حضرت فضالَہ بن عبید اور حضرت
تمیم داری رضی اللہ عنہما سے روایت ہے کہ نبی کریم صلی اللہ علیہ وسلم نے
ارشاد فرمایا جو شخص کسی رات دس آیات کی تلاوت کرے اس کے لئے ایک قنطار
لکھا جاتا ہے اور قنطا ر دنیا اور دنیا میںجو کچھ ہے ان سب سے بہتر ہے ۔
حضرت ابوہریرہ رضی اللہ عنہ روایت کرتے ہیں کہ رسول اللہ صلی اللہ علیہ
وسلم نے ارشاد فرمایا جو شخص رات میں آیتوں کی تلاوت کرے وہ اس رات اللہ
تعالیٰ کی عبادت سے غافل رہنے والو ں میں شما ر نہیں ہوگا ۔ ٭حضرت ابوموسیٰ
رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا
میں اشعرقوم کے رفقاءسفر کے قرآن کریم پڑھنے کی آواز کو پہچان لیتا ہوں
جبکہ وہ اپنے کاموں سے واپس آکر رات کو اپنی قیام گاہوں میں قرآن شریف
پڑھتے ہیں اور رات کو ان کے قرآن مجید پڑھنے کی آواز سے ان کی قیام گاہوں
کو بھی پہچان لیتا ہوں اگر چہ دن میں ،میں نے انہیں ان کی قیا م گاہوں پر
اترتے ہوئے نہ دیکھا ہو ۔
حضرت معقل بن یسار رضی اللہ تعالیٰ عنہ سے روایت ہے کہ رسول اللہ صلی اللہ
علیہ وسلم نے ارشاد فرمایا: قرآن کی چوٹی یعنی سب سے اونچا حصہ سورة البقرہ
ہے۔ اس کی ہر آیت کے ساتھ 80 فرشتے اترے ہیں اور آیت الکرسی عرش کے نیچے سے
نکالی گئی ہے یعنی اللہ تعالیٰ کے خاص خزانے سے نازل ہوئی ہے پھر اس کو
سورة البقرہ کے ساتھ ملادیا گیا یعنی اس میں شامل کرلیا گیا اور سورہ یٰسین
قرآن کریم کا دل ہے۔ اس کو جو شخص اللہ تعالیٰ کی رضا اور آخرت کی نیت سے
پڑھے تو یقیناً اس کی مغفرت کردی جائے گی۔ لہٰذا اس سورت کو اپنے مرنے
والوں کے پاس پڑھا کرو۔ (تاکہ روح کے نکلنے میں آسانی ہو) (مسند احمد)
حضرت جندب رضی اللہ عنہ سے روایت ہے کہ رسول اللہ صلی اللہ علیہ وسلم نے
ارشاد فرمایا جس شخص نے سورہ یٰسین کسی رات میں اللہ تعالیٰ کی رضا کیلئے
پڑھی تو اس کی مغفرت کردی جاتی ہے۔ (ابن حبان) |