نمک سے بنا انوکھا ریسٹورنٹ٬ تعمیر کیسے ممکن ہوئی؟

نمک کی کان میں بنے ریسٹورنٹ سے تو سب واقف ہی ہیں لیکن اب ایک ایسا انوکھا ریسٹورنٹ بھی تعمیر کیا گیا ہے جو کہ خود مکمل طور پر نمک سے بنا ہوا ہے اور وہ نمک جو ہاتھ پر بھی مشکل سے ٹھہرتا ہے حیرت انگیز طور پر اپنے وجود برقرار رکھے ہوئے٬ لیکن کیسے؟ آئیے بتاتے ہیں-

نمک سے بنا یہ ریسٹورنٹ جنوبی ایران کے شہر شیراز میں تعمیر کیا گیا ہے اور اس کا نام بھی سالٹ ریسٹورنٹ رکھا گیا ہے- اس ریسٹورنٹ کی دیواریں٬ فرنیچر٬ بار سمیت ہر شے مکمل طور تر سفید نمک سے تیار کردہ ہیں- یہاں تک کہ اس ریسٹورنٹ کی سیڑھیاں بھی ہموار نمک کی مدد سے بنائی گئی ہیں-
 

اس اچھوتے ڈیزائن کے حامل ریسٹورنٹ کی تعمیر ایک ایران سے ہی تعلق رکھنے والی امتیاز ڈیزائننگ گروپ نامی کمپنی نے کی ہے اور یہ منفرد خیال بھی اسی کمپنی کا پیش کردہ تھا-

کمپنی نے ریسٹورنٹ کی عمارت کی تعمیر میں نمک کو ایک مرکزی تعمیری مواد کے طور پر استعمال کیا- انہوں نے یہ عمارت مقامی طور پر موجود سستے نمک٬ پاؤڈر اور چٹانی پتھروں کی مدد سے تخلیق کی-

کمپنی کے مطابق “ ریسٹورنٹ کی دیواروں اور چھت کا ڈھانچہ نمک سے تیار کیا گیا ہے اور یہ نمک قریب میں ہی موجود نمک کی کان اور شیراز کی ایک نمکین پانی کی جھیل سے حاصل کیا ہے“-

“ نمک کے ساتھ قدرتی گوند کو شامل کیا گیا تاکہ اس آمیزے میں سختی پیدا ہوجائے اور وہ ٹھہر سکے“-