|
چین میں ایک شخص کی پیشانی کے قدرے بائیں حصے پر ہو بہو
انسانی ناک چسپاں ہے جو اب اس کے جسم کا حصہ بن چکی ہے۔ یہ ناک اب بہت جلد
اس کی اصلی ناک کی جگہ لگائی جائے گی جو ایک حادثے میں متاثر ہوچکی ہے۔
ڈان نیوز کے مطابق یہ شخص ایک حادثے کا شکار ہوا تھا جس میں اس کی ناک کو
شدید نقصان پہنچا تھا۔ اس کے بعد رہی سہی کسر انفیکشن نے پوری کردی اور اس
کی ناک کا بہت بڑا حصہ ضائع ہوگیا یہاں تک کہ ڈاکٹر بھی کچھ کرنے سے قاصر
رہے۔ اس کے بعد ڈاکٹروں کی ٹیم نے اس کے ماتھے پر ایک بالکل نئی ناک اُگانے
کا فیصلہ کیا۔
|
|
|
|
نیویارک میں لینکس ہل ہسپتال کے پلاسٹک سرجن ڈاکٹر ڈیوڈ کینگیلو کے مطابق
یہ طریقہ پلاسٹک سرجری سے مختلف نہیں ۔
‘ میں اسے ان اصولوں کا ایک مختلف استعمال ہی کہوں گا جو اعضا کی تیاری میں
عمومی طور پر متعارف کرائے گئے ہیں،’ انہوں نے کہا۔
ماتھے کا ناک
ڈاکٹروں نے اس کیلئے پیشانی کی کھال کے نیچے مختلف ٹشو کو پھیلانے والی
اشیا استعمال کیں جو غالباً سکرو یا دھاتی پلیٹ ہوسکتی ہیں تاکہ متاثرہ شخص
کی کھال پھیل جائے۔ پھر اس کی پسلیوں کی کرکری ہڈی (کارٹلیج) لے کر ناک میں
بھردی۔ ناک تیار ہونے کے بعد اس میں خون کی نلیوں جلد اور دیگر اشیا شامل
کی جائیں گی تاکہ موجودہ ناک کی جگہ ایک نئی ناک لگائی جاسکے۔
ڈاکٹروں کے مطابق اس وقت ناک سازی کے جو طریقے رائج ہیں یہ اس سے کچھ مختلف
ہے۔ اس میں نہ صرف ٹشو پھیلانے والے خاص طریقے استعمال کئے جائیں گے بلکہ
ناک کو مختلف انداز میں بٹھایا جائے گا۔
ناک کو ماتھے پر اگانے کی وجہ بیان کرتے ہوئے ڈاکٹروں نے کہا کہ ناک کا
تعلق چہرے سے ہونے کی بنا پر وہیں کے ٹشو لئے گئے اور اس کیلئے ماتھے کا
انتخاب کیا گیا۔
|
|
|
پھر پیشانی میں خون کی اتنی ساری چھوٹی بڑی رگیں ہوتی ہیں کہ وہ ناک کی
افزائش کیلئے بہت مؤثر ہوتی ہیں اس کی بجائے اگر یہ ناک بازو یا ران پر
تیار کرنی ہوتی تو اس کیلئے مائیکرو سرجری کے کئی مراحل سے گزرنا پڑتا ۔
تاہم ماہرین سب سے زیادہ اس بات کیلئے فکر مند ہیں کہ یہ دیکھنے میں ہی ناک
نہ لگے بلکہ یہ اس کی طرح کام بھی کرسکے۔ |