نیپالی ڈاکٹر مسیحا کے روپ میں٬ بینائی واپس صرف 5 منٹ میں

ڈاکٹر کو ایک مسیحا قرار دیا جاتا ہے لیکن بہت کم ہی ڈاکٹر ایسے ہوتے ہیں جو اس تعریف پر پورا اترتے ہیں تاہم پھر بھی دنیا میں چند ڈاکٹر اب بھی ایسے موجود ہیں جو کہ واقعی دل میں انسانیت کا درد محسوس کرنے کی صلاحیت رکھتے ہیں- انہیں ڈاکٹر میں سے ایک ہے ڈاکٹر Sanduk Ruit بھی ہیں-

نیپال سے تعلق رکھنے والے ڈاکٹر سندک ریوت ایسے افراد کے لیے حقیقی مسیحا ثابت ہوئے ہیں جو آنکھوں کے مختلف امراض میں مبتلا ہو کر نابیناؤں والی زندگی گزار رہے تھے-
 

ان افراد کی آنکھوں کا مرض قابل علاج تھا لیکن غربت اور علاج کی سہولیات کے فقدان کے باعث اندھیرے میں زندگی گزارنے پر مجبور تھے-

ڈبلیو ایچ او کے مطابق دنیا کی نابینا افراد کی 90 فیصد آبادی غریب ترین علاقوں سے تعلق رکھتی ہے اور ان میں سے 80 فیصد افراد ایسے ہوتے ہیں جن کا مرض قابلِ علاج ہوتا ہے-

ڈاکٹر سندک ریوت انتہائی سادہ اور سستا علاج کا طریقہ اپنا کر ان مریضوں کی زندگی میں روشنی بھر دی- دلچسپ بات یہ ہے کہ ڈاکٹر سندک ریوت کا یہ علاج صرف 5 منٹ میں مکمل بھی ہوجاتا ہے-

59 سالہ ڈاکٹر سندک گزشتہ 30 سالوں سے آنکھوں کے امراض کا علاج کر رہے ہیں اور اب تک ایک لاکھ سے زائد افراد کا کامیاب علاج کرچکے ہیں-ان افراد کا تعلق دو براعظموں افریقہ اور ایشیاء سے ہے۔

سندک ریوت نے اپنا آنکھوں کا بہترین فلاحی ہسپتال 1994ء میں ایک آسٹریلوی ophthalmologist فریڈ ہولوز کے ساتھ مل کر قائم کیا- تلگنگا کے نام سے مشہور یہ ہسپتال کھٹمنڈو میں بنایا گیا ہے-

ڈاکٹر سندک نے ایسے مریضوں کے لیے جو ہسپتال تک رسائی حاصل نہیں کرسکتے تھے ان کے لئے موبائل ٹیمیں بنا دیں- یہ ٹیمیں دور دراز علاقوں میں جاکر مریضوں کا علاج ان کے گھر ہی کرتی ہیں۔