مرد کی عمر اور شکل کون دیکھتا ہے، شادی کے لیے پھر عورت کی شکل اور عمر کیوں دیکھی جاتی ہے؟

ماسٹرز تک تعلیم حاصل کرنے کے بعد عام طور پر ہمارے معاشرے کے مطابق لڑکیوں کو اوور ایج سمجھا جاتا ہے اور اگر ماسٹرز کے بعد لڑکی کو نوکری کرتے ہوئے ایک دو سال بھی گزر جائیں تو اس کے بعد تو لڑکی کے پاس سے شادی کے لیے لڑکے کے انتخاب کی تمام تر چوائسز ختم ہو جاتی ہیں- اور اس کے لیے آنے والے کسی بھی رشتے کو غنیمت سمجھتے ہوئے جو ہے جیسا ہے کی بنیاد پر والدین فوری طور پر رشتہ قبول کر لیتے ہیں بلکہ پڑھی لکھی میچور لڑکی کے اعتراض کے جواب میں ان کے جوابات کچھ اس طرح سے ہوتے ہیں-

مرد کی عمر کون دیکھتا ہے

لڑکی سے دگنی عمر کے مرد کا رشتہ بھی یہ کہہ کر قبول کر لیا جاتا ہے کہ مرد تو ساٹھا پاٹھا ہوتا ہے یعنی ساٹھ سال کی عمر کا مرد بھی جوان ہوتا ہے۔ حالانکہ میڈیکل سائنس میں اس بات کے حق میں کوئی شواہد موجود نہیں ہیں-

سوال یہ ہے کہ اگر مرد کی عمر نہیں دیکھی جاتی ہے تو لڑکی کی عمر کیوں دیکھی جاتی ہے اس کے جواب میں کچھ افراد کا یہ کہنا ہے کہ شادی اپنی نسل کی بقا کے لیے کی جاتی ہے اور تیس سال کی عمر کے بعد بچے کی پیدائش کئی قسم کی پیچیدگیوں کا سبب بن سکتا ہے- یہی وجہ ہے کہ شادی کے لیے مرد کے بجائے عورتوں کی عمر کو اہمیت حاصل ہوتی ہے-

رشتے کے لیے مرد کی شکل نہیں بلکہ تنخواہ دیکھی جاتی ہے

ایک خوشگوار ازدواجی زندگی کے لیے معاشی آسودگی کی بہت اہمیت ہوتی ہے جو ماضی میں صرف مرد کی ذمہ داری ہوتی تھی- مگر اب اس میں عورتیں بھی مردوں کے شانہ بشانہ کردار ادا کر رہی ہیں-

لیکن یہ بات بھی ایک لازم امر ہے کہ معاشی میدان میں مرد کا کام کرنا لازم ہے اس وجہ سے رشتہ کرتے وقت ایک خوشکل بے روزگار مرد کے مقابلے میں باروزگار مرد ہی زیادہ بہتر آپشن ہوتا ہے-

دوسری جانب بدقسمتی سے ہمارے معاشرے میں عورت کو شو پیس بنا کر پیش کرنے کا رواج صدیوں پرانا ہے- اس وجہ سے ہر ایک کی خواہش ہوتی ہے کہ وہ ایسی لڑکی کا رشتے کے لیے انتخاب کریں جس کو دیکھ کر اس کی خوبصورتی سے رشتے دار جل کر بھسم ہو جائيں اس وجہ سے دوسرے افراد کو جلانے کے لیے خوبصورت لڑکی کا انتخاب پیش نظر ہوتا ہے-

یہ وقت بدلنے کا وقت ہے

جیسے کہ دنیا میں تیزی سے تبدیلی واقع ہو رہی ہے بہت ساری روايتیں وقت کے ساتھ تبدیل ہوتی جا رہی ہیں- اس وجہ سے اس قسم کی باتوں کی تبدیلی کا بھی وقت ہے اب تیس سال تو چھوڑیں ساٹھ سال کی عورت بھی صحت مند اولاد کو جنم دے سکتی ہے-

جب کہ گھر کی ذمہ داریاں مرد اور عورت مل کر بھی اٹھا سکتےہیں ۔ شادی کے لیے صرف صورت شکل کی نہیں بلکہ ایسی سمجھدار لڑکی کی ضرورت ہوتی ہے جو اگلی نسل کو اچھے طریقے سے پروان چڑھا سکے -

< Previous چینی شہریوں کی کچھ حیرت انگیز باتیں جو انہیں دنیا سے جدا کرتی ہیں NEXT > قیامت خود بتائے گی کہ وہ کیوں ضروری تھی، بچوں کو پیٹ بھر روٹی کھلانے کی خواہش جان لے گئی