گالی
(Muhammad Jaffar Khunpouria, Karachi)
| گالی زبان کا سب سے بے ساختہ اور طاقتور اظہار ہے، جو غصے، کمزوری، محبت اور مزاح سب کچھ اپنے اندر سمیٹے ہوئے ہے ۔۔۔۔۔۔۔۔ عورت کو عزت کا پیمانہ ماننے کے باعث زیادہ تر گالیاں اسی کے رشتوں پر مرکوز ہوتی ہیں ۔۔۔۔۔۔ بظاہر برائی سمجھا جانے والا یہ لفظ دراصل دلیل کا شارٹ کٹ اور گفتگو کا تیز ترین ہتھیار ہے |
|
|
گالی
محمد جعفر خونپوریہ
03232920497
[email protected]
دنیا کی ہر زبان میں کئی الفاظ بڑے ناز و انداز سے لیے ہوئے ہوتے ہیں ، کوئی کہتا ہے شکریہ، تو کسی نے کہا مہربانی، کسی نے کہا آئی لو یو ۔۔۔۔۔۔۔۔۔ لیکن زبان کی اصل جان تو گالی ہے ۔۔۔۔۔۔۔۔۔ جی ہاں، وہی گالی جسے سنتے ہی خون کھولنے لگتا ہے اور بولنے والے کا خون اچھالنے کا دل کرتا ہے ۔۔۔۔۔۔۔
کتابوں کے دیوانے غالب کے اشعار پڑھ کر عش عش کرتے ہیں، مگر محلے کی گلی میں جب سبزی والا دوسرے کو غصے میں پکارتا ہے: "اوئے، تیری تو۔۔۔۔۔۔۔۔۔ " تو وہاں جو حقیقت اور خلوص جھلکتا ہے، وہ کسی دیوان میں کہاں۔۔۔۔۔۔ گالی دراصل زبان کا سب سے بے ساختہ اور سچا اظہار ہے
اگر گالی کی تعریف کی جائے تو یہ ایک ایسا لفظ یا جملہ ہے جو دوسروں کو برا لگے، سننے والا برا مانے اور بولنے والا وقتی سکون پالے ۔۔۔۔۔۔۔۔ یہ زبان کا فری شارٹ کٹ ہے، اس کے لیے نہ ڈگری چاہیے نہ ڈپلومہ، ہر انسان کے لیے کھلا خزانہ ۔۔۔۔۔۔۔۔۔ دماغ سے سوچنے کے بجائے زبان کی بندوق سیدھی چل پڑتی ہے ۔۔۔۔۔۔۔۔۔۔ گالی وہ ہتھیار ہے جسے بچہ بھی چلا سکتا ہے اور سیاستدان بھی، فرق صرف طاقت کا ہے
یہ سوال ہمیشہ سے معمہ رہا ہے کہ سب سے پہلی گالی کس نے دی ۔۔۔۔۔۔۔۔۔ کچھ محققین کا خیال ہے کہ یہ کام ہابیل اور قابیل کے دور سے شروع ہوا جب ایک نے دوسرے کو مارا ۔۔۔۔۔۔۔۔۔ لیکن حقیقت شاید یہ ہے کہ جیسے ہی کسی انسان نے دوسرے کی جائیداد پر قبضہ کیا یا کسی قیمتی چیز کو چرا لیا، پہلا ردعمل یہی نکلا ہوگا کہ "او تیری ۔۔۔۔۔۔۔۔۔ " یعنی جس دن انسان نے اپنی عقل استعمال کرنی شروع کی، اسی دن زبان نے گالی ایجاد کر لی ۔۔۔۔۔۔۔۔ اور یہ ایجاد اتنی کارآمد ثابت ہوئی کہ آج تک زبانی دنیا کا سب سے مقبول ہتھیار ہے
اب سوال یہ ہے کہ گالی دی کیوں جاتی ہے ۔۔۔۔۔۔۔۔ سیدھی سی بات ہے، دلیل دینے میں وقت لگتا ہے، گالی دینے میں دو سیکنڈ ۔۔۔۔۔۔۔۔۔۔ دلیل کے لیے دماغ چاہیے، گالی کے لیے صرف زبان ۔۔۔۔۔۔۔۔ دلیل سے بحث لمبی ہو سکتی ہے، گالی سے یا تو بحث ختم یا سیدھا، سیدھا بندہ ہی ختم ہوسکتا ہے ۔۔۔۔۔۔۔۔۔۔۔۔۔ یوں سمجھ لیجیے گالی ایک قسم کا فاسٹ فوڈ ہے ۔۔۔۔۔۔۔۔۔۔ فورا تیار، فورا ہضم اور فورا اثر
غصے میں تو گالی مزید آسانی سے نکلتی ہے ۔۔۔۔۔۔۔۔ دماغ کا منطق والا حصہ بند ہو جاتا ہے، زبان کی ریل گاڑی بغیر بریک کے چلنے لگتی ہے ۔۔۔۔۔۔۔ اسی لیے اکثر لوگ بعد میں کہتے ہیں " یار انجانے میں منہ سے نکل گیا" ۔۔۔۔۔۔۔۔۔ حقیقت یہ ہے کہ یہ زبان کی آٹو میٹک ٹرانسمیشن ہے، بس گیئر خود بدل جاتا ہے ۔۔۔۔۔۔۔۔۔۔۔
لیکن اصل سوال یہ ہے کہ گالیوں کا بڑا حصہ خواتین کے رشتوں کے گرد کیوں گھومتا ہے ۔۔۔۔۔۔۔۔۔۔۔۔۔۔۔ اس کی وجہ سیدھی ہے ، معاشرے نے عورت کو عزت کا پیمانہ بنایا ہوا ہے ۔۔۔۔۔۔۔۔۔۔ مرد کو برا کہہ دیں، شاید برداشت کر لے، مگر عورت کو برا کہہ دیں تو وہ برداشت نہیں کرے گا ۔۔۔۔۔۔۔۔۔۔ گویا گالی ایک آنر بم ہے، جو براہ راست عزت پر گرتا ہے ۔۔۔۔۔۔۔۔۔۔۔۔ اور یہی وجہ ہے کہ ماں بہن کو گالی میں سب سے زیادہ اچھالا جاتا ہے ۔۔۔۔۔۔۔۔۔۔۔۔ جب دلیل ختم ہو جائے، بات ختم نہ ہو تو یہ سب سے طاقتور ہتھیار بنتا ہے ۔۔۔۔۔۔۔۔۔ جیسے ہی کوئی ماں بہن کا ذکر لے آئے، بحث سے سیدھی لڑائی اوردھینگا مشتی شروع ہو جاتی ہے
یہ بھی تضاد ہے کہ گالی میں عورت کو گھسیٹا جاتا ہے، مرد کو نہیں ۔۔۔۔۔۔۔۔۔ کبھی آپ نے سنا ہے کہ کسی نے کہا ہو، " تیرے والد کو۔۔۔" شاید ہی کبھی نہیں کیونکہ مرد کی عزت اس کی ذات سمجھی گئی اور عورت کی عزت پورے خاندان کی ۔۔۔۔۔۔۔۔۔۔ اس لیے مرد کو ذلیل کرنے کے لیے بھی عورت کو بیچ میں گھسیٹنا پڑتا ہے ۔۔۔۔۔۔۔۔۔۔ یہ دراصل ہماری سماجی سوچ کا عکاس ہے
گالی صرف اردو یا پنجابی کا خاصہ نہیں، یہ تو عالمی ورثہ ہے ۔۔۔۔۔۔۔۔۔ انگریزی میں تو ایک پوری لغت گالیوں پر لکھی جا سکتی ہے، ایف ورڈ تو اتنا عام ہے کہ اب فلمی بورڈ بھی تھک گیا ہے۔۔۔۔۔۔ عربی میں زیادہ تر گالیاں جانوروں کے گرد گھومتی ہیں، کتا، گدھا وغیرہ ۔۔۔۔۔۔۔۔۔۔ ترکی والے بڑی تخلیقی گالیاں دیتے ہیں ۔۔۔۔۔۔۔۔۔۔۔ چینی گالیوں میں کھانے پینے کی اشیا آتی ہیں، جیسے "چاول کا کیڑا" ۔۔۔۔۔۔۔۔۔ اور پنجابی تو خیر الگ یونیورسٹی ہے، وہاں ایک گالی میں تاریخ، فلسفہ، جغرافیہ اور حیاتیات سب سما جاتے ہیں
سیاست میں تو گالی کو خاص مقام حاصل ہے ۔۔۔۔۔۔۔۔۔۔ اسمبلی کے مناظر دیکھ لیں ۔۔۔۔۔۔۔۔۔۔۔۔ پہلے سب ایک دوسرے کو "محترم" کہتے ہیں، پھر آہستہ آہستہ محترم سے نااہل، نااہل سے چور، پھر ڈاکو، اور آخر میں وہ مقام آتا ہے کہ اسپیکر بھی مائیک بند کر کا اعلان کردیتا ہے ۔۔۔۔۔۔۔۔۔۔ سیاستدان کے پاس جب دلیل ختم ہو جائے تو وہ زلیل کرنے اور ہونے پر تل جاتا ہے
لیکن دلچسپ بات یہ ہے کہ گالی ہمیشہ نفرت ہئی نہیں پھیلاتی ۔۔۔۔۔۔۔۔۔۔ بلکہ کبھی کبھی یہ مزاح بھی بن جاتی ہے ۔۔۔۔۔۔۔۔ دوستوں کی محفل میں ایک دوسرے کو چھیڑنے کے لیے جب کوئی ہلکی پھلکی گالی دے تو سب ہنس پڑتے ہیں کامیڈین کا لطیفہ بھی اکثر گالی کے بغیر پھیکا لگتا ہے ۔۔۔۔۔۔۔۔۔ اور مزاحیہ فلم میں ایک آدھ مصالحہ دار لفظ پورا سین زبردست بنا دیتا ہے ۔۔۔۔۔۔۔۔ گویا گالی کا دوسرا چہرہ دوستی اور ہنسی کا مصالحہ ہے ۔۔۔۔۔۔۔ ہمارے لیاری میں تو ملاقات کا آغاز ہی گالی سے ہوتا ہے ۔۔۔۔۔۔۔۔ " ق" کا بچہ " کب سے فون کررہا ہوں اٹھاتا کیوں نہیں "
اگر سنجیدگی سے دیکھا جائے تو گالی طاقت کی عکاسی بھی کرتی ہے ۔۔۔۔۔۔۔۔۔ امیر غریب کو اس کی غربت پر طعنہ دیتا ہے، طاقتور کمزور کو جانور کہہ دیتا ہے، مرد عورت کو شرم و حیا کے پہلوؤں سے نشانہ بنا کر برا بھلا کہتا ہے ۔۔۔۔۔۔۔۔۔۔۔ یعنی گالی طاقت ور کے ہاتھ میں زیادہ اثر کرتی ہے ۔۔۔۔۔۔۔۔ لیکن کبھی کبھی کمزور صرف گالی دے کر طاقت ور کو اندر سے ہلا دیتا ہے ۔۔۔۔۔۔۔۔ کچھ خواتین بھی گالی کا استعمال کرتی ہیں ۔۔۔۔۔۔۔۔ میں ایک ایسی خاتون سے واقف ہے جو ہر بات میں کہتی ہے " اس کی تو ماں کی ۔۔۔۔۔۔۔ " ایک دن میں نے اس سے کہا " تم عورت ہوکر گالیوں کا استعمال کرتی ہو " کہنے لگی " گالی کمزور کا ہتھیار ہے ۔۔۔۔۔۔۔۔۔۔ اور میں بھی کمزور ہوں اس لیے گالیوں کو ہتھیار کے طور پر استعمال کرتی ہوں "
گھر کے ماحول میں بھی گالی اپنی شکلیں بدل لیتی ہے ۔۔۔۔۔۔۔۔۔۔۔۔ باپ بیٹے کو ڈانٹے تو کبھی ماں ، بہن ایک کردیتا ہے ، ماں نسبتاً نرم رویے کی گالی دیتی ہے، بدتمیز یا نالائق ۔۔۔۔۔۔۔۔۔ بہن بھائیوں میں گالیاں تو اور بھی دلچسپ ہیں، الو کا پٹھا یا کھچڑ، جن پر بعد میں سب کو خود ہنسی آ جائے ۔۔۔۔۔۔۔۔ گھروں میں گالی کبھی ڈانٹ ہے، کبھی پیار کا اظہار
وقت کے ساتھ ساتھ گالی بھی جدید ہوتی جا رہی ہے۔ نوجوان نسل نے اب گالیوں کو ایموجی میں بدل دیا ہے، سوشل میڈیا نے گالی کے نئے انداز متعارف کرا دیے ہیں، جیسے نوُب، سمپ، ٹاکسک ۔۔۔۔۔۔۔۔۔ اور آنے والے وقت میں شاید روبوٹ بھی گالی دینا شروع کر دیں ۔۔۔۔۔۔۔۔۔۔۔
یوں گالی انسان کی تہذیب کا ایسا پہلو ہے جو ہماری سچائی، غصہ، محبت، دوستی اور تضادات سب کچھ دکھاتی ہے ۔۔۔۔۔۔۔۔۔۔۔۔ کچھ لوگ اسے کھلے عام چلاتے ہیں، کچھ اشاروں میں، کچھ صرف دل میں،،،،،،،،،،،،،،، فرق بس یہ ہے کہ گالی اپنی شکل بدل لیتی ہے مگر ختم نہیں ہوتی۔
گالی ایک ایسا لفظ ہے جو سنتے ہی اکثر لوگوں کی آنکھوں میں آگ اور زبان پر جھاگ آجاتی ہے، لیکن حقیقت یہ ہے کہ گالی ہماری روزمرہ زندگی کا اتنا اٹوٹ حصہ بن چکی ہے کہ کبھی کبھی یہ لگتا ہے کہ اگر گالیوں پر پابندی لگ جائے تو آدھی دنیا گونگی ہو جائے ۔۔۔۔۔۔۔۔۔۔۔ یہ ایک ایسا " فری شارٹ کٹ " ہے جسے انسان اس وقت استعمال کرتا ہے جب اس کے پاس دلیلیں ختم ہو جاتی ہیں یا صبر کا پیمانہ لبریز ہو جاتا ہے ۔۔۔۔۔۔۔۔۔ دلچسپ بات یہ ہے کہ گالی بظاہر ایک برائی ہے لیکن اس کے بغیر دنیا کی زبانیں شاید اتنی رنگین نہ ہوتیں ۔۔۔۔۔۔۔۔۔ زبان کا حسن الفاظ میں ہے اور الفاظ کے ہتھیاروں میں گالی ایک ایسا تیر ہے جو سب سے تیز چلتا ہے
اگر ہم غور کریں تو شاید گالی اتنی ہی پرانی ہے جتنا انسان خود ۔۔۔۔۔۔۔۔۔۔۔۔۔۔ جب پہلا انسان ابتدائی زمانے میں درخت سے گرا ہوگا یا آگ جلانے کی کوشش میں ہاتھ جلا بیٹھا ہوگا تو اس کے منہ سے پہلا لفظ یقیناً "اوہ" یا "آہ" نہیں بلکہ کوئی ابتدائی قسم کی گالی ہی نکلی ہوگی ۔۔۔۔۔۔۔۔۔۔ انسان کے جذبات اتنے سادہ نہیں ہوتے کہ بس "آہ" کہہ کر صبر کر لے ۔۔۔۔۔۔۔۔۔۔ اسے ایک ایسا لفظ چاہیے ہوتا ہے جس میں سارا غصہ، بے بسی اور اشتعال یکجا ہو جائے ۔۔۔۔۔۔۔۔۔ یہی وجہ ہے کہ گالی وجود میں آئی ۔۔۔۔۔۔۔۔ اگر یہ کہا جائے کہ گالی انسانی زبان کا سب سے پہلا " ایکسپریس وے" ہے تو غلط نہ ہوگا
گالی کو ہم نفسیاتی ہتھیار بھی کہہ سکتے ہیں جب آپ دلیل سے کسی کو شکست نہیں دے سکتے تو آپ گالی سے کسی کو بھی زلیل کرسکتے ہیں ۔۔۔۔۔۔۔ کیونکہ اس میں منطق نہیں بلکہ عزت اور انا کو زخمی کرنے کی طاقت ہوتی ہے ۔۔۔۔۔۔۔۔۔۔۔۔ یوں سمجھیے کہ گالی وہ " ایٹم بم " ہے جسے ہر شخص اپنی زبان پر لیے پھرتا ہے، دلچسپ بات یہ ہے کہ یہ بم چلانے کے لیے نہ کسی ٹیکنالوجی کی ضرورت ہے نہ کسی سائنس کی، بس زبان ہلانے کی دیر ہے اور دھماکہ ہو جاتا ہے
لیکن سوال یہ ہے کہ گالی زیادہ تر عورتوں کے حوالے سے کیوں دی جاتی ہے ۔۔۔۔۔۔۔۔۔ کبھی غور کیا ہے کہ مرد کو ذلیل کرنے کے لیے بھی سیدھا اس کی ماں یا بہن کو نشانہ بنایا جاتا ہے ۔۔۔۔۔۔۔۔۔ گویا مرد خود اتنا اہم نہیں جتنا اس کی ماں یا بہن ۔۔۔۔۔۔۔۔ یہ ہماری معاشرتی سوچ کا عکس ہے کہ ہم نے عزت کو عورت کے وجود سے جوڑ دیا ہے اگر آپ کسی کو " کم عقل" کہیں تو شاید وہ ہنس دے، لیکن اگر آپ نے اس کی ماں یا بہن پر بات کر دی تو وہ سیدھا خنجر نکالنے پر آ جائے گا ۔۔۔۔۔۔۔۔۔۔۔ اس سے ظاہر ہوتا ہے کہ ہم عورت کو عزت کا پیمانہ مانتے ہیں اور مرد کو بس ایک محافظ ۔۔۔۔۔۔۔۔۔۔ یہ سمجھنے کی بات ہے اگرچہ ہم گالی کے حوالے سے بات کررہے ہیں ۔۔۔۔۔۔ لیکن عورت کی اہمیت اور عظمت یہاں بھی واضع ہے ہمیں غصے میں بھی ان کے تقدس کا اسقدر احساس ہے کہ کوئی خواتین کے حوالے سے اپنی گندی زبان کا استعمال کرے تو ہم اس کا سر دھڑ سے الگ کردینا چاہتے ہیں ۔۔۔۔۔۔۔۔۔۔۔۔۔۔ پھر بھی خواتین بضد ہیں کہ انہیں معاشرے میں کوئی مقام نہیں دیا جاتا ۔۔۔۔۔۔۔۔۔۔۔ دیکھا جائے اور سوچا جائے تو جو لوگ گالی کے زریعے اپنی گھٹیا سوچ کا اظہار کرتے ہیں ۔۔۔۔۔۔۔۔۔ وہ بطور بلیک میلنگ سننے والوں کو ان کے اہم ترین رشتوں کی اہمیت یاد دلا رہے ہوتے ہیں
بعض لوگ کے منہ سے غصے میں بے اختیار گالی نکل جاتی ہے ۔۔۔۔۔۔۔۔ اس کے مطلعق ماہرین نفسیات کا کہنا ہے کہ جب انسان غصے میں ہوتا ہے تو اس کا دماغ فیصلہ کرنے کے بجائے ردِعمل دینے لگتا ہے ۔۔۔۔۔۔۔۔۔۔ یعنی دماغ " شارٹ سرکٹ" کر جاتا ہے اور زبان خودکار مشین کی طرح گالی اگلنے لگتی ہے ۔۔۔۔۔۔۔۔۔ یوں سمجھیے کہ زبان کے پاس ہینڈ بریک ہی نہیں، جیسے ہی جذبات کا ایکسیلیٹر دبا، گالی سیدھی باہر۔۔۔۔۔۔۔ مزے کی بات یہ ہے کہ کچھ لوگ غصے میں اتنی فصاحت کے ساتھ گالیاں نکالتے ہیں کہ اگر یہی فصاحت وہ تقریر میں دکھا دیں تو بڑے بڑے مقرر شرما جائیں گالی دراصل ایک ایسی " خدمت" ہے جو مفت دستیاب ہے ۔۔۔۔۔۔۔۔۔۔۔ اس کے لیے نہ لائسنس چاہیے، نہ ویزا، نہ کوئی ٹیکس ۔۔۔۔۔۔۔۔۔۔۔ آپ جہاں چاہیں، جب چاہیں، جس پر چاہیں، آزما سکتے ہیں ۔۔۔۔۔۔۔۔۔۔ گالی کا عالمی نظام بھی بڑا منصفانہ ہے ۔۔۔۔۔۔۔۔۔۔ دنیا کے سب سے بڑے مزاح نگار اگر کسی چیز کو سب سے زیادہ " ایندھن" فراہم کرتے ہیں تو وہ گالی ہے ۔۔۔۔۔۔۔۔۔ چاہے فلمیں دیکھ لیں یا ڈرامے، جہاں گالی آتی ہے وہاں قہقہہ بھی لگتا ہے اور واویلا بھی ۔۔۔۔۔۔۔۔ بھارتی فلموں نے تو گالی کو اس قدر " گلیمرائز" کر دیا کہ وہ خاندانی سینما میں بھی چلنے لگی ۔۔۔۔۔۔۔۔۔۔۔۔ ناظرین پہلے چونکتے ہیں، پھر ہنستے ہیں اور پھر اسے حقیقت مان لیتے ہیں گالی اس لیے بھی چلتی ہے کیونکہ یہ حقیقت سے قریب ہے ۔۔۔۔۔۔۔۔ انسان اندر سے جتنا مہذب بنتا ہے، باہر نکلتے ہی زبان کا پہلا وار گالی ہی ہوتی ہے
اگر غور کیا جائے تو گالی ایک سماجی مظہر بھی ہے ۔۔۔۔۔۔۔۔۔۔ محفلوں میں بعض لوگ اپنی "شاعری" میں گالی ملا کر مزہ دوبالا کر دیتے ہیں ۔۔۔۔۔۔۔۔۔۔ گلی محلے کے قہوہ خانوں میں اکثر گفتگو کی جان گالی ہوتی ہے ۔۔۔۔۔۔۔۔۔۔ سیاستدان جلسے میں گالی دے تو خبر بن جاتی ہے، اور عوام تالیاں بجاتے ہیں ۔۔۔۔۔۔۔۔ کرکٹ میچ کے دوران کھلاڑی گالی نکال دے تو وہ "میم" بن جاتی ہے ۔۔۔۔۔۔۔۔۔۔ یوں لگتا ہے کہ گالی دراصل ایک ایسا "مساوی ہتھیار" ہے جسے امیر بھی استعمال کرتا ہے اور غریب بھی، وزیر بھی اور مزدور بھی
مگر گالی کا سب سے دلچسپ پہلو یہ ہے کہ بعض اوقات یہ محبت کا اظہار بھی بن جاتی ہے ۔۔۔۔۔۔۔۔۔ آپ نے دیکھا ہوگا کچھ دوست ایک دوسرے کو "اوے گدھے" کہہ کر پکارتے ہیں اور وہ برا بھی نہیں مانتے ۔۔۔۔۔۔۔۔ بلکہ اگر کوئی دوست گالی دینا بند کر دے تو دوسرا پوچھ بیٹھتا ہے، " کیا ہوا آج بڑی شرافت سے بات کر رہے ہو" گویا گالی دوستی کی پہچان بھی ہے ۔۔۔۔۔۔۔۔ یہ وہ لمحہ ہوتا ہے جب گالی بے عزتی نہیں بلکہ قربت کی علامت بن جاتی ہے
گالی کی دنیا اتنی وسیع ہے کہ اگر کوئی سنجیدگی سے تحقیق کرے تو ایک پوری لغت تیار ہو سکتی ہے ۔۔۔۔۔۔۔۔۔۔۔ جیسے انگریزی میں " ڈکشنری آف اسوئیر ورڈز" موجود ہے، اردو میں بھی " لغتِ گالیات" بنائی جا سکتی ہےاس لغت میں نہ صرف گالیوں کے معنی لکھے جائیں بلکہ ان کے حالاتِ استعمال بھی ۔۔۔۔۔۔۔۔ مثلاً " یہ گالی زیادہ تر ٹریفک جام میں دی جاتی ہے" یا " یہ گالی کرکٹ میچ کے دوران کھلاڑی کو دی جاتی ہے" یا " یہ گالی سیاستدانوں کے لیے مخصوص ہے" وغیرہ
لیکن بات یہ بھی ہے کہ اگر گالیوں پر پابندی لگا دی جائے تو دنیا کی آدھی فلمیں ناکام ہو جائیں، آدھے ڈرامے بے رنگ ہو جائیں اور آدھی محفلیں بوریت کا شکار ہو جائیں ۔۔۔۔۔۔۔۔۔۔۔ کیونکہ گالی دراصل وہ " نمک مرچ" ہے جو گفتگو کو مزیدار بناتا ہے ۔۔۔۔۔۔۔۔ ذرا تصور کیجیے کہ اگر دوستوں کی محفل میں سب "مہذب" الفاظ بول رہے ہوں، تو کیا مزہ آئے گا ۔۔۔۔۔۔۔۔۔۔ گالی بظاہر برائی ہے لیکن یہ انسان کی جبلت اور معاشرتی رویوں کا آئینہ بھی ہے ۔۔۔۔۔۔۔۔۔ یہ ہمیں بتاتی ہے کہ ہم کہاں برداشت کھو دیتے ہیں، کہاں عورت کو عزت کا استعارہ سمجھتے ہیں، کہاں دلیل سے ہار کر زبان سے وار کرتے ہیں ۔۔۔۔۔۔۔۔۔ گالی دراصل ہماری ناکامی کا اعلان بھی ہے اور ہمارے مزاح کا ایندھن بھی ۔۔۔۔۔۔۔۔ یہی وجہ ہے کہ یہ ہمیشہ زندہ رہے گی، خواہ ہم کتنا ہی مہذب بننے کی کوشش کریں ۔۔۔۔۔۔۔۔ انسان کے منہ سے کبھی نہ کبھی نکل ہی جاتی ہے" اوے۔۔۔۔۔۔۔۔۔ پین دی سری " باقی آپ خود سمجھ دار ہیں
٭٭٭٭٭٭٭٭
|
|