23 مارچ ٬1940 پسِ منظر اور چند حقائق

23 مارچ 1940 وہ یادگار دن جب مسلمانانِ برصغیر نے الگ وطن کے خواب کو ایک تحریری شکل میں پیش کردیا جس کو قرار دادِ لاہور یا قراردادِ پاکستان کہا جاتا ہے۔ اگرچہ برصغیر میں انگریزوں سے آزادی کی تحریک تو 1770ء کے لگ بھگ شروع ہوچکی تھی، جب شیر میسور ٹیپو سلطان شہید نے انگریزوں کے خلاف جنگ کرتے ہوئے جامِ شہادت نوش کیا تھا۔ اس کے بعد بھی برصغیر کے مختلف خطوں میں مزاحمتی تحریکیں اور بغاوتیں اٹھتی رہیں مثلاً 1804؁ میں مدراس میں انگریزوں نے ہندستانی سپاہیوں کے پر پریڈ کے دوران تلک لگانے اور صافہ باندھنے پر پابندی لگائی، اس حکم پر ہندو سپاہیوں میں اشتعال پھیل گیا اور انہوں نے بغاوت کردی، 1824؁ میں بیرک پور میں بغاوت برپا ہوئی ،اسی طرح 1842؁ میں بنگال کی چار رجمنٹوں نے سندھ جانے سے انکار کردیا،1849؁، راولپنڈی اور پنجاب میں جبکہ 1852؁ میں بنگال میں فوجی بغاوتیں ہوئیں۔ 1857 ء میں ایک بار پھر مسلمانوں اور انگریزوں کے درمیان ایک معرکہ پیش آیا، اس میں مسلمانوں کو شکست ہوئی ، برصغیر میں مسلمانوں کے اقتدار کا سورج ڈوب گیا، مغلیہ دور حکومت کا خاتمہ ہوا، بوڑھے کمزور بادشاہ بہادر شاہ ظفر کی نظروں کے سامنے اس کے تین بیٹوں کو گولی مار کر شہید کردیا گیا،بادشاہ کو رنگون کے قلعے میں قید کرلیا گیا اور غاصب قوم نے ہندستان پر اپنے قبضے کو مستحکم کرلیا۔

چونکہ انگریزوں نے مسلمانوں سے اقتدار چھینا تھا اس لئے وہ بجا طور پر مسلمانوں کو اپنا حریف سمجھتے تھے۔اسی وجہ سے 1804 تا 1852 کے دوران ہونے والی فوجی بغاوتوں میں صرف بغاوت میں ملوث فوجیوں کو سزائیں سنائی گئیں لیکن1857؁ میں مسلمان فوجیوں کی جانب سے ہونے والی بغاوت کے بعد انگریزوں نے صرف فوجیوں کو نہیں بلکہ عام مسلمانوں کا قتل عام کیا، مسلمانوں کے گاؤں کے گاؤں جلا ڈالے گئے۔دوسری جانب انگریزوں نے مسلمانوں کے مقابلے میں ہندوؤں کو نوازنا شروع کیا۔ اگرچہ برصغیر میں مسلمانوں کا دور اقتدار قریباً ایک ہزار سال پر محیط تھا اور اس ایک ہزار میں مسلمانوں نے ہندوؤں کے ساتھ رواداری اور محبت کا سلوک روا رکھا لیکن ہندو ہمیشہ مسلمانوں کو غاصب اور حملہ آور سمجھتے رہے ، اسی لیے جب انگریزوں نے مسلمانوں کے مقابلے میں ہندوؤں کو نوازنا شروع کیا تو ہندوؤں نے اس کو مسلمانوں سے بدلہ لینے کا موقع جانا اور انگریزوں کے ساتھ مل کر مسلمانوں کو دیوار سے لگانے کا عمل شروع کردیا۔
 

سرسید احمد خان نے 1857 ؁ کے بعد مسلمانوں کو بیدار کرنے اور ان کو حالات کا مقابلہ کرنے کے لیے تیار کرنا شروع کیا۔ حقیقت یہ ہے کہ سر سید احمد خان کا تحریک پاکستان میں ایک بہت بڑا حصہ ہے کیوں کہ تقریباً چالیس سال بعد جب مسلمانوں نے علیحدہ وطن کی تحریک شروع کی تو اس کے قائدین میں اکثریت علی گڑہ کے فارغ التحصیل تھے، علی گڑھ کے طلبہ نے قیام پاکستان کے لیے جدو جہد کی اورعلامہ اقبال ؒ ، قائد اعظمؒ و دیگر قائدین اگرچہ علی گڑھ سے فارغ التحصیل نہیں تھے لیکن درحقیقت یہ سر سید احمد خاں کا کارنامہ تھا کہ مسلمان انگریزی اور جدید تعلیم حاصل کرنے کے لیے تیار ہوئے اور یہی چیز بالآخر ان کے کام آئی ۔

1857؁ کی جنگ آزادی کی ناکامی کے بعد مسلمانوں نے اور ہندؤں نے مشترکہ طور پر انگریزوں کے خلاف جہدوجہد کرتے رہے لیکن بعد میں جلد مسلمانوں پر یہ حقیقت آشکار ہوگئی کہ ہندومسلمان کا خیر خواہ نہیں بلکہ وہ انگریزوں کو برصغیر سے نکالنے کے بعد ہندو راج کے خواب دیکھ رہا ہے۔ 1885؁میں ایک انگریز لارڈ ہیوم کی ایما ء پر آل انڈیا کانگریس قائم کی گئی ۔ہندوؤں نے کانگریس کے ذریعے اپنی سیاسی جدو جہد کا آغاز کیا اور مسلمانوں کو بھی اپنے ساتھ شامل ہونے کی دعوت دینی شروع کی ، مسلمانوں نے کانگریس میں شمولیت اختیار بھی کی اور کئی نامور مسلمان رہنماؤں کا تعلق آل انڈیا کانگریس سے تھا ۔بہت جلد مسلمانوں پر یہ واضح ہوگیا کہ کانگریس صرف ہندوؤں کے مفاد دات کا تحفظ کرنے کے لیے قائم کی گی ہے ۔ جولائی 1903میں مسلمانوں نیاپنے مسائل کے حل اور حقوق کے تحفظ کے لیے ایک جماعت محمڈن پالیٹیکل ایسوسی ایشن کے قیام کا اعلان کیا اور یہ تنظیم ایک حد تک مسلمانوں کے حقوق کے لیے اپنا کردار ادا کرتی رہی، بعد میں اس تنظیم کا نام محمڈن نیشنل یونین کرلیا گیا۔مارچ 1906 ؁ میں مسلم لیگ کا باقاعدہ قیام عمل میں آیا اور مسلمانوں نے اپنی سیاسی جدجہد کا باقاعدہ آغاز کرلیا۔

1857 سے 1937 کے درمیان ایسے واقعات ہوئے جنہوں نے مسلمانوں کو یہ سوچنے پر مجبور کردیا کہ برصغیرسے صرف انگریزوں کے جانے بعد انہیں ہندوؤں کے زیر نگین رہنا ہوگا۔ان میں چند قابل ذکر یہ ہیں، ہندی ( دیو ناگری ) رسم الخط کی تحریک، تقسیم بنگال کے خلاف ہندوؤں کی تحریک، شدھی سنگھٹن تحریک وغیرہ لیکن 1937 کے عام انتخابات میں کانگریس کی کامیابی کے بعد جب انہیں حکومت بنانے کا موقع ملا تو انہوں نے کھل کھلا مسلمانوں کے خلاف اقدامات کیے۔جن کو مختصراً ذیل میں بیا ن کیا جارہا ہے۔