بیٹیوں کی حفاظت تو کرلیں گے۔۔ معاشرے میں سدھار کیلئے بیٹوں کی تربیت کیوں نہیں کی جاتی؟

پاکستان میں خواتین کی عصمت دری اور ہراسانی کے واقعات میں اضافہ ہوتا جارہا ہے اور والدین اپنی بیٹیوں کی حفاظت کے حوالے سے شدید پریشانی سے دوچار ہیں تاہم ایسے میں سوالیہ پیدا ہوتا ہے کہ بیٹوں کی تربیت نہیں کی جاتی۔

اہم واقعات

کراچی، لاہور، اسلام آباد ہویا پسماندہ علاقے ہر جگہ بنت ہوا ہوس زدہ جنسی درندوں کی ہوس کی بھینٹ چڑھ رہی ہے، پاکستان میں یوں تو جنسی زیادتی کے واقعات تقریباً روز ہی ہوتے ہیں لیکن کچھ ایسے واقعات ہوتے ہیں جو میڈیا کی زینت بننے کے بعد زبان زدعام ہوجاتے ہیں، مختاراں مائی، زینب، مروا اور لاہور موٹر وے پر عصمت دری کے واقعات نے پاکستانی معاشرے پر انتہائی بدنما داغ چھوڑے ہیں- لیکن معاشرے میں ایسے واقعات کو درندگی سے منسوب کرکے مٹی ڈال دی جاتی ہے۔

جنسی زیادتی

آج ہمارا معاشرہ انحطاط پذیر ہے، گھروں میں بھی بہنیں بیٹیاں محفوط نہیں ،ہمارے معاشرے کے جنسی ناسور قبر میں دفن مردہ عورت ،اسپتال میں پڑی مریضہ ،برقع پہنے لڑکی ،دارالامان میں رہنے والی، بس، اسکول، آفس بچوں کے ساتھ ماں، چار ماہ کی بچی، خواجہ سراء اپنی بہن اور بیٹی ،خاندان کی عورتوں اور بے زبان جانوروں کو بھی اپنی ہوس اور درندگی کا نشانہ بنانے سے نہیں چوکتے۔

پاکستان میں سزائیں

پاکستان میں جنسی جرائم پر سزائیں تو موجود ہیں لیکن کمزور دفعات اور عدم شواہد کی بناء پر مجرم آزاد ہوجاتے ہیں اور واقعات کے حوالے سے اگر طبی ماہرین سے رائے لی جائے تو زیادتی کے واقعات میں جنسی اطمینان کا کوئی تعلق نہیں ہے یہ محض ایک ذہنی تسکین کا ذریعہ ہے جس میں فعل مفعول کو اذیت دیکر سکون محسوس کرتا ہے ۔

معاشرے کی اصلاح

مذہب معاشروں میں سزاؤں کا مقصد اصلاح ہوتا ہے لیکن ہمارے ملک میں انصاف کا نظام کمزور ہونے کی وجہ سے یہاں چھوٹا سے چور نظام کی مہربانی سے بہت بڑا مجرم بن کر جیل سے نکلتا ہے۔ یہاں اگر ہم سزاؤں کے بجائے اصلاح اور تربیت پر توجہ دیں تو شائد معاشرے میں کافی حد تک تبدیلی ممکن ہے۔ والدین بیٹیوں کی حفاظت ضرور کریں لیکن بیٹوں کی تربیت بھی یقینی بنائیں۔

بیٹوں کی تربیت

کرکٹ کا ایک واقعہ ہے کہ چند ماہ قبل جنوبی افریقہ کے کھلاڑی ہاشم آملہ سے خاتون کمنٹیٹر بات کررہی تھی تو ہاشم آملہ نظریں جھکاکر بات کررہے تھے کیونکہ سامنے بیشک خاتون تھی لیکن اپنی نظروں کا جواب انہیں خود دینا تھا۔ ہم متاثرین پر لباس اور بے حیائی کا الزام لگا کر بری الزمہ نہیں ہوسکتے، ہمیں اپنے بیٹوں کویہ سکھانے کی ضرورت ہے کہ سامنے چاہے جیسی بھی خاتون ہو جس حال میں بھی ہو، ہمیں اپنے ایمان کی حفاظت خود کرنی ہے۔ ایسا نہیں کہ سامنے والی خاتون کے لباس کی وجہ سے آپ اس کی عزت تار تار کردیں۔ اپنے بیٹوں کو سکھائیں کہ آپ نے سامنے والے کا نہیں بلکہ اپنے اعمال کا جواب دینا ہے اور اپنے بیٹوں پر کڑی نظر رکھیں تاکہ آپ کے بچے مادر پدر آزاد ہوکر کسی کی بیٹی کی عزت تار تار نہ کریں۔

< Previous ماؤں کی ایسی ویڈیو جسے دیکھ کر آپ اپنی ہنسی کنٹرول نہیں کرپائیں گے NEXT > قیامت خود بتائے گی کہ وہ کیوں ضروری تھی، بچوں کو پیٹ بھر روٹی کھلانے کی خواہش جان لے گئی