ٹی وی ڈراموں میں بیڈ روم سین پر پابندی مگر صوفے پر بیٹھ کر سازشوں کی آزادی، منفی کرداروں اور صوفے میں عوام نے عجیب تعلق دریافت کر لیا

پاکستانی ڈراموں کی کہانی ایک مظلوم ہیروئین ایک اسمارٹ ہیرو ان کے ماں باپ اور ایک منفی کردار کے گرد گھومتی ہے۔ ڈرامہ کوئی بھی ہو کردار تھوڑی سی تبدیلی کے ساتھ یہی رہتے ہیں اس کے علاوہ ڈراموں کی تیاری کے لیے ایک جذباتی او ایس ٹی اور ایک پاور فل فیچر امیج درکار ہوتا ہے جس کی تیاری پر اتنا ہی وقت لگایا جاتا ہے جتنا وقت ڈرامے کی کہانی پر لگتا ہے کیوں کہ یہ اس کی کامیابی میں اہم کردار ادا کرتے ہیں-

ٹی وی ڈراموں اور صوفے کا تعلق

حالیہ دنوں میں یہ خبر بہت زور و شور سے چل رہی ہے کہ پیمرا نے ڈراموں میں بیڈ روم سین اور غیر اخلاقی سین کرنے پر پابندی عائد کر دی ہے۔ پیمرا کا یہ کہنا ہے کہ اس طرح کے مناظر عوام اور نئی نسل کے اخلاقیات پر برا اثر ڈالنے کا باعث بنتے ہیں- اسی بات کو لے کر عوام نے ایک اہم پہلو کی طرف سب کی توجہ مبذول کروائی ہے کہ آج کل آن ائیر جانے والے بیشتر ڈراموں کے فیچر امیج کو اگر غور سے دیکھا جائے تو ان میں ایک بات کامن دیکھنے میں آتی ہے کہ ڈرامے کے اندر منفی کردار ادا کرنے والا اداکار یا اداکارہ کوصوفے پر بٹھایا جاتا ہے جب کہ باقی اداکار اس کے اردگرد کھڑے نظر آتے ہیں-

ڈرامہ مقدر کا ظالم بزنس ٹائکون سیف

اس ڈرامے میں فیصل قریشی نے ایک ایسے بزنس مین کا منفی کردار ادا کیا ہے جو کہ اپنی عمر سے آدھی عمر کی ایک متوسط طبقے کی لڑکی کو شادی شدہ ہونے کے باوجود اغوا کرتا ہے اور اس سے زبردستی نکاح کر کے اس کو اپنے گھر میں حبس بے جا میں رکھتا ہے- اس ڈرامے کے فیچر امیج میں دیکھا جا سکتا ہے کہ منفی کردار ادا کرنے والے فیصل قریشی شان سے صوفے پر بیٹھے ہیں-

ڈرامہ محبت چھوڑ دی میں نے نام کومل مگر کام ظلم

نجی چینل سے پیش کیا جانے والا ڈرامہ محبت چھوڑ دی میں نے حالیہ دنوں پیش کیا جا رہا ہے جس میں حاجرہ یامین کومل کے منفی کردار میں سامنے آئی ہیں جس میں ان کا کردار ایک ایسی نفسیاتی خاتون کا ہے- جس نے اپنے منفی طرز عمل سے اپنے شوہر اور اس کی دوسری بیوی کا جینا دو بھر کیا ہو ا ہے- اس ڈرامے کے فیچر امیج کو بھی دیکھا جائے تو اس میں حاجرہ یامین کو صوفے پر درمیان میں بٹھایا گیا ہے جو کہ یہ واضح کر رہا ہے کہ منفی کردار کا حامل انسان صوفے پر بیٹھا ہوتا ہے-

ڈرامہ قیامت میں منفی کردار میں احسن خان

اس ڈرامے میں بھی جیسا کہ اس کے فیچر امیج سے دیکھا جا سکتا ہے کہ احسن خان درمیان میں صوفے پر بیٹھے ہیں- جس سے واضح طور پر یہ ظاہر ہو رہا ہے کہ احسن خان چونکہ صوفے پر بیٹھیں ہیں اس وجہ سے ان کا منفی کردار ہوگا- اس ڈرامے میں احسن خان نے ایک ایسے بگڑے ہوئے نوجوان کا کردار نبھایا ہے جس نے پہلے تو اپنی پہلی بیوی کو ایک اداکارہ کے پیچھے ہلاک کیا اور اس کے بعد اسی کی بہن نیلم منیر سے شادی کر کے اس کو بھی اپنے ظلم کا نشانہ بنایا-

ڈرامہ کم ظرف کی ظالم آپی

اس تصویر میں صوفے پر بیٹھی نادیہ خان نے اس ڈرامے میں ایک ایسی بڑی بہن کا کردار نبھایا ہے جو کہ اپنے بھائيوں اور ان کی زندگی میں پورے ڈرامے میں اسی صوفے پر بیٹھ کر زہر گھولتی رہیں اور اپنی ساری زندگی کی محرومی کا بدلہ اپنے بھائيوں اور ان کی بیویوں سے لیتی رہیں-

ان تمام ڈراموں کو دیکھ کر یہ کہا جا سکتا ہے کہ پیمرا کو اب بیڈروم سین کے ساتھ ساتھ صوفوں پر بھی پابندی لگا دی جانی چاہیے تاکہ ان پر بیٹھ کر کوئی دوسروں کی زندگی میں زہر نہ گھول سکے آپ کا اس بارے میں کیا خیال ہے؟

< Previous ابھی وہ پچاس سال کے بھی نہیں تھے۔۔۔دل کے دورہ سے زندگی کی بازی ہار دینے والے پاکستانی فنکار NEXT > ان کی اہلیہ اور بیٹی بھی نعتیں پڑھتے ہیں۔۔۔ نجم شیراز کی زندگی کی کہانی