ان کی تو ساری عمر ہی اداکاری کرتے ہوئے گزر گئی، کچھ ایسے اداکار جن کے بال دھوپ میں نہیں بلکہ اداکاری کرتے ہوئے سفید ہوئے

شوبز کی دنیا چمک دمک سے بھرپور ہوتی ہے جس میں ہر ایک کی کوشش ہوتی ہے کہ وہ ہمیشہ جوان اور خوبصورت نظر آئے مگر وقت وہ بے رحم شکاری ہے جو کہ کسی کو نہیں چھوڑتا ہے- یہی وجہ ہے کہ شوبز کے آغاز میں جوان اور کم عمر نظر آنے والے اداکاروں پر جب عمر نے اپنے اثرات ڈالے تو ان کے بالوں میں سفیدی اتر آئی مگر چونکہ انہوں نے بال دھوپ میں سفید نہیں کیے تھے- اس وجہ سے انہوں نے اس بزرگی کو نہ صرف قبول کیا بلکہ اس سفیدی نے ان کے گریس میں اضافہ ہی کیا-

عدنان صدیقی

عدنان صدیقی کو مردوں کے فیشن کا آئکون قرار دیا جائے تو یہ کچھ غلط نہ ہوگا۔ فاطمہ ثریا بجیا جو کہ اپنے ہر ڈرامے میں نئے چہرے متعارف کرواتی تھیں۔ عدنان صدیقی بھی ان ہی کی دریافت ہیں جن کو انہوں نے ڈرامہ عروسہ میں متعارف کروایا تھا- معصوم اور اسمارٹ سے عدنان صدیقی نے اس کے بعد پیچھے مڑ کر نہیں دیکھا اور ہر روز ان کی مقبولیت میں اضافہ ہی ہوتا گیا یہاں تک کہ ان کے بالوں میں سفیدی اتر آئی۔ معصوم اور چلبلے سے ہیرو کے کردار میں سامنے آنے والے عدنان صدیقی نے ڈرامے میرے پاس تم ہو کہ تجربہ کار شہوار کی جگہ لے لی ہے-

شہناز شیخ

ڈرامہ تنہائیاں سے شہرت کے عروج کو چھونے والی شہناز شیخ کا شمار ان اداکاروں میں ہوتا ہے جنہوں نے اگرچہ بہت عروج پر شوبز چھوڑ دی مگر ان کی یاد اب بھی لوگوں کے دل سے محو نہیں ہو سکی اور اب بھی لوگ ان کو تنہائياں کی زارا کے نام سے یاد رکھتے ہیں- وقت کے سبب ہونے والے سفید بالوں کو انہوں نے رنگنے کی کوشش نہیں کی اور مرینہ خان سے قریبی تعلقات کے سبب جب کبھی شوبز کے لوگوں کی تقریبات میں نظر آتی ہیں تو دیکھا جا سکتا ہے کہ انہوں نے ان بالوں کی سفیدی کو عمر کے تجربات کی طرح بہت فخر سے قبول کیا ہے-

مرینہ خان

معروف ڈائيریکٹر مرینہ خان جو حالیہ دنوں میں ڈرامہ پردیس کی کامیابی کی مبارکبادیں وصول کرنے میں مشہور ہیں ان کی شوبز میں آمد راشد منہاس شہید کے ڈرامے کے ایک مختصر کردار سے ہوئی- جس کے بعد مرینہ خان اور شہزاد خلیل کی پسندیدہ ترین ہیروئين بن جانے کے سبب پہلے تنہائياں اور اس کے بعد دھوپ کنارے میں نظر آئیں- عام ہیروئين کے برعکس مرینہ خان چھوٹے بالوں کے ساتھ جب اسکرین پر نظر آئیں تو ان کا انداز اتنا مقبول ہوا کہ اس زمانے میں لڑکیوں نے ان جیسے بال کٹوانے شروع کر دیے -جدید فیشن کی عکاس مرینہ خان کے بالوں کا جب بڑھتی ہوئی عمر کے ساتھ معاملہ پیش آیا تو انہوں نے ان بالوں کو لمبا تو کر دیا مگر ان کی سفیدی کو کسی سے چھپانے کی کوشش نہیں کی اور فخر کے ساتھ اس سفیدی کو قبول کیا-

عمیر رانا

عمیر رانا بنیادی طور پر اسٹیج کے اداکار ہیں اور انہوں نے اپنی ایک تھیٹر کمپنی بھی بنائی اور اداکاری کے شعبے سے کافی عرصے سے منسلک رہے ہیں۔ مگر ان کو ٹی وی پر بریک 2014 میں ملا جس کے بعد ان کے بہت سارے ڈرامے مقبولیت بڑھاتے رہے- ڈرامہ او رنگریزہ ، سنگ مرمر ، اس پیار کے صدقے اور حالیہ دنوں میں ہم کہاں کے سچے تھے میں ادکارانہ صلاحیتوں سے خود کو منانے والے عمیر رانا نے بھی شوبز کے شعبے میں ہی کام کرتے ہوئے اپنے سیاہ بال سفید کر لیے ہیں جن کو وہ اکثر سفید ہی رکھنا پسند کرتے ہیں-

گل رعنا

اداکارہ گل رعنا ٹی وی پر اکثر ایک بد مزاج ساس کے روپ میں سازشیں کرتے ہوئے نظر آتی ہیں ۔ اپنے اکلوتے بیٹے عاصم اظہر کی کامیابیوں پر فخر کرنے کے ساتھ ساتھ ان کے نام پر ایسے بہت سارے ڈرامے ہیں جن میں انہوں نے یادگار پرفارمنس دے کر اپنی صلاحیتوں کا لوہا منوایا ہے- شوہر سے طلاق کے بعد بیٹے کی پرورش کرنے اور اس کو کسی مقام تک پہنچانے میں گل رعنا سے حقیقی معنوں میں بہت محنت کی ہے جس کا ثبوت ان کے سر پر موجود بالوں کا سفید ہونا بھی ہے اور جس کو انہوں نے بغیر کسی شرمندگی کے قبول کیا ہے -