|
وعدے۔۔۔۔۔۔ جھوٹ۔۔۔۔۔۔۔ سب جھوٹ‘ فریب مگر ہر کوئی‘ ان کی
گرفت میں آ جاتا ہے۔ وعدوں کے دامن میں‘ امیدوں کے خوش رنگ اور خوش مہک
پھول‘ مسکراہٹ بکھیر رہے ہوتے ہیں۔ میں بھی‘ وعدوں کے گرداب میں پھنس گیا۔
کوئی مجھے کیوں سمجاھتا۔ میں سمجھنا ہی نہیں چاہتا تھا۔ ہدایت اسی کے لیے
ہوتی ہے‘ جو ہدایت کا طلب گار ہوتا ہے۔ اب مجھے کوئی کیوں‘ تسلی دیتا پھرے۔
میں تو‘ جھوٹ کی ظلمتوں کا مسافر تھا۔ جب سچ کا سویرا ہوا‘ دامن دیکھا‘ تار
تار تھا۔ دنوں ہاتھ خالی۔۔۔۔۔ خلا کی وسعتوں کی طرح۔۔۔۔۔۔۔ رونا چاہا رو نہ
سکا۔ چیخنا چاہا‘ چیخ نہ سکا۔ حلق میں بےکسی اور بےکسی کے کانٹے پیوست ہو
گیے تھے۔
میرے رنج۔۔۔۔۔ کچھ موہوم اور نامعلوم سی یادیں۔۔۔۔۔۔ ویران وپشیمان آنکھیں۔۔۔۔۔۔
زخمی اور نیم مردہ دل۔۔۔۔۔ بس یہ ہی کچھ باقی رہ گیا تھا۔ زندہ لمحموں میں۔۔۔۔۔۔
ان کی کوئی اوقات نہیں ہوتی۔۔۔۔۔۔ کچھ کہتا ہوں‘ تو رسوائی کے۔۔۔۔۔۔ گہرے
کھڈ میں گرتا ہوں۔ گرہ میں خلوص ومحبت کا مال ہوتے ہوئے۔۔۔۔۔ میں ناکام
ٹھہرا ہوں۔۔۔۔۔۔ نہیں جانتا‘ کھرے سکے۔۔۔۔۔ عملی زنندگی میں‘ کھوٹے اور
بےدام کیوں ٹھہرے ہیں۔۔۔۔۔ کیوں۔۔۔۔۔آخر کیوں؟!
صغراں! تم نے فریب کیا۔۔۔۔۔ مجھے اپنے مکروفریب کا نشانہ بنایا۔۔۔۔۔ تمہارے
چہرے کی عیار مسکان میں‘ خودغرضی ملفوف تھی۔ بہ ظاہر اس میں‘ دور تک لالچ
کا کہرا موجود نہ تھا۔ میں تمہیں پوترتا کی علامت سمجھتا رہا۔ جانے
مکروفریب اور چھل۔۔۔۔۔ زندگی کے کیوں ضابطے قرار پائے ہیں۔ سچ کا
سورج۔۔۔۔۔۔ اپنی لاچارگی پر۔۔۔۔۔ لہو روتا ہے۔۔۔۔۔۔۔ وہ زندہ ہے‘ لیکن
مردوں کی سی زندگی کرتا ہے۔۔۔۔۔۔ وہ تو فریاد کا بھی حق نہیں رکھتا۔ اتنا
بےبس۔۔۔۔۔۔ بے کس۔۔۔۔۔ شاید ہی کوئی رہا ہو گا۔ اس کے لیے تو۔۔۔۔۔۔۔ کسی
نے۔۔۔۔۔۔۔ چلو بھر پانی بھی نہیں رہنے دیا۔
نور! مجھے معاف کر دینا۔۔۔۔۔ میں نے تمہیں ذلیل کیا۔۔۔۔۔۔ مجھے صغراں کی
عیار مسکرااہٹیں عزیز تھیں۔۔۔۔۔ تم۔۔۔۔۔۔ ہاں تم۔۔۔۔۔۔۔ میرے ہاتھوں بےوقار
ہوتی رہیں۔ میری آنکھیں‘ اصلی اور نقلی کی پہچان سے‘ محروم ہو گئی تھیں۔ ان
میں‘ لایعنیت کا موتیا اتر آیا تھا۔ تم تھیں‘ کہ میرا ساتھ کبھی اور کسی
موڑ پر نہ چھوڑا۔ تمہارا وجود ۔۔۔۔۔ برداشت کے رستوں کے لیے۔۔۔۔۔۔ سنگ میل
کا درجہ رکھتا ہے۔ صبر اور برداشت ناقابل تسخیر ہیں۔ یہ ہمالہ کی سر بہ فلک
چوٹیوں کو بغل میں لے کر چلتے ہیں۔ اگر یہ نہ ہوتے تو زندگی کب کی دم توڑ
چکی ہوتی۔ زمین پر ویرانی کی حکم رانی ہوتی۔۔۔۔۔ ہانپتی کانپتی روحوں
کو۔۔۔۔۔۔ ان سے حرات اور شکتی میسر آتی ہے۔ ساری تابانیاں ان ہی کے دم تو
سے ہیں۔
ساری روشنیاں ان ہی کے دم سے تو ہیں۔
لوگو! جان لو‘ کسی بھول میں نہ رہنا۔۔۔۔۔۔ میں جھوٹ کا سوداگر ہوں۔۔۔۔۔ میں
عیار مسکراہٹیں خرید کرتا ہو۔
مجھ سے‘ ہر سودگر کی گرہ کے سکے۔۔۔۔۔۔ کھرے ہو کر بھی‘ کھوٹے ہوتے ہیں۔
جھوٹ کے خریددار‘ سکوں کو کھرا کہنا کھلی بددیانتی ہے۔ جھوٹ معنویت سے تہی
ہوتا ہے۔ اٹھو‘ خدا کے لیے اٹھو‘ جھوٹ کی تجوری کی‘ اینٹ سے اینٹ بجا دو۔
اسی میں پوری انسانیت کی بھلائی پوشیدہ ہے۔ اٹھو‘ جلدی کرو کہیں دیر نہ ہو
جائے۔ سچ کا سورج۔۔۔۔۔عیار مسکانوں کی صلیب پر‘ مصلوب ہو جائے گا۔ چار سو
اندھیروں کے سوا کچھ نہیں ہو گا۔
مجھے کند چھری سے ذبح کرو۔۔۔۔۔ میں نور کے صبر کا قاتل ہوں۔ جھوٹ کا ہر
خریدار اسی سزا کا مستحق ہے۔۔۔۔۔۔ میں سراپا جھوٹ ہوں۔۔۔۔۔۔ مجھے معاف کرو
گے‘ تو۔۔۔۔۔۔ عیار مسکانوں کا کاروبار جاری رہے گا۔۔۔۔۔ نور سی صابر
عورتیں‘ ناکردہ جرم کی سزا بھگتی رہیں گی۔۔۔۔۔ ان کا کوئی پرسان حال نہ ہو
گا۔۔۔۔۔۔ حق دار کو‘ کبھی اس کا حق نہ مل سکے گا۔ جبر کی گرم بازاری‘ ختم
نہ ہو گی۔ ملاوٹ شدہ پوترتا کے‘ مکروہ چہرے سے۔۔۔۔۔۔۔ گھونگھت کیسے اٹھے
گا۔ لوگ‘ پیتل اور سونے میں‘ پہچان کیسے کریں گے۔ میری موت۔۔۔۔۔۔ اور زندگی
کے چوراہے پر لٹکی لاش۔۔۔۔۔۔ نور کے صبر کے لیے‘ پرسا ہو گی۔۔۔۔۔۔۔ یہ ہی
نہیں۔۔۔۔۔ مکار پوترتا ۔۔۔۔۔۔۔عیار مسککانوں کے‘ ہر سوداگر کو‘ کان ہو
جائیں گے۔۔۔۔۔۔۔ ایک کی موت‘ بہتوں کو نفع دے گی۔۔۔۔۔۔۔ سچ تو یہ ہی ہے‘ کہ
یہ صبر کی گرہ میں۔۔۔۔۔۔ اس کی کٹھور تپسیا کا انعام ہو گا۔۔۔۔۔۔ صلہ اور
عوضانہ ہو گا۔ اسے عوضانہ ملنا چاہیے۔۔۔۔۔۔۔اس کے لیے ناسہی۔۔۔۔۔۔ میرے
ساتھ‘ بہت بڑا پن ہوگا۔ مجھے پچھتاوے کی دہکتی آگ سے‘ مکتی مل جائے گی۔۔۔۔۔
اب یہ آگ‘ میں سہن نہیں کر پا رہا۔۔۔۔۔۔ میری برداشت کی کمر ٹوٹ چکی ہے۔
میں ہی نہیں‘ ہر کوئی مکتی کے لیے سرگرداں ہے۔
مانتا ہوں‘ اس میں میرا اپنا سواد پنہاں ہے۔ یادوں کی اذیت ناکی‘ بڑی خوف
ناک ہوتی ہے۔ زندگی سے موت تک کا سفر۔۔۔۔۔۔۔۔مشکل بنا دیتی ہیں۔۔۔۔۔جینے
نہیں دیتیں۔۔۔۔۔۔مرنے نہیں دیتیں۔۔۔۔۔۔۔زندگی کے ہر موسم کی سانجھ چھین
لیتی ہیں۔۔۔۔۔۔اور۔۔۔۔۔۔۔
اوہ یار طارق۔۔۔۔۔۔۔اب چپ ہو جاؤ۔۔۔۔۔۔ خدا کے لیے چپ ہو جاؤ۔ گھڑی دیکھو‘
رات کے دو بج چکے ہیں۔ صبح دفتر بھی جانا ہے۔ میں تمہاری یہ بکواس کب تک
سنتا رہوں گا۔ گولی مارو صغراں اور اس کی یادوں کو۔۔۔۔۔ کیا رکھا ہے ان
باتوں میں۔ اب تمہیں‘ نور پر ہونے والی زیادتیوں کے‘ مدوے کے لیے زندہ رہنا
ہو گا۔ آوارہ لفظوں کے خول سے‘ نکل کر‘ حقیقت کی دنیا میں آؤ۔۔۔۔۔۔ جھوٹ
دھوکہ اور فریب کی عمر لمبی نہیں ہوتی۔
طارق نے اپنی کہہ دی تھی۔ اس کے من کا بوجھ‘ ہلکا ہو چکا تھا۔ میرے لفظ‘
زندگی سے معمور نہ تھے‘ پھر بھی‘ مرہم کا کام کر گیے۔ میں دیکھا‘ طارق گہری
نیند سو چکا تھا‘ جیسے کچھ ہوا ہی نہ ہو۔
یکم دسمبر ١٩٧٣
بروز ہفتہ
بوقت ٢٠٤٠
|