سری لنکا ٹیم پر حملہ ، راََ کی سازش

دہشت گردی کی یہ واردات ہر لحاظ سے نہایت افسوسناک اور پوری پاکستانی قوم کے لیے لمحہ فکر ہے۔ سری لنکا نے بے مثال خیر سگالی اور دوستی کا مظاہرہ کرتے ہوئے ایک ایسے وقت میں اپنی ٹیم پاکستان بھیجی تھی جب دیگر ممالک پاکستان میں امن وامان کی صورتحال کو جواز بناکر کرکٹ ٹیمیں پاکستان بھیجنے سے انکار کر چکے تھے۔ لیکن سری لنکا کی ٹیم نہ صرف یہاں آئی بلکہ پہلے ون ڈے کھیلا اور دوبارہ آکر کراچی میں ٹیسٹ میچ بھی کھیلا۔ فوری طورپر تو اس سے پاکستان کی کرکٹ کو ناقابل تلافی نقصان پہنچا ہے اور اب برسوں تک کسی بیرونی ٹیم کی پاکستان آمد کی توقع نہیں رہی ہے۔یہ بات یاد رکھنی چاہیے کہ جب سری لنکا کی ٹیم نے پاکستان میں کھیلنے پرآمادگی ظاہرکی تھی تو بھارت نے بہت برا منایا تھا بھارت کے اخبارات اس کے گواہ ہیں کہ سری لنکا کی ٹیم کے پاکستان جانے کی مخالفت کی گئی تھی اور لاہور میں سری لنکا کی ٹیم پر حملہ کر کے ”را “ نے نہ صرف پاکستان کو ایک ناکام ریاست ثابت کرنے کی کوشش کی ہے بلکہ سری لنکا کو بھی بھارتی حکم عدولی اور انحراف کی سزا دی ہے اس موقع پر یہ یاد دلانا بے جا نہ ہوگا کہ 1971ءمیں بھارتی انٹیلی جنس کے ذریعہ گنگا طیارہ اغواء کروا کر اسے جواز بناکے بھارت نے اپنی فضائی حدود پاکستان کے لیے بند کر دی تھیں تاکہ مشرقی پاکستان سے فضائی رابطہ منقطع ہوجائے تو یہ سری لنکا ہی تھا جس نے اپنی فضائیں پاکستانی طیاروں کے لیے کھول دی تھیں۔ اس پر بھارتی وزیراعظم اندرا گاندھی نے سری لنکا کی حکومت سے سخت احتجاج کیا تھا مگر سری لنکا نے دباؤ کو مسترد کر کے دوستی کا ثبوت دیا۔ کرکٹ ٹیم کے معاملہ میں بھی یہی ہوا ہے۔ سری لنکا نے بھارت کا دباؤ قبول نہیں کیا تھا۔

جبکہ یہ بھی ایک حقیقت ہے کہ سری لنکا کی ٹیم پر حملے کے اثرات براہ راست پاکستان کی معیشت پر پڑیں گے کیونکہ جہاں پر مکمل سیکورٹی کے باوجود غیر ملکی کھلاڑی محفوظ نہ ہوں وہاں غیرملکی سرمایہ کار کیوں آئے گا؟ اور سری لنکن ٹیم پر حملہ پاکستان کو اقتصادی بدحالی کی جانب دھکیلنے کے لئے”را “ کی کامیاب سازش ہے ۔

دوسری جانب یہ بھی ایک حقیقت ہے کہ لاہور میں سر لنکن ٹیم پر حملے کی واردات میں کامیابی کے بعد اب ”را “ کے حوصلوں میں اضافہ ہوچکا ہے اور مزید وارداتوں کی جانب پیش قدمی کرے گا کیونکہ ملک کی موجودہ صورتحال میں سیاسی جماعتوں کا باہمی انتشار اور احتجاج و ہڑتال کی سیاست ”را “ کے مذموم مقاصد کیلئے سازگار ماحول فراہم کررہی ہے اس لئے ہوسکتا ہے کہ اب ”را “ کا اگلا نشانہ کراچی بنے مگر کراچی میں ”را “ لاہور یا ممبئی طرز کی واردات انجام نہیں دے سکتی اس مقصد کےلئے یا تو وہ بم دھماکوں کے ذریعے دہشت گردی پھیلائے گی یا پھر 12ربیع الاول کے موقع پر ’‘نشتر پارک “ طرز کا ایک اور وقوعہ انجام دے اسلئے کراچی میں جشن آمدِ رسول کے موقع پر ”را “ کی تخریبی کاروائیوں کو ناکام بنانے کے لئے بھرپور و فول پروف سیکورٹی انتظامات کی ضرورت ہے جبکہ ایک حقیقت یہ بھی ہے کہ ”را “ وکلا ﺀ لانگ مارچ اور دھرنے کو بھی نشانہ بناسکتی ہے یا پھر جس طرح ممبئی میں لوکل ٹرینوں میں بیک وقت 8دھماکوں کے ذریعے بھارت میں مسلم دہشتگردوں کی موجودگی کا ثبوت دینے کی کوشش کی گئی تھی بالکل اسی طرح وکلا مارچ میں شرکت کے لئے جانے والی ٹرینوں یا قافلوں کو بھی نشانہ بنایا جاسکتا ہے جبکہ سب سے زیادہ خطرہ لاہور اور اسلام آباد میں وکلاءمارچ اور دھرنے کو ہے کیونکہ ”را “ ہر صورت وکلاء مارچ و دھرنے کو نشانہ بنا کر حکومت ‘ وکلا ء‘ اپوزیشن اور سول سوسائٹی کو باہم متصادم کرکے پاکستان میں خانہ جنگی کرانے کی کوشش ضرور کرے گی اور وکلاء لانگ مارچ اس کی اس کوشش کے لئے سب سے زیادہ سازگار ماحول فراہم کررہا ہے ۔