|
دنیا میں اگر کسی چکن کو "لیمبورگینی" کا لقب دیا گیا ہے،
تو وہ صرف انڈونیشیا کی مشہور اور نایاب نسل "آیام سیمنی " (Ayam Cemani)
ہے۔ یہ مرغی اپنی منفرد شناخت، مکمل سیاہ رنگ، جینیاتی خوبیوں اور نایابیت
کی وجہ سے دنیا بھر میں شوقین افراد اور پرندوں کے ماہرین کی توجہ کا مرکز
بنی ہوئی ہے۔آیام سیمنی کے بارے میں سب سے حیران کن حقیقت یہ ہے کہ اس کے
جسم کا ہر حصہ جیسے کہ پنکھ، چونچ، زبان، آنکھوں کی پتلی، پنجے، ناخن، گوشت
یہاں تک کہ ہڈیاں بھی سب سیاہ رنگ کی ہوتی ہیں۔ یہ سب کچھ ممکن ہوا ہے
fibromelanosis نامی جینیاتی کیفیت کی وجہ سے، جو اس مرغی کے جسم میں
میلانن (سیاہ رنگت دینے والا مادہ) کی بے تحاشا مقدار پیدا کرتی ہے۔
کہا جاتا ہے کہ اس کا خون بھی کالا ہوتا ہے لیکن ایسا نہیں، یہ ایک عام غلط
فہمی ہے۔ آیام سیمنی کا خون مکمل سیاہ نہیں بلکہ عام مرغی کے خون سے کچھ
زیادہ گہرا سرخ ہوتا ہے، مگر کالا ہرگز نہیں۔ سوشل میڈیا پر اس حوالے سے
کافی مبالغہ پایا جاتا ہے۔یہ دعویٰ کہ آیام سیمنی سیاہ رنگ کے انڈے دیتی
ہے، درست نہیں۔ اس مرغی کے انڈے عام طور پر ہلکے خاکی یا کریم رنگ کے
ہوتے ہیں، جن کا بیرونی رنگ ضرور مختلف ہو سکتا ہے، لیکن سیاہ ہرگز نہیں۔
دنیا بھر میں اس نایاب مرغی کی قیمت بہت زیادہ ہے، ایک مکمل بالغ آیام
سیمنی کی قیمت امریکہ اور یورپ میں 2000 سے 5000 امریکی ڈالر تک ہو سکتی
ہے۔جبکہ انڈے عام طور پر 50 سے 200 ڈالر فی انڈہ فروخت ہوتے ہیں۔"2500 ڈالر
فی انڈہ" کا دعویٰ محض انٹرنیٹ پر مبالغہ آرائی ہے۔پاکستان اور انڈیا میں
بعض شوقین افراد نے اسے درآمد کیا ہے، لیکن قیمتیں یہاں بھی بہت زیادہ ہیں
اور نگہداشت کی خاص مہارت درکار ہوتی ہے۔
ذائقے کے لحاظ سے آیام سیمنی کا گوشت عام مرغی سے کچھ زیادہ مختلف نہیں
ہوتا، مگر اس کا رنگ اور ساخت خاص ہونے کی وجہ سے اسے طاقت بخش غذا،جسمانی
توانائی بڑھانے والا اور بعض ایشیائی روایات میں "دوائی" کے طور پر بھی
استعمال کیا جاتا ہے۔
اس مرغی کو "لیمبورگینی چکن" کیوں کہا جاتا ہے؟ یہ مرغی جس طرح ظاہری شان،
نایابیت، اور قیمت میں نمایاں ہے، اسی وجہ سے اسے "لیمبورگینی چکن" کا لقب
دیا گیا ہے — جیسے دنیا کی مہنگی ترین کار!
آیام سیمنی نہ صرف پرندوں کی دنیا کا عجوبہ ہے، بلکہ انسانی فطرت کے اُس
حصے کی عکاسی بھی کرتی ہے جہاں ہر انوکھا اور نایاب شے قیمتی بن جاتی ہے۔
اگرچہ یہ مرغی عام افراد کے لیے ایک خواب ہی بن کر رہ گئی ہے، مگر دنیا بھر
کے شوقین افراد آج بھی اسے فخر کے ساتھ پالتے اور اس کی خاصیت کا چرچا کرتے
ہیں۔
|