کرونا بحران: کیا آپ جانتے ہیں کہ آکسیجن بنتی کیسے ہے؟

دنیا بھر میں یوں تو گزشتہ ایک سال سے زائد عرصے سے کرونا وبا کی تباہ کاریاں جاری ہیں۔ تاہم حالیہ عرصے میں بھارت میں اس وبا کی دوسری لہر خوفناک شکل اختیار کر گئی ہے جس کی بنیادی وجہ نظامِ صحت پر دباؤ کے علاوہ سانس لینے کے لیے درکار آکسیجن کی قلت ہے۔

کرونا وائرس انسانی جسم میں داخل ہو کر پھیپھڑوں کو متاثر کرتا ہے۔ مرض کی شدت زیادہ ہو تو آکسیجن لیول بھی کم ہو جاتا ہے اور یوں مریض کو سانس لینے میں دشواری کا سامنا کرنا پڑتا ہے۔ ایسے میں مریض کے لیے سب سے اہم آکسیجن ہوتی ہے جس کی قلت کی وجہ سے بھارت میں کئی لوگ زندگی کی بازی ہار گئے۔

آکسیجن ایک بے رنگ اور بے ذائقہ گیس ہے جو ہوا میں پائی جاتی ہے ہوا میں اس کا تناسب 20 سے 21 فی صد ہوتا ہے۔

چین کی نینجنگ یونیورسٹی آف انفارمیشن سائنس اینڈ ٹیکنالوجی سے وابستہ پروفیسر ڈاکٹر ناصر جلال کا کہنا ہے کہ کرہٴ ارض میں آکسیجن وافر مقدار میں پائی جاتی ہے اور یہ انسانی زندگی کے لیے سب سے اہم جزو ہے۔

اُن کے بقول آکسیجن کی اہمیت کا اندازہ اس بات سے لگایا جا سکتا ہے کہ کسی بھی اور سیارے میں زندگی کے آثار تلاش کرنے کے لیے پانی اور آکسیجن کا کھوج لگایا جاتا ہے۔

آکسیجن بنتی کیسے ہے؟

ڈاکٹر جلال کے مطابق آکسیجن کو بنانے کے دو بڑے طریقے ہیں۔ ایک طریقہ یہ ہے کہ اسے ہوا سے الگ کر لیا جاتا ہے اور دوسرے طریقے میں پانی میں سے آکسیجن کو الگ کیا جاتا ہے۔

اُن کے بقول کیوں کہ پانی ہائیڈرجن اور آکسیجن سے مل کر بنتا ہے لہٰذا بجلی کے کرنٹ کے ذریعے ہائیڈروجن کو آکسیجن سے الگ کر لیا جاتا ہے۔

البتہ، ڈاکٹر جلال کہتے ہیں کہ آکسیجن کو ہوا سے الگ کرنے کا طریقہ دنیا بھر میں زیادہ استعمال کیا جاتا ہے۔

اُن کے بقول آکسیجن کی کمرشل پیداوار کے لیے کنسنٹریٹر استعمال کیے جاتے ہیں۔ یہ ایک خاص قسم کی مشین ہوتی ہے جو ہوا میں موجود نائٹروجن کو الگ کر کے آکسیجن جمع کرتی ہے۔

اس طریقے میں ہوا کو جمع کر کے اس کو ٹھنڈا کیا جاتا ہے جیسے ہی ہوا کو ٹھنڈا کر کے گرم کیا جاتا ہے تو سب سے پہلے آکسیجن منفی 183 ڈگری پر الگ ہونا شروع ہو جاتی ہے۔

ہوا میں موجود آکسیجن، نائٹروجن، کاربن ڈائی آکسائیڈ، آرگون اور دیگر گیسز کو 'فریکشنل ڈسٹیلیشن' کے ذریعے الگ کیا جاتا ہے.

فریکشنل ڈسٹیلیشن کے عمل میں سب سے پہلے ہوا کو فلٹر کیا جاتا ہے تاکہ اس میں موجود گرد کو الگ کیا جا سکے۔ بعدازاں اسے منفی 200 ڈگری تک ٹھنڈا کیا جاتا ہے جس کے بعد اسے حرارت دی جاتی ہے۔

اس کیمیائی عمل میں ہوا کو گرم کرنے سے درجۂ حرارت بڑھتا ہے اور منفی 196 تک پہنچتا ہے تو سب سے پہلے نائٹروجن اپنے بوائلنگ پوائنٹ پر الگ ہو جاتی ہے۔ جب درجہ حرارت منفی 186 ڈگری تک پہنچتا ہے تو آرگون الگ ہو جاتی ہے۔

جب درجۂ حرارت منفی 183 ڈگری تک پہنچتا ہے تو آکسیجن الگ ہو جاتی ہے۔

گورنمنٹ ڈگری کالج مصطفیٰ آباد میں تعینات کیمسٹری کی پروفیسر ناہید گلزار کہتی ہیں کہ قدرت نے آکسیجن کی کمی سے نمٹنے کے لیے ہوا اور پانی کی شکل میں انسان کو دو قیمتی خزانے دیے ہیں۔

اُن کے بقول زمین کا دو تہائی حصہ پانی پر مشتمل ہے اور وزن کے لحاظ سے اس میں 88 فی صد آکسیجن موجود ہے۔

مریض کو کب آکسیجن کی ضرورت پڑتی ہے؟

ماہرین کے مطابق انسان کے جسم میں موجود پھیپھڑے جسم کو آکسیجن فراہم کرنے کے ذمے دار ہوتے ہیں اور اگر کرونا وائرس یا کسی اور بیماری کی وجہ سے پھیپھڑے اپنا کام درست طریقے سے نہ کر پائیں تو پھر مریض کو آکسیجن لگائی جاتی ہے تاکہ جسم کی ضروریات پوری ہو سکیں۔

ڈاکٹر ناصر جلال کے مطابق کرونا کے مریض پھیپھڑوں کی پیچیدگیوں کا شکار ہوتے ہیں اور جب بہت زیادہ مریضوں کو آکسیجن کی ضرورت پیش آتی ہے تو کمرشل بنیادوں پر اس کی مانگ بھی بڑھ جاتی ہے۔

ماہرِ ادویات اور راولپنڈی کی نجی میڈیکل یونیورسٹی سے وابستہ ڈاکٹر محمد سالم کہتے ہیں کہ کرونا وبا کے دور میں طبی ماہرین کی جانب سے 'آکسیجن سیچوریشن لیول' کنٹرول میں رکھنے کی ہدایت کی جاتی ہے۔

اُن کے بقول اس سے مراد خون میں مناسب آکسیجن کی مقدار موجود ہونا ہے۔ یعنی پھیپھڑے ہوا سے آکسیجن حاصل کرتے ہیں اور کاربن ڈائی آکسائیڈ خارج کرتے ہیں۔ پھیپھڑوں کی آکسیجن حاصل کرنے کی صلاحیت 94 فی صد سے کم نہیں ہونی چاہے۔ یہی وجہ ہے کہ ان دنوں ایک آلے آکسی میٹر کی طلب میں بھی اضافہ ہوا ہے جو خون میں آکسیجن لیول کی ریڈنگ بتاتا ہے۔

ڈاکٹر سالم کے بقول کرونا کے مریضوں میں یہ دیکھا گیا ہے کہ سیچوریشن لیول 94 سے بہت نیچے آ جاتا ہے جس کے لیے مریض کو آکسیجن لگائی جاتی ہے۔

آکسیجن کا استعمال مزید کن شعبوں میں ہوتا ہے؟

ڈاکٹر محمد سالم کہتے ہیں کہ آکسیجن کا استعمال اسٹیل مینو فیکچرنگ، کیمیکلز کی تیاری، آئل اینڈ گیس سیکٹرز، ویلڈنگ، گلاس مینو فیکچرنگ اور سب سے بڑھ کر اسپتالوں میں آکسیجن کی کمی کے شکار مریضوں کے لیے کیا جاتا ہے۔

اُن کے بقول پاکستان اسٹیل مل سمیت پاکستان کی کئی صنعتوں میں آکسیجن پیدا کرنے کے لیے پلانٹ نصب ہیں جنہیں بروئے کار لایا جا سکتا ہے۔

< Previous تاریخ کے 6 ناکارہ ترین جہاز جو بنے ہی کباڑ خانے کے لیے تھے NEXT > اس زبردست تجربے کے لیے آپ کیا قیمت ادا کر سکتے ہیں؟