پاکستان کی 8 خوبصورت ترین سڑکیں - پہلے نمبر پر کونسی؟ ویڈیو دیکھیں

اگر آپ اپنی گاڑی میں اکیلے کہیں جارہے ہیں اور آپ کا سفر سینکڑوں میل طویل ہے تو یقیناً آپ جلد ہی بوریت کا شکار ہوجائیں گے- لیکن اگر پورے سفر کے دوران آپ کو اپنے اردگرد بلند و بالا پہاڑ٬ سرسبز چراہ گاہیں یا شاندار قدرتی نظارے دیکھنے کو ملیں تو آپ کا سفر نہ صرف انتہائی دلچسپ ثابت ہوجائے گا بلکہ آپ کو وقت گزرنے کا پتہ بھی نہیں چلے گا- آج کے آرٹیکل میں ہم آپ کو پاکستان میں واقع ایسی کئی خوبصورت سڑکوں کے بارے میں بتائیں گے جن پر سفر کرنا منزل پر پہنچنے سے زیادہ دلچسپ لگتا ہے-

پرکشش قدرتی مناظر سے آراستہ نتھیا گلی سے ایبٹ آباد تک تعمیر کی جانے والی یہ خوبصورت سڑک 54 کلومیٹر طویل ہے- اس سڑک پر سفر کرتے ہوئے آپ کو وقت گزرنے کا پتہ ہی نہیں چلتا کیونکہ اس پورے سفر کے دوران آپ کے اردگرد مسلسل بلند و بالا پہاڑ اور ہریالی رہتی ہے اور یہ حسین مناظر آپ کو اپنے سحر میں گرفتار کیے رکھتے ہیں-

مکران کوسٹل ہائی وے پر سفر کرنا زندگی بھر کے لیے ایک خوبصورت یادگار بن جاتا ہے- دلکش نظاروں کا مالک یہ ہائی وے پاکستان میں موجود بحیرہ عرب کے ساحل کے ساتھ ملحق ہے- یہ ہائی وے صوبہ سندھ کے شہر کراچی سے لے کر صوبے بلوچستان کے شہر گوادر تک 653 کلومیٹر کے ایک وسیع رقبے پر پھیلا ہوا ہے-

اگر آپ ایڈیونچر کے شوقین ہیں تو پھر آپ کو گلگت بلتستان میں واقع اس شاہراہ کا سفر ضرور کرنا چاہیے- یہ خوبصورت سڑک شاہراہ قراقرم کا ایک حصہ ہے جو پاسو کونز سے جا ملتی ہے- اس سڑک پر کیا جانے والا سفر بھی انتہائی دلچسپ ثابت ہوتا ہے جس کی بنیادی وجہ پرکشش قدرتی مناظر ہیں جو آپ کو بور نہیں ہونے دیتے-

وادی شگر کی یہ سڑک 170 کلومیٹر طویل ہے اور اسکردو سے اسکولے کے درمیان دریائے شگر کے ساتھ ملحق ہے- دریا اس سڑک کے حسن میں چار چاند لگا دیتا ہے اور یہاں سے گزرنے والے مسافر کبھی یہاں کی خوبصورتی کو فراموش نہیں کرپاتے- اگر آپ خوبصورت راستوں کے شوقین ہیں تو پھر آپ کو اس سڑک کا سفر ضرور کرنا چاہیے-

گوجال روڈ کے نام سے مشہور یہ حسین و جمیل سڑک گلمت گاؤں سے گزرتی ہے- اس سڑک پر سفر کے دوران آپ کا واسطہ متعدد خوبصورت اور پرکشش مناظر سے پڑتا ہے- یہاں سے گزرتے ہوئے تازہ ہوا کے جھونکے اور بلند پہاڑ پورے سفر کے دوران آپ کو اپنی جانب متوجہ کیے رکھتے ہیں-

پیر سوہاوہ کے نام سے مشہور مارگلہ پہاڑیوں کے درمیان سے گزرنے والی یہ سڑک خوبصورتی میں اپنی مثال آپ ہے - قدرتی نظاروں سے محبت کرنے والوں کے لیے یہ مقام کسی جنت سے کم نہیں- کیا آپ تصور کرسکتے ہیں جب یہاں ہلکی ہلکی بوندا باندی ہوتی ہے تو یہ سڑک کتنا حسین منظر پیش کرتی ہوگی اور یہاں سے گزرنے والے افراد کو کتنا لطف آتا ہوگا؟

سانپ کی مانند بل کھاتی یہ عجیب و غریب سڑک آزاد کشمیر کی وادی لیپہ میں واقع ہے- اس سڑک پر سفر کے دوران انسان کو دور دور تک صرف ہرے بھرے درخت اور آنکھوں کو ٹھنڈک پہنچاتی گھاس ہی نظر آتی ہے- یہاں کی خوبصورتی لفظوں میں بیان کرنا ناممکن ہے اس لیے ضروری ہے کہ آپ کو جب بھی موقع پر ملے اس سڑک کا سفر ضرور کریں-

اب ہم آپ کو اس سڑک کے بارے میں بتائیں گے جسے پاکستان کی سب سے خوبصورت سڑک ہونے کا اعزاز حاصل ہے- جی ہاں ہم بات قراقرم ہائی وے کی جس سے گزرتے ہوئے لاتعداد حسین اور دلفریب نظارے آپ کے منتظر ہوتے ہیں- اس ہائی وے کو دنیا کا 8واں عجوبہ بھی قرار دیا جاتا ہے- یہ ہائی وے چین اور پاکستان کو آپس میں منسلک کرتی ہے-

< Previous بلوچستان کے پر فضا مقام مولا چٹوک کی تاروں بھری رات اور خوبصورت آبشاریں NEXT > شمالی علاقہ جات میں برف باری دیکھ کر کراچی والے سب سے پہلے کیا کرتے ہیں؟