تم ہمیشہ دیر سے ہی آنا، ہر جگہ لیٹ پہنچنے والوں سے متعلق ایسا انکشاف کہ ہر کوئی انہیں مظلوم سمجھنے لگا

اردو ادب کے مایہ ناز شاعر منیر نیازی کی ایک نظم کافی مشہور ہے جس میں انہوں نے یہ تسلیم کیا کہ ہمیشہ دیر کر دیتا ہوں میں ہر کام کرنے میں ۔۔۔۔۔ منیر نیازی نے یہ نظم اگرچہ اپنے بارے میں لکھی تھی مگر یہ حقیقت ہے کہ دنیا میں ایسے افراد ہمارے اردگرد موجود ہیں جو کہ ہر کام کرنے میں دیر کر دیتے ہیں-

کسی جگہ پہنچنا ہو، کسی سے ملنا ہو کسی انٹرویو کے لیے یا امتحان کے لیے جانا ہو یا کسی ٹرین کو پکڑنا ہو یہ لوگ ہمیشہ دیر کر دیتے ہیں۔ معاشرہ ایسے افراد کو نہ صرف تنقید کا نشانہ بناتا ہے بلکہ ایسے افراد کو بد تمیز اور غیر اخلاقی بھی قرار دیتا ہے-

ہمیشہ دیر کرنا عادت نہیں بلکہ بیماری

اس حوالے سے انسانی رویوں کی ماہر صومیہ زمان کا یہ کہنا ہے کہ جو لوگ ہر کام دیر سے کرتے ہیں وہ درحقیقت ایسے نہیں ہوتے کہ انہیں دوسروں کی پرواہ نہیں ہوتی ہے یا وہ ایسا جان بوجھ کر کرتے ہیں-

بلکہ ایسے افراد کو سائنسی زبان میں ٹائم بائنڈر کہا جاتا ہے ایسے افراد کو کسی کام کو کرنے کے لیے خود کو تیار کرنے میں کافی دشواری کا سامنا کرنا پڑتا ہے- یہ لوگ کسی ایک کام کو چھوڑ کر دوسرے کام کو فوری طور پر اختیار نہیں کرسکتے ہیں اور انہیں اس کے لیے خود کو تیار کرنے میں کافی وقت لگتا ہے اور اس کے لیے انہیں ذہنی اور جسمانی دونوں طرح کی مشقت کرنی پڑتی ہے- یہی وجہ ہے کہ یہ لوگ کسی بھی کام کو کرنے میں تاخیر کا شکار ہو جاتے ہیں-

سائنسدانوں کا یہ بھی کہنا ہے کہ کچھ افراد میں یہ مسئلہ ان کے جین کا حصہ ہوتا ہے اور یہ صرف ایک نسل تک محدود نہیں ہوتا ہے بلکہ آنے والی نسل میں بھی منتقل ہوتا ہے-

مگر بعض اوقات حالات اس سے الٹ بھی ہو سکتے ہیں یعنی اگر والدین ہر کام دیر سے کرنے کے عادی ہوں تو ان کے بچے وقت کے بہت پابند اور ڈسپلن بھی ہو سکتے ہیں- جس کا سبب ان کے لاشعور میں بیٹھا بے عزتی کا وہ خوف بھی ہوتا ہے جس کا سامنا ان کو اپنے والدین کی وجہ سے بار بار کرنا پڑتا ہے-

ہمیشہ دیر کرنے والوں کا علاج

اس حوالے سے انسانی رویوں کی ماہر صومیہ کا یہ کہنا تھا کہ دیر سے آنے والے ان افراد کی اس عادت کو ختم کرنے میں اس کے قریبی لوگ اہم کردار ادا کر سکتے ہیں اور صرف تنقید کرنے کے بجائے ان سے اس حوالے سے بات کرنا ضروری ہے- ان سے ان کے مسائل کے حوالے سے بات چیت کر کے اور ان کی حوصلہ افزائی کر کے ان کو وقت پر کام کرنے کی عادت ڈالی جا سکتی ہے اور ان کو اس بیماری سے نکالا جا سکتا ہے- کیونکہ اگر وقت پر اس عادت کو ختم کرنے کی کوشش نہ کی جائے تو یہ آنے والے وقت میں اے ڈی ایچ ڈی جیسے خطرناک نفسیاتی عارضے کا سبب بھی بن سکتا ہے-

< Previous اگر آپ پریشانیوں سے تھک چکے ہیں تو یہ 5 کام کر کے دیکھیں NEXT > دنیا کا سب سے بڑا مقروض ملک ہونے کے باوجود جاپان ڈیفالٹ کیوں نہیں کرتا؟