"LOG MUHABBAT KARNE WALE" (Amjad
Islam Amjad) Ki Ek Bohat Khubsoorat Nazm Hai.Ye Un Tamam Logon Ke Naam Hai Jo
Insaniyat Se Muhabbat Karte Hain Aur Dharti Ko Jannat Ka Gosha Bana Dete Hain.
"LOG MUHABBAT KARNE WALE"
Khuwab Khooshi Ke Bo Jate Hain
Log Muhabbat Karne Wale
Zakhm Dilon Ke Dho Jate Hain
Log Muhabbat Karne Wale
Ban Jate Hain Naqsh Wafa Ka
Log Muhabbat Karne Wale
Jhonka Hain Be Chain Hawa Ka
Log Muhabbat Karne Wale
Jali Hui Dharti Per Jaise Badal Ghir Ker Aaen
Basti Per Hain Fazal Khuda Ka
Log Muhabbat Karne Wale
Purwa Sang Nikal Jate Hain
Log Muhabbat Karne Wale
Aankhon Aankhon Chal Parte Hain
Taron Ki Qandeel Liey
Chand Ke Saath Hi Dhal Jate Hain
Log Muhabbat Karne Wale
Dil Mein Phool Khila Dete Hain
Aag Mein Rag Jaga Dete Hain
Pani Beech Batashe Soorat
Khud Tou Ghulte Rehte Hain
Gham Ko Shehed Bana Dete Hain
Log Muhabbat Karne Wale
Titli Titli Lehrate Hain
Phoolon Ki Ummeed Liey
Ik Din Khushboo Ban Jate Hain
Log Muhabbat Karne Wale