حضرت محمد صلی اللہ علیہ و
آلہ وسلم (570ء) میں ربیع الاول کے مبارک مہینےمیں مکہ میں پیدا ہوئے۔ ان
کی پیدائش پر معجزات نمودار ہوئے جن کا ذکر قدیم آسمانی کتب میں تھا۔ مثلاً
آتشکدہ فارس جو ھزار سال سے زیادہ سے روشن تھا بجھ گیا۔ مشکوٰۃ کی ایک حدیث
ہے جس کے مطابق حضور صلی اللہ علیہ و آلہ وسلم کا ارشاد ہے کہ ' میں اس وقت
بھی نبی تھا جب آدم مٹی اور پانی کے درمیان تھے۔ ۔ ۔ میں ابراہیم علیہ
السلام کی دعا، عیسیٰ علیہ السلام کی بشارت اور اپنی والدہ کا وہ خواب ہوں
جو انہوں نے میری پیدائش کے وقت دیکھا اور ان سے ایک ایسا نور ظاہر ہوا جس
سے شام کے محلات روشن ہو گئے'
جس سال آپ صلی اللہ علیہ و آلہ وسلم کی پیدائش ہوئی اس سے پہلے قریش معاشی
بدحالی کا شکار تھےمگر اس سال ویران زمین سرسبز و شاداب ہوئی، سوکھے ہوئے
درخت ہرے ہو گئے اور قریش خوشحال ہو گئے۔ آپ صلی اللہ علیہ و آلہ وسلم کی
تاریخ پیدائش کے بارے میں مختلف روایات ہیں۔ اہل سنت کے نزدیک زیادہ روایات
12 ربیع الاول کی ہیں اگرچہ کچھ علماء 9 ربیع الاول کو درست مانتے ہیں۔ اہلِ
تشیع 17 ربیع الاول کو درست سمجھتے ہیں۔ آپ صلی اللہ علیہ و آلہ وسلم کا
نام آپ کے دادا حضرت عبدالمطلب نے رکھا۔ یہ نام اس سے پہلے کبھی نہیں رکھا
گیا تھا۔ آپ صلی اللہ علیہ و آلہ وسلم کی ولادت مکہ کے علاقے شعب ابی طالب
کے جس گھر میں ہوئی وہ بعد میں کافی عرصہ ایک مسجد رہی جسے آج کل ایک کتاب
خانہ (لائبریری) بنا دیا گیا ہے۔
خاندانِ مبارک
آپ صلی اللہ علیہ و آلہ وسلم کا تعلق قریشِ عرب کے معزز ترین قبیلہ بنی
ہاشم سے تھا۔ اس خاندان کی شرافت ، ایمانداری اور سخاوت بہت مشہور تھی۔ یہ
خاندان حضرت ابراہیم علیہ السلام کے دین پر تھا جسے دینِ حنیف کہتے ہیں۔ آپ
صلی اللہ علیہ و آلہ وسلم کے والدعبداللہ کا انتقال آپ صلی اللہ علیہ و آلہ
وسلم کی پیدائش سے چھ ماہ پہلے ہوگیا تھا۔ والدہ کا نام حضرت آمنہ بنت وہب
تھا جو قبیلہ بنی زھرہ کے سردار وھب بن عبدمناف بن قصی بن کلاب کی بیٹی
تھیں آپ صلی اللہ علیہ و آلہ وسلم کےدادا عبدالمطلب قریش کے سردار تھے۔ آپ
صلی اللہ علیہ و آلہ وسلم کا شجرہ نسب حضرت عدنان سے جا ملتا ہے جو حضرت
اسمعیل ابن حضرت ابراہیم علیہما لسلام کی اولاد میں سے تھے۔ اور مشہور ترین
عربوں میں سے تھے۔ حضرت عدنان کی اولاد کو بنو عدنان کہا جاتا ہے۔ یہ شجرہ
یوں ہے۔
محمد بن عبداللہ بن عبدالمطلب بن ہاشم بن عبدمناف بن قصی بن کلاب بن مرہ بن
کعب بن لؤی بن غالب بن فہر بن مالک بن نصر بن کنانہ بن خزیمہ بن مدرکہ بن
الیاس بن مضر بن نزار بن معد بن عدنان
بچپن
آپ صلی اللہ علیہ و آلہ وسلم کے والد محترم حضرت عبد اللہ ابن عبدالمطلب آپ
کی ولادت سے چھ ماہ قبل وفات پا چکے تھے اور آپ کی پرورش آپ کے دادا نے کی۔
اس دوران آپ صلی اللہ علیہ و آلہ وسلم نے کچھ مدت حضرت حلیمہ بنت عبداللہ
کے گھر گزاری۔یہ انکی رضائی ماں ہیں ۔ اس کا مقصد بچوں کو فصیح عربی زبان
سکھانا اور کھلی آب و ہوا میں صحت مند طریقے سے پرورش کرنا تھا۔ چھ سال کی
عمر میں آپ کی والدہ اور آٹھ سال کی عمر میں آپ کے دادا بھی وفات پا گئے۔
اس کے بعد آپ کی پرورش کی ذمہ داریاں آپ کے چچا ابو طالب نے سرانجام دیں۔
حضرت محمد صلی اللہ علیہ و آلہ وسلم نےاپنے چچا کے ساتھ شام کا تجارتی سفر
بھی کیا اور تجارت کے امور سے واقفیت حاصل کی۔ اس سفر کے دوران ایک بحیرا
نامی عیسائی راہب نے آپ صلی اللہ علیہ و آلہ وسلم میں کچھ ایسی نشانیاں
دیکھیں جو ایک آنے والے پیغمبر کے بارے میں قدیم آسمانی کتب میں لکھی تھیں۔
اس نے آپ کے چچا کو بتایا کہ اگر شام کے یہود یا نصاریٰ نے یہ نشانیاں پا
لیں تو آپ صلی اللہ علیہ و آلہ وسلم کی جان کو خطرہ ہو سکتا ہے۔ چنانچہ
انہوں نے یہ سفر ملتوی کر دیا اور واپس مکہ آ گئے۔اس سے معلوم ہوتا ہے کہ
آنحضرت صلی اللہ علیہ و آلہ وسلم کا بچپن عام بچوں کی طرح کھیل کود میں
نہیں گزرا ہوگا بلکہ آپ صلی اللہ علیہ و آلہ وسلم میں نبوت کی نشانیاں شروع
سے موجود تھیں۔
شام کا دوسرا سفر اور شادی
تقریباً 25 سال کی عمر میں آپ صلی اللہ علیہ و آلہ وسلم نے شام کا دوسرا
بڑا سفر کیا جو حضرت خدیجہ علیہا السلام کے تجارتی قافلہ کے لیے تھا۔ حضرت
محمد صلی اللہ علیہ و آلہ وسلم نے ایمانداری کی بنا پر اپنے آپ کو ایک اچھا
تاجر ثابت کیا۔ آپ صلی اللہ علیہ و آلہ وسلم دوسرے لوگوں کا مال تجارت بھی
تجارت کی غرض سے لے کر جایا کرتے تھے۔ آپ حضرت محمد صلی اللہ علیہ و آلہ
وسلم کے اچھے اخلاق اور ایمانداری سے بہت متاثر ہوئیں اور آپ صلی اللہ علیہ
و آلہ وسلم کو شادی کا پیغام دیا جس کو آپ صلی اللہ علیہ و آلہ وسلم نے
اپنے چچا کے مشورے سے قبول کر لیا۔ اس وقت آپ صلی اللہ علیہ و آلہ وسلم کی
عمر 25 سال تھی۔حضرت خدیجہ علیہا السلام قریش کی مالدار ترین اور معزز ترین
خواتین میں سے تھیں۔ حضرت خدیجہ علیہا السلام سے آپ صلی اللہ علیہ و آلہ
وسلم کی چار بیٹیاں حضرت زینب رضی اللہ تعالٰی عنہ ، حضرت رقیہ رضی اللہ
تعالٰی عنہ ، حضرت ام کلثوم رضی اللہ تعالٰی عنہ اور حضرت فاطمہ رضی اللہ
تعالٰی عنہ پیدا ہوئیں
بعثت (پہلی وحی)
حضرت محمد صلی اللہ علیہ و آلہ وسلم غوروفکر کیلئے مکہ سے باہر ایک غار حرا
میں تشریف لے جاتے تھے۔ یہ کوہ حرا کا ایک غار ہے جسے کوہِ فاران بھی کہا
جاتا تھا۔ 610ء میں فرشتہ جبرائیل علیہ السلام پہلی وحی لے کر تشریف لائے،
اس وقت سورہ علق کی وہ آیات نازل ہوئیں جن کا تذکرہ شروع میں ہوا ہے۔ اس
وقت حضور صلی اللہ علیہ و آلہ وسلم کی عمر مبارک تقریباً چالیس برس تھی۔
شروع ہی میں حضرت خدیجہ رضی اللہ عنہا، آپ کے چچا زاد بھائی علی رضی اللہ
عنہ آپ صلی اللہ علیہ و آلہ وسلم کے قریبی دوست حضرت ابو بکر صدیق رضی اللہ
تعالٰی عنہ ، اور آپ کے آزاد کردہ غلام اور صحابی حضرت زیدبن حا رثہ رضی
اللہ عنہ آپ صلی اللہ علیہ و آلہ وسلم پر ایمان لے آئے۔ مکہ کے باہر سے
پہلے شخص حضرت ابو ذرغفاری رضی اللہ عنہ تھے جو اسلام لائے۔ پہلے تو آپ صلی
اللہ علیہ و آلہ وسلم نے قریبی ساتھیوں میں تبلیغ کی پھر تقریباً پہلی وحی
کے تین سال بعد آپ صلی اللہ علیہ و آلہ وسلم نے دعوت ذوالعشیرہ کے بعد سے
اسلام کے پیغام کی کھلی تبلیغ شروع کی۔ اکثر لوگوں نے مخالفت کی مگر کچھ
لوگ آہستہ آہستہ اسلام کی دعوت قبول کرتے گئے۔
مخالفت
جیسے جیسے اسلام قبول کرنے والوں کی تعداد بڑھتی جا رہی تھی مقامی قبیلوں
اور لیڈروں نے آپ صلی اللہ علیہ و آلہ وسلم کو اپنے لیئےخطرہ سمجھنا شروع
کر دیا۔ ان کی دولت اور عزت کعبہ کی وجہ سے تھی۔ اگر وہ اپنے بت کعبے سے
باہر پھینک کر ایک اللہ کی عبادت کرنے لگتے تو انہیں خوف تھا کہ تجارت کا
مرکز ان کے ہاتھ سے نکل جاۓ گا۔ آپ صلی اللہ علیہ و آلہ وسلم کو اپنے قبیلے
سے بھی مخالفت کا سامنا کرنا پڑا کونکہ وہ ہی کعبے کے رکھوالے تھے۔ قبائل
نے ایک معاہدہ کے تحت مسلمانوں کا معاشی اور معاشرتی بائیکاٹ کیا یہاں تک
کہ مسلمان تین سال شعبِ ابی طالب میں محصور رہے۔ یہ بائیکاٹ اس وقت ختم ہوا
جب کعبہ پر لٹکے ہوئے معاہدے میں یہ دیکھا گیا کہ لفظ 'اللہ' کے علاوہ تمام
حروف دیمک کی وجہ سے کھائے گئے ہیں۔ جب مخالفت حد سے بڑھ گئی تو آپ صلی
اللہ علیہ و آلہ وسلم نے اپنے ساتھیوں کو حبشہ جہاں ایک عیسائی بادشاہ
حکومت کرتا تھا کی طرف ہجرت کرنے کی اجازت دے دی۔
619ء میں آپ صلی اللہ علیہ و آلہ وسلم کی بیوی حضرت خدیجہ رضی اللہ عنہا
اور آپ صلی اللہ علیہ و آلہ وسلم کے پیارے چچاابوطالب انتقال فرما گئے۔
معراج
620ء میں آپ صلی اللہ علیہ و آلہ وسلم معراج پر تشریف لے گئے۔ آپ صلی اللہ
علیہ و آلہ وسلم مکہ سے مسجد اقصی تشریف لے گئے اور وہاں تمام انبیائے کرام
کی امامت فرمائی۔ پھر آپ صلی اللہ علیہ و آلہ وسلم آسمانوں میں اللہ تعالٰی
سے ملاقات کرنے تشریف لے گئے۔ وہاں آپکی ملاقات مختلف انبیائے کرام سے بھی
ہوئی وہاں اللہ تعالٰی نے آپ صلی اللہ علیہ و آلہ وسلم کو جنت و دوزخ
کےمناظردیکھائے۔ ۔ اسی سفر میں نماز بھی فرض ہوئی۔
مدنی زندگی
ہجرت
622ء تک کئی دفعہ مسلمانوں اور خود حضرت محمد صلی اللہ علیہ و آلہ وسلم کو
تکالیف دیں گئیں۔ اس وجہ سے آپ صلی اللہ علیہ و آلہ وسلم نے مسلمانوں کو
یثرب(مدینہ) ہجرت کرنے کی اجازت دے دی۔ آپ صلی اللہ علیہ و آلہ وسلم نے
اللہ کے حکم سے حضرت صدیق رضی اللہ عنہ کے ساتھ ستمبر 622ء میں مدینہ کی
طرف روانہ ہوئے اور مدینہ میں اپنی جگہ حضرت علی علیہ السلام کو امانتوں کی
واپسی کے لیے چھوڑا۔ حضور صلی اللہ علیہ و آلہ وسلم کے مدینہ پہنچنے پر ان
کا انصار نے پرجوش استقبال کیا جب آپ صلی اللہ علیہ و آلہ وسلم مدینہ پہنچے
تو انصار استقبال کے لیے آئے اور خواتین چھتوں پر سے دیکھ رہی تھیں۔
اوربچیاں دف بجا کر کچھ اشعار پڑھ رہی تھیں جن کا ترجمہ یہ ہے۔
ہم پر چودھویں کی رات کا چاند طلوع ہوگیا وداع کی پہاڑیوں سے ہم پر شکر
واجب ہے جب تک کوئی اللہ کو پکارنے والا باقی رہے۔
آپ صلی اللہ علیہ و آلہ وسلم کی اونٹنی حضرت ابو ایوب انصاری رضی اللہ عنہ
کے گھر کے سامنے رکی اور حضور صلی اللہ علیہ و آلہ وسلم نے ان کے گھر قیام
فرمایا۔ جس جگہ اونٹنی رکی تھی اسے حضور صلی اللہ علیہ و آلہ وسلم نے
قیمتاً خرید کر ایک مسجد کی تعمیر شروع کی جو مسجد نبوی کہلائی۔ اس تعمیر
میں انہوں نے خود بھی حصہ لیا۔ یہاں حضور صلی اللہ علیہ و آلہ وسلم نے
مسلمانوں کے درمیان مؤاخات کا رشتہ قائم فرمایا یعنی مسلمانوں کو اس طرح
بھائی بنایا کہ انصار میں سے ایک کو مہاجرین میں سے ایک کا بھائی بنایا۔اور
حضرت علی کو اپنا بھائی قرار دیا۔ انصار نے مہاجریں کی مثالی مدد کی۔ ہجرت
کے ساتھ ہی اسلامی کیلنڈر کا آغاز بھی ہوا۔ آپ کے مدینہ آنے سے، اوس اور
خزرج، یہاں کے دو قبائل جن نے بعد میں اسلام قبول بھی کیا میں لڑائی جھگڑا
ختم ہوا اور ان میں اتحاد اور بھائی چارہ پیدا ہو گیا۔ اس کے علاوہ یہاں
کچھ یہودیوں کے قبائل بھی تھے جو ہمیشہ فساد کا باعث تھے۔ آپ صلی اللہ علیہ
و آلہ وسلم کے آنے کے بعد یہودیوں اور مسلمانوں کے درمیان ہونے والے معاہدہ
'میثاق مدینہ' نے مدینے میں امن کی فضا پیدا کر دی۔ اسی دور میں مسلمانوں
کو کعبہ کی طرف نماز پڑھنے کا حکم دیا گیا، اس سے پہلے مسلمان بیت المقدس
کی طرف منہ کر کے نماز ادا کرتے تھے جو کہ یہودیوں کا بھی قبلہ تھا۔
اب ہم چاہتے ہیں کہ آپ صلی اللہ علیہ و سلم کی حیات طیبہ کا ایک آئینہ پیش
کریں تاکہ تمام پہلو اختصار کے ساتھ سامنے آجائے
آئینہ حیات طیبہ
مکی زندگی
1. 570ء 54 قھ) والدعبداللہ کی وفات۔
2. 571ء53 قھ) ولادت با سعادت مکہ شریف میں۔
3. 576ء47 قھ) والدہ ماجدہ آمنہ بنت وہب کی وفات۔
4. 578ء45 قھ) داداعبدالمطلب کی وفات۔
5. 583ء40 قھ) چند مرتبہ شام کا سفر کیا
6. 595ء28 قھ) شادی حضرت خدیجہ بنت خویلد سے۔
7. 610ء 12 قھ) نزول حضرت جبرئیل اور پہلی وحی اقراء کا نزول۔
8. 610ء 12 قھ) بعثت۔
9. 613ء 9 قھ) کھلے عام تبلیغ
10. 615ء 7 قھ) حبشہ کی طرف ہجرت ۔
11. 616ء6 قھ) بنوہاشم کا معاشرتی بائیکاٹ۔
12. 618ء 4 قھ) یثرب کی خانہ جنگی۔
13. 619ء 3 قھ بنی ہاشم کے بائیکاٹ کا اختتام۔
14. 619ء 3 قھ عام حزن ، چچا ابو طالب اور زوجۂ محترمہ حضرت خدیجہ کا
انتقال۔
15. 620ء 2 قھ) معراج کا اعزاز ۔
مدنی زندگی
1. 622ء (0ھ) مدینہ شریف کی طرف ہجرت ۔
2. 624ء2ھ) معرکہ بدر اور مسلمانوں کی فتح۔
3. 624ء3ھ) احد کی جنگ اور مسلمانوں کے مابین اختلاف اور ہزیمت۔
4. 627ء5ھ) غزوہ خندق اور مسلمانوں کی فتح۔
5. 628ء6ھ) صلح حدیبہ ۔
6. 629ء7ھ) غزوہ خیبر اور مسلمانوں کی فتح۔
7. 630ء8ھ) فتح مکہ زادھا اللہ شرفاً وإجلالاً۔
8. 632ء10ھ) غزوہ تبوک اور مسلمانوں کی فتح۔
9. 632ء 10ھ) حجۃ الوداع ۔
10. 632ء (10ھ) رفیق اعلی سےملاقات ۔ |