محنت تو سب کرتے ہیں مگر ترقی سب کو نہیں ملتی، کچھ ایسے کام جو آپ کو بھی کامیاب بنا سکتے ہیں

انسان چاہے نوکری کرے یا کاروبار کرے یہاں تک کہ عملی میدان میں کام کرنے والے افراد کا تعلق کسی بھی صنف اور کسی بھی شعبے سے ہو اس بات سے انکار نہیں کر سکتا ہے کہ اپنے شعبے میں اگے بڑھنا اس کا اولین خواب ہوتا ہے- لیکن یہ بھی حقیقت ہے کہ ادارہ کوئی بھی ہو ترقی انسان کو سال میں ایک بار ہی ملتی ہے لیکن سال میں اس ایک بار ترقی کا انحصار ہمارے اس روز مرہ رویے پر ہوتا ہے جس کا اظہار ہم سارا سال کرتے ہیں-

نوکری میں ترقی کے کچھ نفسیاتی گر

آج ہم آپ کو کچھ ایسے ہی نفسیاتی طریقے بتائيں گے جن پر عمل پیرا ہو کر انسان ہر روز ترقی کی طرف قدم بڑھا سکتا ہے-

سامنے بیٹھنے کے بجائے برابر میں بیٹھیں

عام طور پر کانفرنس روم میں یا کسی بھی میٹنگ میں انسان کا رویہ اور برتاؤ اس کے ترقی کے راستے میں اہم کردار ادا کرتا ہے- اس صورتحال میں کوشش کریں کہ باس کے سامنے والی کرسی پر بیٹھنے کے بجائے اس کے برابر بیٹھیں- سامنے بیٹھنے والا شخص مخالف محسوس ہوتا ہے جس کی وجہ سے سامنے والے کی نفسیات پر ناپسندیدگی کے اثرات مرتب ہوتے ہیں جب کہ برابر یا ساتھ بیٹھا ہوا فرد قدرتی طور پر دل کے قریب آجاتا ہے-

باڈی لینگوئج بہت اہم ہوتی ہے

انسان کی شخصیت کے اظہار کے لیے اس کے جسمانی اعضا کی بھی ایک زبان ہوتی ہے کچھ افراد کو دیکھ کر ہی ایسا محسوس ہوتا ہے کہ وہ بہت تھکے ہوئے ہیں جب کہ کـچھ افراد کو دیکھ کر تازگی اور توانائی محسوس ہوتی ہے-

لباس کے رنگوں کا انتخاب سوچ سمجھ کر کریں

کام کےدوران رنگوں کا انتخاب بھی دیکھنے والے پر بہت گہرا تاثر ڈالتا ہے اس وجہ سے یاد رکھیں کہ کام کے دوران رنگ برنگے کپڑے پہننے کے بجائے سالڈ رنگوں کا انتخاب کریں- مثال کے طور پر نیلا رنگ اعتماد کا تاثر دیتا ہے جب کہ گرے رنگ کا مطلب ہوتا ہے کہ آپ پر بھروسہ کیا جا سکتا ہے جب کہ خاص موقعوں کے لیے کالا رنگ سب سے بہترین انتخاب ہوتا ہے-

گفتگو کے دوران آنکھوں میں دیکھیں

بات چیت کے دوران اگر آپ سامنے والے کی آنکھوں میں دیکھتے ہیں تو اس سے یہ تاثر ابھرتا ہے کہ آپ اس کی بات کو توجہ سے سن رہے ہیں- اس تاثر سےآپ کے بارے میں ہائي کمان کو ایک اچھا میسج جاتا ہے جو کہ ترقی کے لیے بہت ضروری ہے-

نام یاد رکھا کریں

ترقی کے لیے یہ عادت بھی بہت ہم ہوتی ہے کہ آپ سامنے والے کا نام یاد رکھیں جب بھی کسی فرد کو انسان اس کے نام سے یاد رکھتا ہے تو اس سے سامنے والے کو یہ محسوس ہوتا ہے کہ آپ اس کو اہم سمجھتے ہیں تو وہ بھی آپ پر بھروسہ کرنے لگتا ہے- جس سے نوکری کے دوران ساتھیوں کے ساتھ اچھی ورکنگ رلیشین پیدا ہوتی ہے اور ترقی کے راستے کھلتے ہیں-

ہاتھ ملاتے ہوئے گرم جوشی کا اظہار

کسی بھی فرد سے ہاتھ ملانے کا انداز اس کے ساتھ ایک اولین تعارف ہوتا ہے جو کہ امپریشن ڈالنے کا سبب بن سکتا ہے- اس وجہ سے ہاتھ ملاتے ہوئے ایک مناسب انداز اپنانا ضروری ہے ہاتھ ملاتے ہوئے ہاتھ کو نہ تو بہت زور سے دبانا چاہیے اور نہ ہی بہت ڈھیلے ڈھالے انداز میں کرنا چاہیے۔ بلکہ ایک درمیانی صورت اختیار کرنی چاہیے-