|
ایک سات سالہ بچے کا نام دنیا کے کم عمر ترین آئی ٹی
ایکسپرٹ کے طور پر گنیز بُک آف ورلڈ ریکارڈ میں شامل کیے جانے کا امکان ہے۔
"Ripley's Believe It or Not" نے اس بچے کو ’ونڈر بوائے‘ یعنی حیران کن بچے
کا نام دیا ہے۔
|
|
|
|
ڈوئچے ویلے کی رپورٹ کے مطابق واثق فرحان روپ کوتھا جب ایک برس کا ہوا تو
اس کا پسندیدہ ترین کھلونا کمپیوٹر ہی تھا۔ اور اب وہ دنیا کا کم عمر ترین
کمپیوٹر پروگرامر بن گیا ہے۔ 27 جنوری 2006ء کو پیدا ہونے والے واثق نے حال
ہی میں بنگلہ دیشی دارالحکومت ڈھاکہ میں انفارمیشن ٹیکنالوجی کے ماہرین اور
صحافیوں کے سامنے اپنی مہارت کا مظاہرہ کیا۔ کمپیوٹر پروگرامنگ کے اس
مظاہرے کی ویڈیو ریکارڈنگ کی گئی اور اسے بغیر کسی ایڈیٹنگ کے گنیز بُک آف
ورلڈ ریکارڈ کی انتظامیہ کو بھیجا گیا۔
واثق کی والدہ سِنتھیا فرحان رِشا نے ڈوئچے ویلے سے گفتگو کرتے ہوئے بتایا،
’’ویڈیو ملنے کے بعد گنیز والوں نے مجھے کچھ کاغذات بھجوائے ہیں کہ میں ان
پر دستخط کر دوں۔‘‘ رشا کے مطابق واثق کمپیوٹر کے ساتھ اس وقت سے کھیل رہا
ہے، جب وہ محض ایک برس کا تھا اور دو برس کی عمر میں اس نے ایم ایس ورڈ
استعمال کرنا شروع کر دیا تھا۔
رشا کے مطابق، ’’واثق نے ایک برس قبل بعض پروگرامنگ لینگوئیجز میں کام شروع
کیا۔ انہی میں سے ایک سی پلس پلس بھی ہے، جسے سب سے زیادہ پیچیدہ کمپیوٹر
پروگرامنگ لینگویج سمجھا جاتا ہے۔‘‘
|
|
|
ڈھاکہ کی انفارمیشن ٹیکنالوجی سے متعلق ایک کمپنی ’کریئیٹیو آئی ٹی لمیٹڈ‘
کے منیجنگ ڈائریکٹر منیر حسین بھی اس وقت وہاں موجود تھے، جب واثق اپنی
مہارت لوگوں کے سامنے پیش کر رہا تھا۔ ڈی ڈبلیو سے بات کرتے ہوئے ان کا
کہنا تھا، ’’مجھے یہ تو نہیں معلوم کہ واثق، سی لینگوئیج کس حد تک جانتا ہے
مگر جو کچھ اس نے کر کے دکھایا، وہ حیران کن تھا، خاص طور پر اس عمر کے بچے
کے لیے۔ میں واقعی حیران ہوں کہ اس عمر کا بچہ کیسے کمپیوٹر پر کوڈ لکھ رہا
ہے اور مسائل حل کر رہا ہے۔‘‘
رِشا کے مطابق ان کا بیٹا آسانی کے ساتھ آپریٹنگ سسٹمز انسٹال کر سکتا ہے،
کمپیوٹر سے متعلق مسائل حل کر سکتا ہے اور کسی ماہر کی رفتار سے ٹچ ٹائپنگ
کر سکتا ہے۔ ان کا کہنا تھا کہ واثق نے کبھی آئی ٹی کے اسباق حاصل نہیں کیے،
جو کچھ بھی اس نے سیکھا ہے، وہ خود ہی سیکھا ہے: ’’جب بھی وہ کچھ جاننا
چاہتا ہے، وہ سیدھے وکی پیڈیا پر چلا جاتا ہے۔‘‘
واثق کی والدہ رِشا کے مطابق، ’’اس کے منصوبے کافی بڑے ہیں۔ وہ اپنا
کمپیوٹر آپریٹنگ سسٹم تیار کرنے کا ارادہ رکھتا ہے۔ اسے ونڈوز کے مختلف
ورژنز کے بارے میں بھی مکمل معلومات ہیں۔‘‘
|
|
|
’رِپلیز بیلیو اِٹ اور ناٹ‘ والوں نے پہلے ہی واثق کے والدین کو مطلع کر
دیا ہے کہ وہ اس بچے کا نام رواں برس ستمبر میں شائع ہونے والی اپنی سالانہ
ریکارڈ بُک میں شامل کریں گے۔ اب اس بات پر بھی غور کیا جا رہا ہے کہ واثق
فرحان کا نام اسکول کی کتابوں میں شامل کیا جائے تاکہ ملک کے دیگر بچوں میں
بھی اس جیسا ولولہ پیدا ہو سکے۔ |