|
|
| |
| دنیا میں آج ایسی بہت کم جگہیں رہ گئی ہیں جن کی تصاویر
بنا کر سیاحوں نے انھیں سوشل میڈیا پر کسی ہیش ٹیگ کے ساتھ نہ ڈالا ہو۔ مگر
اس کے باوجود کچھ مقامات سیاحوں اور عام لوگوں کی پہنچ سے دور ہیں اور یہاں
داخلے پر بھی مستقل پابندی ہے۔ |
| |
| زمین پر اکثر مقامات پر سیاحوں کا خیرمقدم کیا جاتا ہے
مگر کچھ جگہیں ایسی بھی ہیں جہاں عام لوگوں کی رسائی ناممکن ہے۔ اس کی
حفاظتی، قانونی یا کوئی سائنسی وجہ ہوسکتی ہے۔ مگر ان جگہوں میں قدر مشترک
یہ ہے کہ یہاں قدم رکھنا منع ہے۔ |
| |
| بی بی سی بٹسائز نے ان میں سے کچھ جگہوں کی فہرست تیار
کی ہے جہاں آپ جا تو نہیں سکتے، مگر یہ تحریر پڑھ کر ان کے بارے میں
معلومات ضرور حاصل کرسکتے ہیں۔ |
|
|
|
|
| |
| ناروے کا سیڈ والٹ جو
ہمیں کسی تباہی سے بچا سکتا ہے |
| دنیا کی تباہی کی صورت میں انسانوں اور جانوروں کو سب سے
بڑا خطرہ یہ لاحق ہوگا کہ ان کی خوراک صف ہستی سے مٹ جائے گی۔ |
| |
| مگر خوش قسمتی سے ایک ایسا مقام ہے جو ہم سب کے لیے
انشورنس پالیسی جیسی اہمیت رکھتا ہے۔ یہ ناورے کا سیڈ والٹ ہے جو 2008 میں
قائم کیا گیا۔ |
| |
| اگر دنیا میں کبھی یہ ضرورت پڑی کہ تمام فصلوں کو دوبارہ
کاشت کرنا پڑے تو یہاں ایسے تمام بیج محفوظ انداز میں رکھے گئے ہیں جو اس
عمل کو ممکن بنا سکیں گے۔ انھیں خاص پیکٹوں کی شکل میں سٹور کیا گیا ہے
تاکہ ان میں نمی نہ آئے کیونکہ نمی سے یہ خراب ہوسکتے ہیں۔ |
| |
| تاہم مخصوص پیکٹ تحفظ کی محض ایک سطح ہے۔ جس مقام پر سیڈ
والٹ بنایا گیا ہے، وہ بھی اس کی حفاظت کی ضمانت ہے۔ |
| |
| بیجوں کی یہ تجوری ناروے کے دور دراز جزیرے سپٹسبرگن میں
واقع ہے۔ اسے ریتیلے پتھر کے پہاڑ میں 120 میٹر اندر رکھا گیا ہے جو کہ قطب
شمالی سے 1300 کلومیٹر دور ہے۔ یہ مقام سطح سمندر سے 130 میٹر اوپر ہے تاکہ
یہ خشک رہے۔ |
| |
| والٹ کے گرد برف کی موٹی تہہ ہے جس کی بدولت اس میں
موجود بیجوں کے لاکھوں نمونے محفوظ رہتے ہیں۔ |
| |
| سپٹسبرگن کا انتخاب اس لیے بھی کیا گیا تھا کیونکہ زمین
کے اس مقام پر زلزلہ آنے کا امکان کم ہے۔ اس تمام منصوبہ بندی کے ذریعے
بیجوں کو محفوظ کیا گیا ہے تاہم آپ اس مقام کا دورہ نہیں کرسکتے۔ |
| |
| سیڈ والٹ پر سکیورٹی سخت رکھی گئی ہے تاکہ یہ ضرورت کے
تحت ہزاروں برسوں تک باقی رہے۔ |
| |
|
|
| |
| برازیل کا سنیک آئی لینڈ |
| برازیل کے ساحل کے پاس 43 ہیکٹر کا ایک جزیرہ سیاحوں کے
پسندیدہ مقامات میں سے نہیں اور نہ ہی کوئی یہاں جانے کا مشورہ دیتا ہے۔ |
| |
| یہ دنیا میں سب سے زہریلے سانپوں میں سے ایک کی نسل
’گولڈن لانس ہیڈ‘ کا گھر ہے جس کا ایک وار کسی پرندے کی پرواز روک دیتا ہے۔
یہ سانپ انھی پرندوں کا شکار کرتے ہیں۔ |
| |
| ایک اندازے کے مطابق جزیرے کے ہر مربع میٹر پر ایک سے
پانچ سانپ ہوسکتے ہیں۔ اسی وجہ سے برازیل کی حکومت نے لوگوں پر سنیک آئی
لینڈ (سنیک جزیرے) جانے پر پابندی لگائی ہے۔ |
| |
| مگر اس پابندی کا اطلاق سائنسدانوں اور محققین پر نہیں
ہوتا جن پر لازم ہے کہ اپنے ساتھ ڈاکٹر لے جائیں۔ مگر جو لوگ سانپوں کی نسل
گولڈن لانس ہیڈ سے متاثر ہیں، وہ انھیں برازیل کے دوسرے مقامات پر محفوظ
انداز میں دیکھ سکتے ہیں۔ |
| |
|
|
| |
| لاسکو۔۔۔ فرانس کا وہ
غار جہاں قیمتی فن پارے ہیں |
| یہ سنہ 1940 تھا جب چار نوجوان ایک کتے کو ڈھونڈ رہے تھے
اور انھوں نے جنوبی فرانس کا ایک غار دریافت کیا جہاں کتا گیا تھا۔ |
| |
| دراصل ان کا کتا ہی انھیں ایک ایسے غار میں لے آیا تھا
جس کی دیواروں پر گھوڑوں اور ہرنوں کی تصاویر بنائی گئی تھیں اور کئی ہزار
سال تک یہ پینٹنگز محفوظ رہی تھیں۔ |
| |
| خیال ہے کہ یہ غار 17 ہزار سال پرانا ہے۔ یہ قدیم فن
پاروں کی سب سے محفوظ شکلوں میں سے ایک ہے۔ غار میں 600 پینٹگز اور کل 1000
نقش نگاریاں ہیں۔ |
| |
| غار کی دریافت کے وقت دوسری عالمی جنگ اپنی ابتدا میں
تھی۔ آٹھ سال بعد لاسکو کے غار کو عام لوگوں کے لیے کھول دیا گیا جو اپنے
آبا و اجداد کا کام دیکھنے کو بے قرار تھے۔ |
| |
| مگر سنہ 1963 میں اس غار کے دروازے عام لوگوں کے لیے بند
کر دیے گئے جب نمی کی وجہ سے اس کی دیواروں پر فنگس آنے لگی۔ دریافت سے قبل
ہزاروں برسوں تک قائم رہنے والے فن پاروں کو اچانک معدومیت کا خطرہ لاحق
ہوگیا۔ |
| |
| افراد کی حد سمیت یہاں لوگوں کی آمد پر کئی سختیاں کی
گئی ہیں مگر اس کے باوجود فنگس کی وبا بار بار پھیلتی ہے۔ |
| |
| اب صورتحال یہ ہے کہ دریافت کے قریب 60 سال بعد لوگوں کی
اکثریت اس غار تک رسائی حاصل نہیں کرسکتی۔ سیاحوں کے لیے پاس ہی اس کی ایک
نقل تیار کی گئی ہے۔ |
| |
|
|
| |
| آسٹریلیا کے صحرا میں
مقدس پہاڑ اولورو |
| فہرست میں شامل یہ مقام قدرے نیا ہے جہاں حال ہی میں
عوام کے داخلے پر پابندی لگائی گئی ہے۔ اس کا نام اولورو ہے اور اسے آئرز
راک بھی کہا جاتا ہے۔ یہ کئی برسوں سے مشہور سیاحتی مقام رہا ہے۔ |
| |
| پابندی سے قبل لوگ شدید گرمی میں 348 میٹر اوپر چڑھائی
کرتے تھے۔ موسم گرما میں درجہ حرارت 47 ڈگری سیلسیئس تک ہوتا ہے۔ اس چڑھائی
میں کئی مشکلات کا سامنا کرنا پڑتا ہے۔ |
| |
| تاہم اولورو یہاں کے مقامی باشندوں کے لیے مقدس مقام ہے۔
وہ طویل عرصے سے یہ چاہتے تھے کہ سیاح ان کی روایات کا احترام کرتے ہوئے اس
پہاڑ پر نہ چڑھیں۔ |
| |
| اسی سلسلے میں انھوں نے اولورو نیشنل پارک میں
درخواست دائر کی تھی اورسنہ 2017 میں یہ فیصلہ کیا گیا کہ سیاح اولورو میں قدم
نہیں رکھ پائیں گے۔ |
| |
| 25 اکتوبر 2019 وہ آخری دن تھا جب لوگوں نے اس پہاڑ
پر چڑھائی کی۔ اس کے بعد سے یہاں آنے پر پابندی ہے۔ اس روز سیاحوں کی لمبی
قطاریں دیکھی گئی تھیں۔ |
| |
| مقامی روایت کے مطابق زمین پر زندگی سے قبل بھی اس
میں مقدس مقامات موجود تھے اور اولورو اس کا ثبوت ہے۔ ان کا ایمان ہے کہ اولورو
سمیت دیگر مقدس مقامات کا وجود انسانوں سے پہلے سے ہے۔ |
| |
| سیاح اولورو نیشنل پارک آ سکتے ہیں اور مقدس پہاڑ
کو صرف دیکھ سکتے ہیں، اسے سر نہیں کرسکتے۔ |
| |
|
Partner Content: BBC Urdu |