ملائیشیا: لاپتہ طیارے کے بلیک باکس سگنل موصول٬ اہم پیش رفت

لاپتا ملائیشیا کے طیارے کے بلیک بکس سگنل کے بعد آسٹریلیا نے بھی اپنے بحری جہاز روانہ کر دئیے ہیں، بلیک باکس سے نئے سگنل ملنے کے بعد لاپتا ملائیشین طیارے کی تلاش کا مرکز جنوب کی طرف منتقل کردیا گیا۔

سماﺀ نیوز کے مطابق چینی کوسٹ گارڈ جہاز نے بحر ہند کے جنوبی پانیوں میں بلیک بکس کے سگنلز کی نشاندہی کی، شہبہ ظاہر کیا جارہا ہے کہ یہ سگنلز ملائشین طیارے کے ہوسکتے ہیں۔ ملائشیا کے حکام نے چینی جہاز کو ملنے والے سگنلز کی تصدیق نہیں کی،چینی طیارے کو بحر ہند کے جنوب میں سفید رنگ کی چیزیں تیرتی ہوئی بھی دکھائی دی ہیں جس کی تصدیق کے لیے آسٹریلیا نے اپنے بحری جہاز روانہ کردئیے ہیں۔
 

جبکہ بی بی سی کی شائع کردہ ایک رپورٹ کے مطابق ملائیشیا کے لاپتہ طیارے ایم ایچ 370 کی تلاش کے عالمی کوششوں میں معاون آسٹریلوی حکام نے کہا ہے کہ چین کے بحری جہاز کو 24 گھنٹے میں دوسری بار ایک سگنل موصول ہوا ہے۔

ریٹائرڈ ایئر چیف مارشل اینگس ہاسٹن نے کہا ہے کہ جنوبی بحر ہند میں ملنے والے سگنل ’اہم اور حوصلہ افزا پیش رفت‘ ہے۔

کوالالمپور سے بیجنگ جانے والا یہ مسافر بردار طیارہ آٹھ مارچ کو لاپتہ ہوا تھا اور اس پر 239 افراد سوار تھے جن میں بیشتر چینی باشندے تھے۔

آسٹریلوی حکام کے مطابق چین کے بحری جہاز ہائشون 01 جسے سنیچر کو ایک سگنل ملا تھا اب دوبارہ 90 سیکنڈ کے لیے سگنل وصول کیا ہے۔

تاہم انھوں نے کہا ہے کہ ابھی تک ان سگنلز کی تصدیق نہیں ہو سکی ہے کہ آیا وہ اسی لاپتہ طیارے کے ہیں یا نہیں۔ اسی لیے تلاش میں شامل آسٹریلوی طیارے کو وہاں مزید چھان بین کے لیے روانہ کیا جا رہا ہے۔

ہاسٹن نے کہا ہے کہ برطانوی بحری جہاز ایچ ایم اسی ایکو اسی علاقے کی جانب رواں دواں ہے جبکہ آسٹریلیا کا بحری جہاز اوشین شیلڈ بھی وہاں روانہ کیا جا رہا ہے تاکہ سگنل کا پتہ چلایا جا سکے۔

ان دونوں بحری جہازوں میں طیارے کے ڈیٹا ریکارڈر سے زیر آب چھوڑے جانے والے سگنل کو پکڑنے کی صلاحیت موجود ہے۔

آسٹریلیا نے امید ظاہر کی ہے کہ جنوبی بحر ہند میں جو سگنل موصول ہوا ہے وہ ملائیشیا کے لاپتہ طیارے کا ہوگا۔

آسٹریلیا کے وزیر اعظم ٹونی ایبٹ نے یہ بھی کہا کہ اس کے بارے یقینی طور پر کچھ نہیں کہا جا سکتا ہے۔