سمندری طوفانوں کے نسوانی ناموں کی حقیقت اور دلچسپ تاریخ

دنیا بھر میں سمندری طوفانوں کو مختلف ناموں سے پکارا جاتا ہے جیسے کہ آج کل پاکستان سمیت دنیا بھر میں سمندری طوفان “ نیلوفر “ کا شور برپا ہے- دلچسپ بات یہ ہے کہ اکثریت سمندری طوفانوں کو خواتین کے ناموں سے منسوب کیا جاتا ہے- ایک اتفاق یہ بھی ہے کہ مردانہ ناموں کے طوفان عموماً کمزور اور ناتواں ثابت ہوئے ہیں اور ان کا ذکر کم کم ہی سننے میں آتا ہے، جب کہ نسوانی ناموں کے کئی طوفان اپنی تباہ کاریوں کے سبب بڑا خوف و ہراس پھیلا چکے ہیں۔
 

کسی بھی طوفان کا نام رکھنے کے حوالے سے جنوبی ایشیا کے ممالک کی تنظیم سارک کے درمیان ایک معاہدہ موجود ہے، جس کے تحت گزشتہ طوفان کا نام بھارت نے تجویز کیا تھا، اس مرتبہ پاکستان کی باری تھی اور آئندہ آنے والے کسی بھی طوفان کا نام سری لنکا تجویز کرے گا۔

مشہور سمندری طوفانوں میں اب تک کیٹرینا ، سونامی ،ہد ہد، باربرا، فلورنس، ہیزل، ڈولی شامل ہیں اور اب نیلوفر نامی طوفان دنیا بھر میں توجہ حاصل کر رہا ہے ۔ ماہرین اسے پہلے اے کیٹیگری کا طوفان گردانتے رہے مگر اب اس کی شدت مسلسل کمی واقع ہورہی ہے ۔

سمندری طوفانوں کے یہ عجیب اور منفرد نام رکھنے کی روایت تقریباً 100سال قبل پڑی اور اس کا واحد مقصد یہ تھا کہ طوفان آنے کی صورت میں خطرات اور دیگر خبروں سے آگاہ رہنے میں آسانی رہے۔یعنی کوئی ایسا نام رکھا جائے جو زبان عام بھی ہو اور اس کی شدت کو بھی مانیٹر کیا جا سکے-

وائس آف امریکہ نے سمندری طوفانوں کے ناموں کی تاریخ کے حوالے سے اپنی ایک رپورٹ میں لکھا ہے کہ انیسویں صدی کے شروع تک سمندروں میں جنم لینے والے طوفانوں کا صرف ایک ہی نام ہوتا تھا۔۔۔ یعنی طوفان۔۔۔۔ لیکن بعد میں آسٹریلیا کے ایک سائنس دان کلیمنٹ لنڈلی ریگ نے پہچان کے لیے ان کے نام رکھنے شروع کیے۔ یہ نام یونانی الفاظ، الفا ، بیٹا اور گاما جیسے ہوتے تھے۔ لیکن یہ سلسلہ زیادہ عرصے تک نہ چل سکا۔