21 سالہ پاکستانی عمر جہانگیر “گلوبل شیپر”

کتنے لوگ ایسے ہیں جنھیں 21 سال کی عمر میں ورلڈ اکنامک فورم میں پہنچ کر عالمی ایجنڈے طے کرنے کا موقع ملتا ہوگا؟ اس معاملے میں پاکستان کے نوجوان طالب علم اور کاروباری عمر انور جہانگیر منفرد ضرور ہیں۔

بی بی سی کی رپورٹ کے مطابق عام طور پر ورلڈ اکنامک فورم کے دروازے سب کے لیے آسانی سے نہیں کھلتے۔ عمر نے نہ صرف اس دروازے کو وا کیا بلکہ اس فورم کے مخصوص فورم ’گلوبل شیپر‘ یعنی دنیا کو نئی شکل و سمت عطا کرنے والے لوگوں میں بھی شامل ہو گئے۔
 

واضح رہے کہ اس میں دنیا کے بہترین 50 نوجوان تیز ذہنوں کو شامل کیا جاتا ہے۔

عمر انور میڈیکل کی تعلیم حاصل کر رہے ہیں۔ انھوں نے ساتھی طالب علموں کے ساتھ مل کر کراچی میں ’بحریہ میڈكس‘ نام کی ایک تنظیم بنائی ہے جو طبی میدان میں فلاحی کام کرتی ہے۔

عمر انور بحریہ کے اہم پالیسی ساز اور منتظم ہیں۔ اس کے تمام کاموں مثلاً بلڈ بینک کے قیام، میڈیکل کیمپ انتظام اور ادارے کے لیے مداد حاصل کرنے میں وہ پیش پیش رہتے ہیں۔

برطانوی اخبار ٹیلی گراف سے بات کرتے ہوئے عمر نے کہا کہ ’میں کم عمری سے ہی لوگوں کی مدد کرنا چاہتا تھا۔ ہر چند کہ میری عمر کو دیکھ کر لوگ کہتے تھے کہ مجھے انتظار کرنا چاہیے لیکن میرا خیال یہ ہے کہ جو کرنا ہے وہ کرو، کل پر مت ٹالو۔‘

عمر نے جب اپنا فلاحی کام شروع کیا تو عام طور پر ان کی حوصلہ شکنی کی گئی۔ لوگوں نے کہا کہ وہ وقت برباد کر رہے ہیں، اس سے ان کی میڈیکل کی تعلیم متاثر ہو جائے گی لیکن وہ لوگوں کی پروا کیے بغیر اپنے مقصد کے حصول میں لگے رہے۔