|
دھواں اُگلتے کوئلے سے چلنے والی بجلی گھروں سے لے کر
سورج کی کرنوں میں جگمگاتے شمسی پینلوں کے وسیع میدان تک، چین کی سبز ترقی
کی جانب منتقلی تیزی سے جاری ہے جس میں قابلِ ذکر پیش رفت ہوئی ہے۔ ابھی
حال ہی میں اس حوالے سے 2025ء کا قومی توانائی بچت ہفتہ بھی منایا گیا ،جو
چین میں قومی کم کاربن ڈے کے ساتھ ہم آہنگ ہے۔ ایسی تقاریب تقریباً پانچ
سال قبل طے کیے گئے اہداف " کاربن اخراج میں تخفیف کے عروج اور کاربن
غیرجانبداری" کی بنیاد پر، ایک سبز اور زیادہ پائیدار مستقبل کے لیے قوم کی
غیر متزلزل عزم کی غماز ہیں۔
حکمتِ عملی پر مبنی اعلیٰ ترین سطح کے ڈیزائن سے لے کر شعبہ وار تفصیلی
رہنما خطوط تک، حکومت نے معاشی اور سماجی ترقی کے تمام پہلوؤں میں کم کاربن
اصولوں کے انضمام پر مسلسل زور دیا ہے۔
ان کوششوں کے ثمرات یوں برآمد ہوئے ہیں کہ چین صاف توانائی کی منتقلی میں
عالمی رہنما کے طور پر ابھرا ہے۔ بین الاقوامی توانائی ایجنسی کے مطابق،
ملک اب قابلِ تجدید توانائی کی صلاحیت میں اضافے کے لحاظ سے دنیا میں
سرفہرست ہے اور یہ تخمینہ لگایا گیا ہے کہ 2030ء تک عالمی سطح پر تمام نئی
مجموعی صلاحیت کا تقریباً 60 فیصد شیئر چین کے پاس ہو گا۔ سرکاری اعداد و
شمار کے مطابق، 2024ء میں چین میں نصب شدہ نئی بجلی صلاحیت کا 86 فیصد
قابلِ تجدید توانائی کے ذرائع سے آیا، جبکہ مجموعی نصب شدہ قابلِ تجدید
صلاحیت کا حصہ بڑھ کر قومی مجموعی تناسب میں ریکارڈ 56 فیصد ہو چکا ہے۔
قابلِ تجدید توانائی کی پیداوار سے آگے، چین میں نئی توانائی گاڑیوں کی
پیداوار اور فروخت نے لگاتار 10 سال تک عالمی سطح پر پہلی پوزیشن برقرار
رکھی۔ ملک شمسی پینلز، لیتھیم بیٹریوں اور کاربن کیپچر جیسے شعبوں میں بھی
عالمی ٹیکنالوجی لیڈر کے طور پر ابھرا ہے۔
اسی باعث ماہرین تسلیم کرتے ہیں کہ عالمی توانائی کی منتقلی کو آگے بڑھانے
میں چین کی کارکردگی "متاثر کن اور ناگزیر" دونوں ہے۔حالیہ پالیسی اپ ڈیٹس
نے، خاص طور پر مارکیٹ پر مبنی میکانزم کے انضمام کے ساتھ، چین کے کم کاربن
روڈ میپ کو مزید بہتر اور مضبوط بنایا ہے۔
جولائی 2021ء میں، چین نے اپنی قومی کاربن اخراج ٹریڈنگ مارکیٹ باضابطہ طور
پر شروع کی جسے کاربن فٹ پرنٹس کو کم کرنے اور اخراج کے اہداف کو پورا کرنے
میں ایک اہم سنگ میل قرار دیا جاتا ہے۔ ٹریڈنگ مارکیٹ پلیٹ فارم نے اس کے
بعد سے ٹریڈ ہونے والے گرین ہاؤس گیسز کے حجم کے لحاظ سے دنیا کی سب سے بڑی
کاربن مارکیٹ کی شکل اختیار کر لی ہے۔ قابلِ ذکر بات یہ کہ اس کے بعد سے
بجلی کی پیداوار میں کاربن اخراج کی شدت میں 8.78 فیصد کمی واقع ہوئی ہے۔
اسی طرح ملک میں نئی توانائی ٹیکنالوجیز اس انقلاب میں پیش پیش ہیں۔ اس سال
کے شروع میں، چین نے اپنی کم کاربن ٹیکنالوجی کی کلیدی فہرست (کیٹلاگ) کا
پانچواں ایڈیشن جاری کیا، جس میں شمسی سیلز کے لیے جدید مواد، زیادہ موثر
ونڈ ٹربائن ڈیزائنز، اور ہائی کیپیسٹی بیٹریوں اور ہائیڈروجن فیول سیلز
جیسے جدید توانائی ذخیرہ کرنے کے حل نمایاں کیے گئے ہیں۔ یہ اختراعات فوسل
ایندھن پر انحصار سے دوری اور ایک مضبوط، قابلِ تجدید توانائی گرڈ کی تعمیر
کے لیے نہایت اہم ہیں۔
اگرچہ پالیسی اور ٹیکنالوجی بنیادی ڈھانچہ فراہم کرتی ہیں، لیکن کم کاربن
منتقلی کی حتمی کامیابی ہر فرد کے اجتماعی عمل اور طرزِ زندگی میں تبدیلی
پر منحصر ہے۔یہی وجہ ہے کہ اس وقت چینی صارفین کی ماحولیاتی بیداری مسلسل
بڑھ رہی ہے۔ "ٹریڈ ان" پالیسیوں کے تحت، سبز گھریلو آلات صارفین کی اولین
پسند بن گئے ہیں، جو انہیں اعلیٰ معیار کی زندگی سے لطف اندوز ہونے کے ساتھ
ساتھ پائیدار ترقی میں حصہ ڈالنے کا موقع دیتے ہیں۔ مارچ 2025ء میں شنگھائی
میں منعقدہ ایپلائینس اینڈ الیکٹرانکس ورلڈ ایکسپو 2025 میں اس رجحان کو
مزید نمایاں کیا گیا، جہاں چین کے گھریلو آلات کی کھپت کے رجحانات پر
سالانہ وائٹ پیپر باضابطہ طور پر جاری کیا گیا۔
یہ وائٹ پیپر موجودہ چینی گھریلو آلات کی کھپت میں چھ بڑی تبدیلیوں کی
نشاندہی کرتا ہے، جن میں "سبز اور کم کاربن" دوسرا بڑا اور گہرا رجحان ہے۔
توانائی بچت کی کھپت میں اضافے کے باعث، گھریلو آلات کی صنعت میں توانائی
بچانے کی ٹیکنالوجیز مزید بہتر ہوئی ہیں۔ خاص طور پر، توانائی کی بچت کے
لیے مصنوعی ذہانت ٹیکنالوجی کا استعمال ایک جامع، مکمل منظر نامے پر مشتمل
توانائی انتظامی نظام تک پہنچ گیا ہے۔
مزید برآں، نئی توانائی ٹیکنالوجیز جیسے فوٹووولٹائکس اور انرجی اسٹوریج
گھریلو آلات کے ساتھ گہرائی سے مربوط ہو رہی ہیں۔ ایپلائینس اینڈ
الیکٹرانکس ورلڈ ایکسپو میں،معروف کمپنیوں نے فوٹووولٹائک ایئر کنڈیشنرز
اور انرجی اسٹوریج سسٹمز پیش کیے جو گھریلو توانائی انتظامی پلیٹ فارم کے
ذریعے شمسی توانائی کی پیداوار اور گھریلو آلات کی بجلی کی کھپت کو ذہانت
سے منظم کر سکتے ہیں۔
اجتماعی طور پر کم کاربن طرزِ زندگی کو اپنانے اور دانستہ، سبز کھپت کے
انتخاب کرنے سے، شہری نہ صرف قومی موسمیاتی اہداف میں حصہ ڈالتے ہیں بلکہ
صحت مند معاشروں اور آنے والی نسلوں کے لیے ایک زیادہ پائیدار کرہ ارض کی
تشکیل میں بھی مدد کرتے ہیں۔ حکومتی پالیسی، ٹیکنالوجی کی جدت طرازی، اور
وسیع پیمانے پر عوامی شمولیت کے درمیان یہ ہم آہنگی ایک حقیقی کم کاربن
مستقبل کی بنیاد ہے۔
|