خطرناک مگرمچھوں کو قابو کرنے والی نڈر لڑکی

مگرمچھ کا شمار دنیا کے خطرناک اور مہلک ترین جانوروں میں ہوتا ہے اور اسے خوف کی علامت بھی سمجھا جاتا ہے- بڑے تو بڑے بچے بھی اس خطرناک جانو کے قریب پھٹکنا بھی پسند نہیں کرتے لیکن ایک لڑکی ایسی بھی ہے جو بلا کی نڈر ثابت ہوئی ہے۔

امریکی ریاست کولاراڈو سے تعلق رکھنے والی 13سالہ سمانتھا ینگ نامی لڑکی فیملی پارک میں موجود مگرمچھوں کے ساتھ بلا کسی خوف کے وقت گزارتی ہے۔
 

سمانتھا ان مگرمچھوں کونہ صرف کھلاتی ہے بلکہ یہ ان پر سواری بھی کرتی ہے اور کئی لوگوں کو مگرمچھ قابو کرنے کی ٹریننگ بھی دیتی ہے۔

ان مگرمچھوں میں اس کا پسندیدہ 100 پاؤنڈ وزنی پیوی ہے جس کے ساتھ وہ اپنا بیشتر وقت گزارتی ہے۔یہ بہادر لڑکی 2 سال کی عمر سے ان مگر مچھوں کے ساتھ کھیل رہی ہے جو یقینا حیران کن ہے۔

سمانتھا کے 39 سالہ والد Jay Young کا کہنا ہے کہ “ سمانتھا کا بچپن انہی جانوروں کے درمیان گزرا ہے اور میں نے اپنی بیٹی کو پہلا مگرمچھ اس وقت دیا تھا جب وہ بچہ تھا اور یہ دونوں ایک ساتھ ہی بڑے ہوئے ہیں“-

سمانتھا نے جب اپنے والد کو بڑے بڑے مگرمچھوں کو پکڑتے دیکھا تو اسے مگرمچھوں کو قابو کرنے کا درست طریقہ سمجھ آیا-

پانچ سال کی عمر میں سمانتھا 3 فٹ کے مگرمچھ کے ساتھ کھیلتی تھی- جبکہ اسے مگرمچھ نے دو مرتبہ کاٹا بھی اور سمانتھا کسی بھی شدید زخمی ہونے کے تجربے سے واقف نہیں تھی-