پروفیسر سید رضا گیلانی۔ایک باغ و بہار شخصیت ۔۔۔۔۔۔۔۔۔۔۔۔۔۔ تحریر : ڈاکٹر اظہار احمد گلزار
(Dr.Izhar Ahmad Gulzar, Faisalabad, Pakistan)
|
پروفیسر سید رضا گیلانی۔ایک باغ و بہار شخصیت ۔۔۔۔۔۔۔۔۔۔۔۔۔۔ تحریر : ڈاکٹر اظہار احمد گلزار |
|
پروفیسر سید رضا گیلانی۔ایک باغ و بہار شخصیت
۔۔۔۔۔۔۔۔۔۔۔۔۔۔
تحریر : ڈاکٹر اظہار احمد گلزار
پروفیسر سید رضا گیلانی سادات خاندان کا ایک روشن چراغ، باغ و بہار شخصیت اور سراپا اخلاص و مروت انسان ہیں، جن کی پوری زندگی علم و تدریس کی روشنی پھیلانے اور مدحتِ مصطفیٰ ﷺ کو عام کرنے میں گزری ہے۔
آپ نے اپنی حیاتِ مستعار کا ایک طویل اور باوقار حصہ درس و تدریس کے شعبے کی نذر کیا۔ گورنمنٹ کالج آف ٹیکنالوجی فیصل آباد میں شعبہ مکینیکل کے سینئر استاد اور بعد میں ہیڈ آف ڈیپارٹمنٹ (HOD) کے طور پر ہزاروں تشنگانِ علم و فن کو زیورِ تعلیم سے آراستہ کیا۔ بعد ازاں، گورنمنٹ کالج آف ٹیکنالوجی سانگلہ ہل میں بطور پرنسپل تعیناتی کے دوران آپ نے اپنی قائدانہ اور انتظامی صلاحیتوں کا لوہا منوایا۔ آپ کی تربیت سے آراستہ شاگرد آج ملک و قوم کی خدمت میں مصروف اور باوقار زندگی گزار رہے ہیں۔ خندہ پیشانی، زندہ دلی اور شیریں کلامی پروفیسر صاحب کی شخصیت کا طرۂ امتیاز ہے۔ اپنے دلنشین رویے، مہربان اور مخلصانہ طبیعت کی وجہ سے آپ ہر دلعزیز ہیں اور دوسروں کے دلوں میں فوری جگہ بنا لیتے ہیں۔ سرکاری ملازمت سے ریٹائرمنٹ کے بعد بھی آپ کی زندگی کا ہر لمحات علم، ادب اور نعتِ رسول ﷺ کی خدمت سے معطر ہے۔
نعت خوانی اور عشقِ رسول ﷺ
پروفیسر سید رضا گیلانی ایک سچے عاشقِ رسول ﷺ، عاشقِ مدینہ اور عاشقِ نعت ہیں۔ اللہ تعالیٰ نے آپ کو لحنِ داؤدی اور دلکش آواز کا عطیہ بخشا ہے، جسے آپ نے بارگاہِ رسالت میں ہدیۂ عقیدت پیش کرنے کے لیے وقف کر رکھا ہے۔
سوز و گداز سے بھرپور نعت خوانی: آپ جب بھی کسی محفل میں نعت پڑھتے ہیں تو اپنے خاص سوز و گداز اور قلبی وابستگی سے سامعین کے دلوں میں حبِ رسول ﷺ کی شمع روشن کر دیتے ہیں۔
2000 کے قریب نعتیہ ریکارڈنگز:
آپ اب تک 600 کے قریب شعراءکے دو ہزار کے قریب نعتیہ کلام ریکارڈ کروا کر سوشل میڈیا کی زینت بنا چکے ہیں، جس کے ذریعے دنیا بھر کے شائقینِ نعت آپ کی آواز کا جادو محسوس کرتے ہیں۔ یہ بھی خاص بات ہے کہ آپ سوشل میڈیا سے کسی قسم کا کوئی مالی فائدہ نہیں اٹھا رہے۔
آپکی نعتیہ کتاب :
آپ کا ایک نعتیہ مجموعہ ۔۔ درِ اقدس پہ حالِ دل ۔۔بھی منظرِ عام پر آچکا ہے۔
ماہانہ نعتیہ مشاعرے:
آپ کا دولت کدہ نعت منزل حبِ نبی ﷺ کا مرکز بنا ہوا ہے۔ آپ ہر ماہ اپنے گھر پر باقاعدگی سے نعتیہ مشاعرے کا اہتمام کرتے ہیں، جس میں شہر بھر سے نعت گو شعراء کی کثیر تعداد شرکت کر کے اپنا کلام پیش کرتی ہے۔ اور خوش الحان نعت خواں اپنی سریلی آواز میں نعت خوانی کرتے ہیں۔
پروفیسر سید رضا گیلانی کا وجود ادب اور نعت خوانی کے میدان میں ایک عظیم اثاثہ ہے، جن کی زندگی علم، حسنِ اخلاق اور محبتِ رسول ﷺ کا حسین اور قابلِ تقلید امتزاج ہے ۔ |
|