|
|
| |
| ماضی قریب میں ایک صاحب کی ویڈیو سوشل میڈیا پر بہت
مشہور ہوئی تھی جس میں ان کا کہنا تھا کہ پاکستانی مردوں کی عمر عورتوں کے
مقابلے میں کم ہوتی ہے جس کے ثبوت میں ان کا کہنا تھا کہ کسی بھی گھر میں
جا کر دروازہ کھٹکھٹائيں تو وہاں سے دادی نانی مل جائے گی مگر بے چارے دادا
یا نانا اللہ کے گھر سدھار چکے ہوں گے- |
| |
| مردوں کی زندگی کے مختصر
ہونے کے سبب |
| سائنس کچھ بھی کہے کہ مردوں کی عمر خواتین سے مختصر کیوں
ہوتی ہے لیکن یہ حقیقت ہے کہ ہمارے معاشرے میں مردوں کی مختصر عمر کے پیچھے
خواتین کا بہت بڑا ہاتھ ہوتا ہے۔ اس کا سب سے بڑا ثبوت پاکستانی ڈرامے ہیں
جہاں پر تقریباً ہر ڈرامے کی پیک پر مردوں کو دل کا دورہ پڑ جاتا ہے جب کہ
اس کے ساتھ اس کی بیوی ہر طرح کے جذباتی دباؤ کے باوجود ہٹی کٹی نظر آتی ہے۔
یقین نہ آئے تو حالیہ ڈراموں کی کہانی میں یہ مماثلت خود دیکھ لیں- |
| |
| ڈرامہ فراڈ |
| ویسے تو بیٹی کا گھر برباد ہو تو اس کی تکلیف ماں اور
باپ کے لیے یکساں ہی ہوتی ہے مگر ہمارے ڈراموں میں مردوں کو اتنا کمزور
دکھایا گیا ہے کہ ایسے حالات کا بطور گھر کے سربراہ مقابلہ کرنے کے بجائے
کہانی کے مطابق مرد یا باپ دل پکڑ کر بیٹھ جاتا ہے اور گھر کی عورتیں اپنی
تکلیف بھول کر باپ کو ہسپتال لے جانے پر مجبور ہو جاتی ہیں- |
|
|
| |
| ڈرامہ دراڑ |
| اسی طرح کے واقعات حالیہ دنوں میں پیش کیے جانے والے
ڈرامے دراڑ میں بھی نظر آیا جس میں جب سگی بیٹی نے اپنی کزن کے شوہر کے
ساتھ مل کر اس کے گھر کو برباد کر دیا تو اس مشکل وقت کا مردانہ وار مقابلہ
کرنے کے بجائے اس کے والد بہروز سبزواری دل پکڑ کر بیٹھ جاتے ہیں- اور یہاں
تک کہ ان کی کہانی میں ان کی موت بھی واقع ہو گئی جب کہ ان کی بیگم ان تمام
مسائل کا سامنا بہادری سے کرتی ہوئی نظر آتی ہیں- |
|
|
| |
| ڈرامہ تقدیر |
| ایسے ہی کچھ مناظر ڈرامہ تقدیر میں بھی دیکھنے میں آئے
جب کہ بیٹی پر ہونے والے سسرال کے مظالم کو دیکھ کر ایک بار پھر باپ اس کے
سسرال والوں سے جوابدہی کرنے کے بجائے دل پکڑ کر بیٹھ گیا اور مرتے مرتے سب
کو یہ پیغام دے گیا کہ مرد عورتوں کے مقابلے میں بہت کمزور ہوتے ہیں- |
|
|
|
|
|
ڈرامہ میرے پاس تم ہو |
|
اس مقبول ڈرامے کے اختتام سے بھی سب واقف ہیں جس میں مرکزی کردار ادا کرنے
والے اداکار ہمایوں سعید یعنی دانش کو بھی بیوی کی بےوفائی پر ہارٹ اٹیک سے
مرتے ہوئے دکھایا گیا- ان کا دل بھی اتنا ہی کمزور نظر آیا جتنے کہ آج کل
باقی سب کے نظر آرہے ہیں- بس فرق یہ تھا کہ یہاں دکھ اولاد کا نہیں بلکہ
بیوی کا دیا گیا تھا- |
|
|
|
|
|
ایسے واقعات سے دیا جانے والا منفی پیغام
|
|
جیسا کہ آج کل کے ڈراموں میں یہ پیغام دیا جا رہا ہے کہ خواتین کی حرکات کے
سبب مرد دل پکڑ کر بیٹھ جاتے ہیں اور مسائل کچھ بھی ہوں تو ان کا سامنا
کرنا اور ان کا مقابلہ کرنا عورتوں کی ذمہ داری ہے جب کہ مرد ایسے وقت میں
بھاگ جانے کے لیے دل پکڑ کر بیٹھ جاتے ہیں- |