیت کا ایک سمندر مؤجزن ہے اس مٹی میں لعل شہباز قلندر اور شاہ عبدالطیف بھٹائی نے جو معرفت کا سفر طے کیا اس کے اثرات رہتی دنیا تک اس صوبے پر رحمتوں کی صورت میں سایہ فگن رہیں گے ۔ ان مزاروں پر صدیوں سے لوگ روحانیت کی تعلیم حاصل کرتے ہیں مثال عابدہ پروین کی ہو یا پھر بلبل صحرا ریشماں کی یہ وہ آوازیں ہیں جنہوں نے انہی مزاروں سے اپنے سفر کا آغاز کیا اور کامیابی کے آسمانوں پر چاند بن کر چمکے-

ریشماں جن کو بلبل صحرا کے خطاب سے بھی نوازہ جاتا ہے ایک خانہ بدوش خاندان سے تعلق رکھتی تھیں- ان کی پیدائش 1947 میں راجھستان کے ایک گاؤں لوہا میں ہوئی قیام پاکستان کے سبب ان کا گھرانہ ہندوستان سے ہجرت کر کے پاکستان کے شہر کراچی آگیا اس وقت ریشماں کی عمر صرف ایک ماہ تھی ان کے گھرانے کا شمار ان لوگوں میں ہوتا تھا جنہوں نے اسلام کو قبول کر کے اپنے آبائی مذہب کو چھوڑ دیا تھا-

ابتدائی عمر ہی سے خانہ بدوش ہونے کے سبب ان کا گھرانہ ایک جگہ سے دوسری جگہ ہجرت کرتا رہتا تھا ریشماں نے اپنی عمر کا ایک بڑا حصہ لال شہباز قلندر کے مزار پر اپنے خاندان کے دوسرے افراد کے ساتھ صوفی کلام پڑھتے ہوئے گزارا۔ روحانیت ان کی نس نس میں اتر چکی تھی روائتی تعلیم سے محروم ریشماں خوبصورت ترین آواز کی مالک تھیں جس کو ان کی روح کی خوبصورتی نے اور بھی متاثر کن کر دیا تھا-

بارہ سال کی عمر میں ایک بار لعل شہباز قلندر کے مزار پر جب وہ لعل میری رکھیو گاتے ہوئے دھمال ڈال رہی تھیں تو ان کی آواز کی خوبصورتی اور گہرائی نے ریڈیو پاکستان کے پروڈیوسر سلیم گیلانی نے اس حد تک متاثر کیا کہ وہ ریشماں کو ریڈیو پاکستان میں گانے کی آفر دے بیٹھے جس کو ریشماں نے قبول کیا- کلاسیکل موسیقی کی تعلیم سے نا آشنا جب سر بکھیرتیں تو سننے والا سر دھننے پر مجبور ہو جاتا اور اس وقت میں گلوکارہ ایک مقبول ترین فوک گلوکارہ کے طور پر ابھریں- 1960 میں پاکستان ٹیلی وژن کے قیام کے بعد ریشماں کے گانوں نے وہاں بھی سب کو ششدر رکھ دیا-

جس طرح پرندوں کی کوئی سرحد نہیں ہوتی ہے اسی طرح ریشماں کی آواز بھی ایک ایسا ہی آزاد پرندہ تھی جس نے سرحد پار کے لوگوں کے دلوں کو بھی مسحور کر دیا اور انڈیا کے معروف ڈائيریکٹر اور پروڈیوسر سبھاش گئی نے انہیں اپنی فلم ہیرو کے لیے ایک گانا گانے کی آفر دے ڈالی- اس فلم کا گانا لمبی جدائی اپنے وقت کا سپر ہٹ نغمہ ثابت ہوا اور ریشماں راتوں رات پاکستانی گلوکارہ سے بین الاقوامی گلوکارہ بن بیٹھیں جن کی شہرت پوری دنیا میں پھیلنے لگی-

ریشماں کی سادگی کا یہ عالم تھا کہ جب ان سے پوچھا جاتا کہ وہ دنیا کے کن کن ملکوں میں جا چکی ہیں تو ان کو ان ممالک کے نام بھی صحیح طرح لینے نہیں آتے تھے جہاں جہاں وہ نغمہ سرا ہو چکی ہیں لمبی جدائی کے بارے میں ریشماں کا یہ کہنا تھا کہ ان کو اسٹوڈیو جاتے ہوئے خوف آتا تھا تو انہوں نے سبھاش گئي سے کہا کہ وہ اسٹوڈیو جا کر گانا ریکارڈ نہیں کروائيں گی تو اس وجہ سے یہ گانا دلیپ کمار کے گھر پر ریکارڈ کروایا گیا-

ان کی مقبولیت کا یہ عالم تھا کہ ان کو ہندوستان کے گجرال سے لے کر ذوالفقار علی بھٹو ، ضیا الحق ، بے نظیر بھٹو غرض ہر ہر دور کے سربراہان مملکت نے نہ صرف پسند کیا بلکہ قیمتی تحائف سے بھی نوازہ یہاں تک کہ ہندوستانی حکام نے انہیں ہندوستان کی شہریت کی بھی آفر کی مگر جس کو انہوں نے قبول کرنے سے انکار کردیا-

وقت کے ساتھ ریشماں گلے کے کینسر میں مبتلا ہو گئیں جس پر جنرل پرویز مشرف نے ان کے علاج و معالجے کی ذمہ داری اٹھانے کا فیصلہ کیا ہے مگر بد قسمتی سے آصف علی زرداری نے حکومت میں آنے کے بعد ان تمام سہولیات کو منقطع کر دیا جس کا ریشماں کو بہت دکھ تھا-

گلے کے کینسر میں مبتلا ہونےکے باعث جب ڈاکٹروں نے انہیں گانا گانے سے منع کیا تو ریشماں نے ان کی بات ماننے سے انکار کر دیا- ان کا یہ ماننا تھا کہ گانا ان کی زندگی ہے اور زندگی کی آخری سانس تک جب تک ان کی سانس چل رہی ہے وہ اپنی آواز کو گانے کے لیے استعمال کرتی رہیں گی- 3 نومبر 2013 کو لاہور کے ایک نجی ہسپتال میں کینسر کے عارضے کے سبب وہ ہم سے جدا ہو گئيں مگر ان کی آواز آج بھی کانوں میں رس گھولتی ہے اور ان کی یاد دلاتی ہے-

< Previous کسی دا یار نا وچھڑے۔۔۔انڈسٹری کے دوست جو جدا ہوگئے NEXT > یہ کیا واقعی ان کے ہونٹ ہیں؟؟۔۔۔ہانیہ عامر کے ہونٹوں کی تبدیلی نے سب کو پریشان کردیا