منفرد خصوصیات کا حامل ہوائی جہاز اے 380

اکیسویں صدی کا آغاز ہوتے ہی شہری ہوابازی کی دنیا میں ایک ایسے پرندے نے آنکھ کھولی کہ اس کے سامنے بڑے بڑے شہباز بھی ممولے دکھائی دینے لگے۔ 27 اپریل 2005ء کی صبح پیرس میں ائیرشو کے ایک پیویلین میں لوگوں کا ٹھاٹھیں مارتا ہوا سمندر ایک ایسے جہاز کو دیکھنے کے لیے امنڈ آیا تھا، جسے ائیربس اے-380 کا نام دیا گیا تھا۔

اس جہاز کو فرانس کی ہی ایک طیارہ ساز کمپنی ائیربس نے متعارف کرایا تھا۔ اس سے قبل ائیربس کمپنی مختلف سائز اور ڈیزائن کے طیارے تیار کر چکی تھی جن میں اے-300،اے-310، اے-320، اے-340 اور اے-350 شامل ہیں اور اب ائیربس کمپنی کا آخری شاہکار عوام کی نظروں کے سامنے تھا۔ شہری ہوا بازی کی صنعت لامحدود ترقی کی منازل طے کرنے کی طرف گامزن ہے۔
 

اسی صنعت کا آخری طیارہ ائیربس اے800 -380 ہے جو اپنے اندر 853مسافروں کو بٹھا کر ہوا کے دوش پر جہاں چاہے اڑنے کے لیے پَر تول رہا ہے۔

1970ء سے لے کر 2005ء تک فضائی حکمرانی میں ابھی تک بوئنگ کمپنی کے 747 جمبوجیٹ کا طوطی بول رہا تھا۔ 2005ء میں ائیربس کمپنی نے ایک ایسا طیارہ متعارف کرایا کہ سول ایوی ایشن میں ایک زبردست انقلاب آگیا۔ دنیا کی تمام فضائی کمپنیوں اور مسافروں نے اِس طیارے کو دل و جان سے خوش آمدید کہا اور اس پذیرائی کا نتیجہ حقائق اور ہندسوں کی شکل میں نہایت چونکا دینے والا ہے۔ اس لیے اس جہاز کو سپرجمبوجیٹ کا بھی نام دیا گیا ہے۔

یہ دو منزلہ جہاز ہے۔ جس میں نشستوں کی کل تعداد 853 ہے۔ پہلی منزل میں 538 اور دوسری منزل میں 315نشستیں ہیں جو کہ سب کی سب اکانومی کلاس کے لیے ہیں۔

اگر جہاز کی دونوں منزلوں میں تینوں مروجہ یعنی فرسٹ کلاس، بزنس کلاس اور اکانومی کلاس کی نشستیں بھی لگائی جائیں تو مجموعی نشستوں کی تعداد 525 ہے جو کہ بوئنگ جمبوجیٹ 747 سے 100 نشست زیادہ ہے۔
 

ائیربس اے800-380 کے پرواز بھرتے اور اترتے وقت جمبوجیٹ سے 50 فیصد کم شور سنائی دیتا ہے۔ ائیربس اے-380 کا زیادہ سے زیادہ فضا میں دائرہ پرواز 15400کلومیٹر ہے یعنی یہ جہاز آرام سے نیویارک سے پرواز کرکے ہانگ کانگ تک بغیر کہیں رکے اپنی منزل تک پہنچ سکتا ہے۔ جبکہ نیویارک سے ہانگ کانگ کا فضائی فاصلہ 12983کلومیٹر ہے۔

یہ جہاز اتنا عظیم الجثہ ہے کہ اس کے آس پاس کھڑے ہوئے جہاز بھی اپنا دامن، منہ اور دم چھپانے پر مجبور ہوجاتے ہیں۔ یہ ائیربس سیریز کا فی الحال آخری جہاز ہے۔ ابھی آگے آگے دیکھیے ہوتا ہے کیا۔ گویا اب یہ ائیربس اے800-380 پوری دس بوگیوں والی ٹرین کی سواریاں اٹھا سکتی ہے۔

اگر ہم اسے ایک فضائی ٹرین بھی کہہ لیں تو کوئی مضائقہ نہیں۔ اس جہاز کی دونوں منزلوں میں 853مسافروں کی دیکھ بھال کرنے والے عملے کی تعداد 20 ہے۔ جن میں 12نیچے والی منزل میں اور 8 اوپر والی منزل میں اپنی اپنی ڈیوٹیاں سنبھالے کھڑے ہوتے ہیں۔ جبکہ کاک پِٹ میں ایک پائلٹ اور ایک اسسٹنٹ پائلٹ بیٹھتا ہے۔

جب 2005ء میں ائیربس کمپنی نے اپنا یہ جہاز متعارف کرایا تو اس کی کارکردگی دیکھ کر اکثر فضائی کمپنیوں نے اس میں دلچسپی لینا شروع کردی۔ ان فضائی کمپنیوں میں سب سے پہلے جنوبی ایشیا کے چھوٹے سے جزیرے سنگاپور کی ائیرلائن نے ائیربس کی پیشکش کو قبول کیا اور پھر سنگاپور ائیرلائن نے 2007ء میں ائیر بس اے-380 کو اپنے فضائی بیڑے میں شامل کرلیا۔
 

اس طرح سنگاپور ائیرلائن سپرجمبوجیٹ اے-380 کو خریدنے والی پہلی کمپنی بن گئی۔ اس کے بعد تو گویا ائیربس انڈسٹری کے پاس اے-380 کے آرڈرز کی لائن لگ گئی۔ اگست 2012ء تک دنیا کی 257فضائی کمپنیوں نے اے-380 خریدنے کا آرڈر دے دیا ہے اور ان کمپنیوں میں اے-380 کی سب سے بڑی خریدار امارات ائیرلائن ہے جس نے 90 اے-380 جہاز خریدنے کا آرڈر دیا ہے۔

ائیربس اے-380 کی پیداوار شروع ہونے سے لے کر ستمبر 2012ء تک 81 جہاز دنیا کی فضائی کمپنیوں نے خرید لیے ہیں اور بڑی کامیابی سے وہ جہازوں سے فائدہ اٹھا رہی ہیں۔ ان میں سنگاپور ائیرلائن، ایمیریٹس (امارات)، کونیٹس ، لفتھانسا، ائیرفرانس، کورین ائیرلائن، ملائیشین ائیرلائن اور چائنا ساﺅدرن ائیرلائن بھی شامل ہے۔ 2007ء سے 2010ء تک پہلے تین سال ڈیڑھ کروڑ مسافر ان جہازوں میں سفر کر چکے ہیں۔

سنگاپور ائیرلائن نے 25اکتوبر 2007ء کو اے-380 سے اپنی پہلی پرواز کا آغاز سنگاپور سے سڈنی کے لیے کیا۔ ایمیریٹس دوسری فضائی کمپنی تھی جس نے دبئی سے نیویارک کے لیے اپنی پہلی نان سٹاپ پرواز اگست 2008ء میں شروع کی۔ کونیٹس (آسٹریلین فضائی کمپنی) نے 19ستمبر 2008ء کو اپنی پہلی پرواز ملبورن سے لاس اینجلز تک چلائی اور ملائیشین ائیرلائن نے جولائی 2012ء کو کوالالمپور سے لندن تک نان سٹاپ پہلی پرواز کا آغاز کیا۔

2008ء کے آخر تک ائیربس اے-380 کی پروازوں میں ۸لاکھ مسافر سفر کر چکے تھے اور 2200پروازوں کے 21000گھنٹے فضا میں ہی گزرے۔ اے-380 میں بورڈنگ کے وقت مسافروں کو ان کی نشستوں پر بٹھانے کے لیے صرف 34منٹ درکار ہوتے ہیں۔ جبکہ جمبوجیٹ 747 جو کہ ائیربس اے-380 سے بہت چھوٹا جہاز ہے، اس میں مسافروں کو سوار کرانے کے لیے کم از کم 45منٹ کا وقت لازمی صرف ہوتا ہے۔

اس طرح کے عظیم الجثہ اور دیوہیکل جہاز بنانے کا خیال اس سے قبل بوئنگ کمپنی کو بھی آیا تھا، لیکن نہ جانے کن خدشات کے پیشِ نظر بوئنگ کمپنی نے یہ منصوبہ 1993ء میں ختم کردیا۔ لیکن یہ ائیربس کمپنی ہی تھی جس نے اتنا بڑا مسافر طیارہ بنانے کے خواب کو تعبیر دی۔ اس اے-380 جہاز میں بیٹھے ہوئے مسافروں کو ہر تین منٹ کے بعد بالکل تازہ بہ تازہ ہوا مل جاتی ہے۔ جس سے مسافروں کو اپنی منزل پر اترتے وقت بہت کم تھکان کا احساس ہوتا ہے۔